Abaturage bo mu Karere ka Ngoma bakomeje kuvuga inkuru y’ubukwe bwari bwitezwe n’abantu benshi ariko bugahagarara ku munota wa nyuma nyuma y’uko hamenyekanye amakuru yatumye umusore wari ugiye gushyingiranwa afata icyemezo cyo kubivamo.
Ibi byabereye hagati y’umukobwa wo mu Murenge wa Gashanda, Akagari ka Mutsindo n’umusore wo mu Murenge wa Kazo, Akagari ka Birenga, bari bamaze igihe bakundana ndetse baramaze no gutegura gahunda zose zijyanye n’ubukwe.
Tariki ya 25 Kamena 2026 ni bwo aba bombi byari biteganyijwe ko basezerana imbere y’amategeko. Imiryango yabo yari yaramaze kubimenyesha inshuti, abavandimwe ndetse n’abaturanyi, bose bitegura umunsi mukuru wari utegerejwe na benshi.
Nyuma yo gusezerana, gahunda zari zikurikira zari kuba ibirori by’ubukwe ahantu hateganyijwe, aho abatumirwa bari kwitabira gusangira ibyishimo n’abageni. Umusore yari yaranamaze gutanga inkwano, ibintu byatumaga benshi bumva ko nta kibazo na kimwe cyashoboraga kubangamira uwo munsi.
Icyakora ibintu byafashe indi ntera ubwo hamenyekanaga amakuru atari yarigeze amenyekana mbere. Amakuru yageze ku musore mbere gato y’ubukwe yatumye asubika icyemezo yari yarafashe cyo kubana n’uwo mukobwa.
Umwe mu bayobozi bo mu nzego z’ibanze utifuje gutangazwa amazina yavuze ko ikibazo cyaturutse ku kuba umusore yaraje gusanga hari amakuru y’ingenzi yari yarahishwe mu gihe cyose bamaze bakundana.
Yagize ati: “Uwo musore yari amaze igihe avugana n’uwo mukobwa cyane, yari azi ko umukunzi we yarangije kwiga kaminuza kuko ngo ni ko yamubwiraga, umusore rero ejo bundi aho batangiriye gutegura ubukwe yamenye ko umukobwa atigeze ayiga, amenya ko yiga mu mwaka wa gatatu w’amashuri yisumbuye. Ikindi yamenye ko uwo mukobwa yanabyariye iwabo afite umwana w’imyaka ine ahita abivamo.”
Aya makuru yatunguye benshi cyane cyane ko imyiteguro y’ubukwe yari igeze kure. Mu Kagari ka Mutsindo, abaturage bavuga ko hari hamaze iminsi humvikana ibyishimo by’ubukwe bwari bugiye kuba.
Abagombaga guherekeza umugeni bari baramaze gukodesha imyambaro, abandi bategura ibizifashishwa mu birori, mu gihe imiryango yombi yari imaze igihe ikorana imyiteguro itandukanye.
Umwe mu baturage yagize ati: “Umukobwa ntiyabwije umuhungu ukuri, yamubeshye ko ari inkumi atabyaye, arongera amubeshya ko arangije kaminuza. Uwo muhungu amukuraho icyizere gusa njye sindabonana n’ababyeyi be ngo babinyibwirire ariko amakuru mfite ni ayo, twanumvise ko inkwano umukobwa yaburiwe irengero azitwaye.”
Aya magambo agaragaza uburyo abaturage bakiriye aya makuru ndetse n’ingaruka yagize ku mubano wari warubakiwe ku cyizere.
Mu bakobwa bari biteguye kuzambarira umugeni, na bo bavuga ko batunguwe n’uko ibintu byahindutse mu buryo bwihuse cyane.
Umwe muri bo yagize ati: “Twakodesheje imikenyero, ubukwe turabutegura tukajya tunategura inama, twari abakobwa umunani dukodesha imikenyero tuzi ko ibirori bihari, ku wa Mbere ni bwo twayishyuye bigeze kuwa Kabiri dutangira kumva ko ubukwe bwapfuye rero twamenye ko uwo mukobwa yabeshye umuhungu ko ari inkumi kandi yarabyaye, anamubeshya ko yarangije kaminuza kandi abeshya.”
Nyuma y’uko ubukwe busubitswe, haje kuvugwa amakuru y’uko umukobwa yari yaburiwe irengero, ibintu byateye impungenge abo mu muryango we ndetse n’abayobozi bo mu nzego z’ibanze.
Inzego zitandukanye zahise zitangira kumushakisha kugira ngo harebwe niba nta kibazo yaba yarahuye na cyo nyuma y’ibyamubayeho.
Umunyamabanga Nshingwabikorwa w’Umurenge wa Gashanda, Ngenda Mathias, yavuze ko uwo mukobwa yaje kuboneka amahoro nyuma y’ubushakashatsi bwakozwe.
Yagize ati: “Kuba ari muzima ni byo twishimira na ho kuba yabenzwe nta kintu twabivugaho kuko ntabwo turaganira na bo, gusa ni ibisanzwe agomba kwiyakira.”
Amakuru avuga ko uwo mukobwa yabonetse mu Karere ka Rwamagana kandi ari muzima, ibintu byatumye impungenge zari zifitwe n’abaturage n’umuryango we zigabanuka.
Iyi nkuru yasigiye benshi isomo rikomeye ku kamaro ko kubwizanya ukuri hagati y’abitegura kubana. Abaturage benshi bavuga ko urukundo n’urugo biramba iyo bishingiye ku kuri no ku kwizerana, mu gihe kubaka umubano ku makuru atari yo bishobora kuvamo ibibazo bikomeye nk’ibyagaragaye muri ubu bukwe bwahagaze habura amasaha make ngo bube.
Abasesenguzi mu mibereho y’abantu bavuga ko mbere yo gufata icyemezo cyo gushyingiranwa, ari ngombwa ko abakundana baganira ku mateka yabo, ubuzima banyuzemo, amashuri bize ndetse n’ibindi byose bishobora kugira uruhare mu kubaka icyizere kizabafasha kubana igihe kirekire.
Ubukwe bwari bwitezwe n’imiryango myinshi bwarangiye butabaye, ariko inkuru yabwo ikomeje kuganirwaho cyane muri Ngoma no mu bindi bice by’igihugu kubera amasomo menshi abaturage bavuga ko bayikuyemo.
Tubibutse ko mushobora gukomeza kudukurikirana ku mbuga nkoranyambaga.
Kanda hano udukurikirane kuri Facebook, Hano udukurikirane kuri WhatsApp
