Ubushinjacyaha ku Rwego Rwisumbuye rwa Gasabo bukomeje gukurikirana umugore w’imyaka 25 ukekwaho icyaha gikomeye cyo kugerageza kwica umugabo we, amuhaye inzoga bivugwa ko yari avanze na Super Glue, mu gikorwa cyabereye mu Karere ka Gasabo, Umurenge wa Rutunga, Akagali ka Kigabiro, Umudugudu wa Rwintare.
Ibi byabaye ku itariki ya 09 Kamena 2026, ubwo bivugwa ko uregwa yaguze inzoga, akayivangamo Super Glue, nyuma akayishyira umugabo we ngo ayinywe.
Gusa uwo mugabo ngo yagize amakenga nyuma yo kubona ko inzoga yahindutse ibara, bituma atayinywa, bityo bikaba byaratumye arokoka icyo gikorwa cyari kigamije kumugiraho ingaruka zikomeye zirimo no kubura ubuzima.
Amakuru yatangajwe n’Ubushinjacyaha Bukuru agaragaza ko mu ibazwa rye, uregwa yemeye icyaha, asobanura ko yari afite umugambi wo kwica umugabo we.
Yavuze ko byatewe n’uko umugabo we yanze ko bimuka aho batuye, nubwo ngo bari bamaze kuhabyarira abana batatu bakaza gupfa, ibintu yafataga nk’impamvu ikomeye yamuteye iyo myitwarire.
Uru rubanza rwerekeranye n’icyaha cy’ubwinjiracyaha bw’icyaha cyo kuroga, nk’uko biteganywa n’ingingo ya 21 n’iya 110 z’Itegeko n°68/2018 ryo ku wa 30 Kanama 2018 riteganya ibyaha n’ibihano muri rusange mu Rwanda.
Ubugenzacyaha n’Ubushinjacyaha bakomeje iperereza kugira ngo hamenyekane neza uko uyu mugambi wateguwe n’uruhare nyarwo rw’uregwa, mu gihe dosiye ikomeje gutunganywa mbere yo gushyikirizwa inkiko zibifitiye ububasha.
Abasesengura amategeko bagaragaza ko icyaha nk’iki, nubwo cyitwa “ubwinjiracyaha”, gishobora gukurikiranwa cyane cyane iyo hari ibimenyetso bigaragaza umugambi n’intambwe zifatika zagezweho mu kugerageza kugikora.
Tubibutse ko mushobora gukomeza kudukurikirana ku mbuga nkoranyambaga.
Kanda hano udukurikirane kuri Facebook, Hano udukurikirane kuri WhatsApp
