Inkubiri y’imirwano hagati y’Ihuriro rya AFC/M23 n’ingabo za Repubulika Iharanira Demokarasi ya Congo zifatanyije n’imitwe ya Wazalendo yongeye gufata indi ntera muri Teritwari ya Masisi, mu gihe impande zombi zikomeje kuvuguruza no kwemeza amakuru ajyanye no kugenzura uduce twinshi two muri ako karere gakungahaye ku mabuye y’agaciro.
Kwigamba intsinzi n’intsinzwi hagati y’impande zihanganye byafashe indi ntera nyuma y’uko ibinyamakuru bimwe byegereye ubutegetsi bwa Kinshasa birimo ACTUALITE.CD bitangaje ko ingabo za FARDC zifatanyije na Wazalendo zafashe agace ka Kabobi ndetse na Kinigi, byari bisanzwe bigenzurwa na AFC/M23.
Aya makuru yanavugaga ko abarwanyi ba AFC/M23 baba barasubiye inyuma berekeza Rubaya, santere ifatwa nk’ingenzi kubera ubukungu bushingiye ku bucukuzi bwa coltan n’andi mabuye y’agaciro.
Nyuma y’iyo nkuru, ubuyobozi bwa AFC/M23 bwahise buyanyomoza, buvuga ko amakuru ari gukwirakwizwa ari ibihuha bigamije kuyobya uburari no guca intege abayishyigikiye.
Guverineri wungirije w’Intara ya Kivu y’Amajyaruguru, Ngarambe Manzi Willy, abinyujije ku rubuga rwa X, yavuze ko ibivugwa ku gutakaza uduce twa Masisi bidafite ishingiro.
Yagize ati: “Mwaduteye mwishyize hamwe, ariko muzatatana mufite ubwoba. Inzozi zanyu zapfubye zitaranatangira. Ikinyoma kibashyigikiye kizagwa, kandi amahoro azongera kuganza muri Congo.”
Amakuru aturuka muri Masisi avuga ko kugeza mu masaha ya nyuma yo ku wa Gatanu, AFC/M23 yari igifite igenzura ku duce twa Kinigi na Kibabi, nubwo FARDC na Wazalendo bo bakomeje kuvuga ko bamaze gufata bimwe muri ibyo bice.
Imirwano ikomeje kuvugwa cyane cyane mu duce twa Chugi, Kavuta no ku misozi ikikije Kinigi, ahari inzira ziganisha kuri Rubaya. Hari kandi indi mirwano iri kuri axe ya Gashovu-Mahiga-Nzingati-Mayuwano, aho abaturage bavuga ko urusaku rw’imbunda nto n’iziremereye rwumvikanye umunsi wose.
Ku wa 21 Gicurasi 2026, Umuvugizi wa AFC/M23, Lawrence Kanyuka, yatangaje ko ingabo za RDC n’imitwe ya Wazalendo zagabye ibitero bikomeye kuva mu rukerera rw’uwo munsi mu duce two muri segiteri ya Katoyi.
Kanyuka yavuze kandi ko no ku wa 19 Gicurasi hari habaye ibindi bitero muri santere ya Mitimingi n’uduce tuyikikije, ashinja Leta ya Kinshasa gukomeza ibikorwa bya gisirikare bishobora guteza umutekano muke kurushaho.
Mu gihe impande zombi zikomeje kurwanira kugenzura ibi bice, abaturage ni bo bakomeje kugirwaho ingaruka zikomeye. Ibihumbi by’abaturage bamaze guhunga ingo zabo berekeza mu bice bakeka ko bifite umutekano, bamwe bakabura aho bakinga umusaya n’ibiribwa.
Ubucuruzi, ubuhinzi n’ubworozi, byari ishingiro ry’ubuzima bw’abatuye muri aka gace, byahagaze kubera umutekano muke ukomeje kurangwa muri Masisi.
Rubaya ikomeje kuba ihurizo rikomeye kuri izi mpande zombi kubera ubukungu buyikomokaho. AFC/M23 igenzura aka gace kuva muri Gicurasi 2024, nyuma yo kuhambura ingabo za FARDC, iz’u Burundi ndetse n’imitwe ya Wazalendo zari zihafite ibirindiro n’igenzura ku bucukuzi bw’amabuye y’agaciro.
Muri Gashyantare 2026, FARDC na Wazalendo na bwo bagabye ibitero bikomeye bigamije kwisubiza Rubaya, ariko AFC/M23 ibasha kubisubiza inyuma nyuma y’imirwano ikaze yamaze igihe.
Iyo mirwano yasize hapfuye uwari Umuvugizi wa AFC/M23 mu rwego rwa gisirikare, Lt Col Willy Ngoma, hamwe n’abamurindaga, ibintu AFC/M23 yavuze ko byerekana ubushotoranyi bwa Leta ya Congo n’abafatanyabikorwa bayo.
Kugeza ubu, nta ruhande rurabasha gutanga imibare yizewe y’abahasize ubuzima cyangwa abakomeretse muri iyi mirwano mishya iri kubera hafi ya Rubaya, mu gihe impungenge ku kibazo cy’ubutabazi ku baturage zikomeje kwiyongera.
Tubibutse ko mushobora gukomeza kudukurikirana ku mbuga nkoranyambaga.
Kanda hano udukurikirane kuri Facebook, Hano udukurikirane kuri WhatsApp
