Ikipe ya Manchester United yamuritse ku mugaragaro umwambaro mushya izakoresha mu mwaka w’imikino wa 2026/27, mu gikorwa cyakuruye amarangamutima y’abafana b’iyi kipe yo mu Bwongereza ndetse n’abakunzi b’umupira w’amaguru ku Isi yose.
Uyu mwambaro mushya wakozwe n’uruganda rwa Adidas wageze hanze mu gitondo cyo kuri uyu munsi, tariki 14 Gicurasi 2026, ndetse utangira kugurishwa guhera saa tatu za mu gitondo.
Abafana benshi bari bamaze iminsi bawutegereje nyuma y’uko ku wa Gatatu hari hamaze kugaragara icyapa kinini cyawo hanze ya Stade Old Trafford, ahazwi cyane nk’icyicaro gikuru cya Manchester United.
Iyi kipe yatangaje ko uwo mwambaro uzambarwa bwa mbere mu mukino uzahuza ikipe y’abagore ya Manchester United na Chelsea kuri Stamford Bridge, mu mukino wa nyuma wa Women’s Super League muri uyu mwaka w’imikino.
Nyuma yaho, ikipe nkuru y’abagabo nayo izongera kuwambara ku munsi wa nyuma wa shampiyona, ubwo izaba ihura na Brighton. Ibi bivuze ko abafana bazabona uwo mwambaro inshuro eshatu muri uku kwezi mbere y’uko umwaka mushya w’imikino utangira ku mugaragaro.
Manchester United yavuze ko uyu mwambaro mushya uzakoreshwa no mu mikino ya Champions League mu mwaka utaha, ibintu byafashwe nk’inkuru nziza ku bafana b’iyi kipe imaze igihe ishaka kongera kwisubiza icyubahiro ku rwego rw’u Burayi.
Amasezerano Manchester United ifitanye na Adidas nayo yongeye kuvugwaho cyane nyuma y’itangazwa ry’uyu mwambaro mushya.
Hari ingingo iri muri ayo masezerano ivuga ko iyo ikipe idakinnye Champions League, amafaranga igenerwa agabanywaho miliyoni 10 z’amapawundi. Kuba Manchester United izongera gukina iri rushanwa bizatuma ayo masezerano asubira ku rwego rusanzwe.
Abasesenguzi bavuga ko kumurika uyu mwambaro mushya mbere y’uko shampiyona irangira ari uburyo bwo gukomeza kongera ubushake n’icyizere mu bafana, cyane cyane nyuma y’ibihe bitandukanye ikipe yanyuzemo mu myaka ishize.
Ku mbuga nkoranyambaga, abafana benshi bagaragaje ko bishimiye imiterere y’uyu mwambaro mushya, bamwe bavuga ko ubibutsa ibihe byiza Manchester United yagize mu myaka yashize, mu gihe abandi bavuga ko bizeye ko uzajyana n’intsinzi n’ibihe bishya byiza kuri iyi kipe.
Manchester United ikomeje kuba imwe mu makipe afite abafana benshi ku Isi, aho buri gikorwa cyayo gikurikirwa cyane haba mu Bwongereza no hirya no hino ku migabane yose.
Tubibutse ko mushobora gukomeza kudukurikirana ku mbuga nkoranyambaga.
Kanda hano udukurikirane kuri Facebook, Hano udukurikirane kuri WhatsApp
