Ubuzima bwa buri munsi burushaho gusaba abantu gukora ingendo ndende, gutembera mu misozi, gukora ibikorwa byo mu gasozi cyangwa kugera ahantu usanga ubwiherero budahagije kandi budafite isuku.
Kubera iyo mpamvu, hari igikoresho gito gikozwe muri silicone yo mu rwego rw’ubuvuzi cyiswe GoGirl, gikomeje kwamamara mu bagore kubera ubushobozi bwo kubafasha kwihagarika bahagaze batabanje kwicara ku musarani.
Iki gikoresho cyakozwe hashingiwe ku miterere y’umubiri w’umugore, ku buryo gifasha inkari gusohoka neza igihe gikoreshejwe uko bikwiye. Abagikoresha bavuga ko kibafasha cyane mu bihe bitoroshye kubona ubwiherero busukuye cyangwa igihe baba bari mu rugendo rurerure.
Umwanditsi Alison Freer yavuze ko bwa mbere yahawe GoGirl nk’impano yasaga n’iyo gusetsa na mugenzi we bakoranaga mu ruganda rwa sinema. Icyakora nyuma yaje gusanga ari kimwe mu bikoresho byamubereye ingirakamaro kurusha uko yabitekerezaga.
Yagize ati: “Nakomeje kugitwara igihe cyose, nkagikoresha mu bwiherero budasukuye, mu ngendo zo gutembera, mu ndege ndetse no mu bindi bihe bitari byoroshye kubona ubwiherero bwiza.”
GoGirl ikoreshwa ishyirwa neza ku mubiri kugira ngo inkari zisohoke neza nta kumeneka. Abayikoresha basabwa kubanza kuyigerageza bari mu rugo mbere yo kuyikoresha ahandi, kugira ngo bamenyere uburyo ikora kandi birinde ibibazo byo kumeneka kw’inkari bishobora guterwa no kutayikoresha neza.
Nyuma yo kuyikoresha, isukurwa n’amazi, igahanagurwa cyangwa ikumutswa mbere yo gusubizwa mu isakoshi. Nyuma yo kuyikoresha inshuro nyinshi ishobora no kozwa n’isabune kugira ngo ikomeze kugira isuku.
Nubwo iki gikoresho gikomeje kwamamara mu bihugu bitandukanye, cyanazamuye impaka ndende zishingiye ku muco, uburinganire bw’abagore n’abagabo, isuku ndetse n’uburyo gishobora gukoreshwa neza.
Ku ruhande rw’umuco, hari abavuga ko kuba umugore yakwihagarika ahagaze binyuranyije n’imigenzo imenyerewe mu bice byinshi by’isi, cyane cyane muri Afurika no mu bihugu bikigendera cyane ku migenzo ya kera. Hari ababifata nk’umuziro cyangwa imyitwarire idakwiye, mu gihe abandi bavuga ko iki gikoresho gituma abagore bagerageza kwigana abagabo aho gukomeza umwimerere wabo.
Abashyigikira GoGirl bo bavuga ko ikibazo gikomeye atari uburyo bwo kwihagarika, ahubwo ari amahirwe angana mu gukoresha ubwiherero rusange. Bagaragaza ko ahantu henshi abagabo bagira uburyo bwihuse bwo kunyara bahagaze, mu gihe abagore bakunze kumara igihe kinini bategereje kubera imirongo miremire.
Ni muri urwo rwego bamwe mu baharanira uburinganire bavuga ko GoGirl ishobora gufasha abagore kugira umudendezo usesuye igihe bari mu rugendo cyangwa ahantu hahurira abantu benshi.
Hari kandi impungenge zishingiye ku isuku. Abanenga iki gikoresho bavuga ko iyo kidasukuwe neza gishobora kubika ibisigazwa by’inkari, bikaba byakurura mikorobe cyangwa umwanda igihe kibitswe mu gikapu cyangwa mu mufuka.
Ikindi kibazo kivugwa ni uko abagore bagitangira gukoresha GoGirl bashobora kwibasirwa no kumeneka kw’inkari ku myenda bitewe no kutamenya neza uko gikoreshwa, ari yo mpamvu abakora iki gikoresho bagira inama abakigura kubanza kukimenyereza mu rugo.
Abahanga mu buzima bo bagaragaza ko nubwo GoGirl ishobora kuba igisubizo mu bihe bitandukanye, isuku ikwiye ikomeza kuba ingenzi. Bashimangira ko kuyisukura neza no gukaraba intoki nyuma yo kuyikoresha ari ingenzi mu kwirinda indwara zishobora gukwirakwira binyuze mu mwanda.
Hari n’abashakashatsi bagaragaza ko ubu bwoko bw’ibikoresho bushobora kugira akamaro gakomeye ku bagore bafite ubumuga bwo mu maguru, abageze mu za bukuru, abagore batwite cyangwa abarwayi bafite ikibazo cyo gupfukama no gukoresha ubwiherero busanzwe. Urugero rutangwa ni ubushakashatsi bwakorewe muri Kaminuza ya Makerere muri Uganda bwavuyemo ubundi bwoko bw’igikoresho bwiswe Pee-Gal.
Mu bihugu byinshi, GoGirl ikomeje kwifashishwa n’abagore bakunda gukora ingendo ndende, abakora ibikorwa byo mu gasozi, abakunda gutembera ndetse n’abashaka kwirinda gukoresha ubwiherero budafite isuku.
Nubwo impaka kuri iki gikoresho zigikomeje, abakigikoresha bavuga ko kibafasha kurushaho kugira ubwisanzure, mu gihe abakigaya bo bakomeza gushimangira ko uburyo gikoreshwa n’isuku yacyo ari byo bizagena niba gifite akamaro cyangwa gishobora guteza ibibazo.
Tubibutse ko mushobora gukomeza kudukurikirana ku mbuga nkoranyambaga.
Kanda hano udukurikirane kuri Facebook, Hano udukurikirane kuri WhatsApp
