Bruce Melodie yongeye kuba ingingo nyamukuru y’ibiganiro ku mbuga nkoranyambaga nyuma y’ubutumwa bugufi yatambukije, bwatumye benshi bongera kwibaza ku mubano afitanye n’umujyanama we umaze imyaka amufasha mu rugendo rw’umuziki, Coach Gael.
Uyu muhanzi wamaze kwigarurira imitima ya benshi mu Rwanda no hanze yarwo, yanditse amagambo make ariko aremereye ati: “Coach nawe akeneye Coach!”
Nubwo atigeze asobanura icyo yashakaga kuvuga cyangwa ngo agire ibindi bisobanuro atanga nyuma y’ubu butumwa, bwahise bukwirakwira ku mbuga nkoranyambaga ndetse butangira gusesengurwa n’abakunzi b’umuziki n’abakurikirana imyidagaduro.
Hari ababonye aya magambo nk’ubutumwa busanzwe bwo gushishikariza abantu bose kwemera ko bakeneye inama n’ubujyanama mu buzima. Abandi bo bahise bayahuza n’amakuru amaze igihe avugwa ko umubano wa Bruce Melodie na Coach Gael ushobora kuba utari mu bihe byiza nk’uko byahoze.
Ibi byatumye ibitekerezo bitandukana cyane, bamwe bavuga ko ashobora kuba yarashakaga gutanga ubutumwa bwihariye ku muntu umwe cyangwa ku kibazo runaka kiri mu mikoranire yabo, mu gihe abandi bavuga ko nta gihamya ihari yemeza ko hari ikibazo kiri hagati yabo.
Amakuru y’ibibazo bishobora kuba biri hagati ya Bruce Melodie na Coach Gael si mashya. Mu bihe bitandukanye byashize, hakunze kumvikana amakuru avuga ko bombi bashobora kuba bafite ibyo batumvikanaho mu mikoranire yabo.
Icyakora, igihe yabazwaga kuri ayo makuru n’itangazamakuru, Bruce Melodie yakomeje kuyahakana, agaragaza ko nta kibazo gikomeye kiri hagati ye n’uwo bakoranye igihe kinini.
Abakurikiranira hafi iby’imyidagaduro bavuga ko kuba uyu muhanzi yongeye kwandika amagambo nk’aya mu gihe hari hasanzwe hariho impuha nk’izo, byatumye abantu benshi bongera kwibaza niba koko ibintu byose bikimeze neza hagati yabo.
Hari kandi abahise bahuza ubu butumwa n’amafoto ndetse n’amashusho aherutse gukwirakwira ku mbuga nkoranyambaga agaragaza Coach Gael ari kumwe na The Ben nyuma y’igitaramo cya Summer Country Tour cyabereye i Bugesera.
Nyuma y’icyo gitaramo, bamwe mu bitabiriye ibikorwa byari byateguwe nyuma yacyo bahuriye muri Golden Night Club, ahafatiwe amafoto n’amashusho yagaragaje Coach Gael ari mu byishimo ari kumwe na The Ben n’abandi banyamuziki n’abashoramari bo mu ruganda rw’imyidagaduro.
Nubwo nta sano rizwi riri hagati y’ayo mafoto n’ubutumwa bwa Bruce Melodie, hari bamwe mu bakoresha imbuga nkoranyambaga babihuje, bavuga ko bishobora kuba bifite icyo bisobanuye. Icyakora, nta ruhande na rumwe rwigeze rubyemeza cyangwa ngo rugire icyo rubitangazaho.
Iyo umuntu arebye amateka y’imikoranire ya Bruce Melodie na Coach Gael, biragoye kutabona uruhare runini uyu mujyanama yagize mu rugendo rw’uyu muhanzi.
Bruce Melodie na Coach Gael batangiye gukorana mu mwaka wa 2021, mu gihe uyu muhanzi yari asanzwe ari umwe mu bafite izina rikomeye mu Rwanda ariko agifite intego yo kwagura ibikorwa bye ku rwego mpuzamahanga.
Kuva icyo gihe, ibikorwa bye byafashe indi ntera. Yatangiye kugaragara cyane ku isoko mpuzamahanga ry’umuziki, akorana n’abahanzi bakomeye barimo Diamond Platnumz, Joeboy, Shaggy na Bien. Uretse ubufatanye mu ndirimbo, yaninjiye mu mishinga myinshi yashowemo amafaranga menshi, ibintu byafashije izina rye kurushaho kumenyekana mu bice bitandukanye by’isi.
Mu myaka yakurikiyeho, Bruce Melodie yakomeje gukora ibitaramo bikomeye, kugirana ibiganiro n’ibitangazamakuru mpuzamahanga no gukomeza kwamamaza umuziki nyarwanda ku rwego rwagutse kurushaho.
Mu mwaka wa 2025, yashyize hanze album yise “Colorful Generation”, umwe mu mishinga ikomeye yakozwe mu rugendo rwe rwa muzika. Iyi album yamamajwe binyuze mu bukangurambaga bwagutse bwashowemo amafaranga menshi, ndetse ikomeza gushimangira icyerekezo cyo kwagura ibikorwa bye ku rwego mpuzamahanga.
Kugeza ubu, Bruce Melodie cyangwa Coach Gael ntibaragira icyo batangaza ku busobanuro nyabwo bw’ubutumwa bugira buti “Coach nawe akeneye Coach!” cyangwa ku makuru akomeje kuvugwa ku mubano wabo.
Mu gihe abakunzi babo bakomeje gutegereza ibisobanuro birambuye, ubu butumwa bukomeje kuba kimwe mu bintu byakuruye impaka nyinshi mu myidagaduro nyarwanda, aho benshi bibaza niba ari amagambo asanzwe cyangwa niba ari ubutumwa bwihishe bushobora gusobanura byinshi kurushaho mu minsi iri imbere.
Tubibutse ko mushobora gukomeza kudukurikirana ku mbuga nkoranyambaga.
Kanda hano udukurikirane kuri Facebook, Hano udukurikirane kuri WhatsApp
