Umutoza w’Ikipe y’Igihugu y’u Rwanda ‘Amavubi’, Stephen Constantine, yashyize hanze urutonde rw’abakinnyi 24 bazitabira umwiherero w’imikino ibiri ya gicuti izabera muri Maroc, hagaragaramo amazina mashya ndetse n’abakinnyi bakomeye basanzwe bamenyerewe mu Ikipe y’Igihugu.
Icyakurikiwe cyane muri uru rutonde ni uguhamagarwa bwa mbere kwa Noam Emeran, umukinnyi ukiri muto wakiniye amakipe y’abato ya Manchester United mbere yo kwerekeza muri Groningen FC yo mu Buholandi.
Uyu mukinnyi ni umuhungu wa Fritz Emeran Nkusi wahoze akinira Amavubi mu myaka yashize, ibintu byatumye benshi mu bakunzi b’umupira w’amaguru mu Rwanda bagaragaza ibyishimo n’icyizere ku hazaza h’Ikipe y’Igihugu.
Aya mahitamo ya Constantine aje mu gihe Amavubi yitegura imikino ibiri ya gicuti azahuramo na Comoros national football team ndetse na Tanzania national football team mu ntangiriro za Kamena muri Maroc. Iyo mikino izaba iri mu rwego rwo gukomeza kwitegura neza imikino yo gushaka itike y’Igikombe cya Afurika cya 2027 iteganyijwe gutangira muri Nzeri.
Nubwo hari amazina mashya yagaragaye muri uru rutonde, hari n’abakinnyi bamwe basanzwe bafite izina rikomeye mu Mavubi batagaragayemo. Harimo myugariro Manzi Thierry ndetse n’abavandimwe babiri Joy-Lance Mickels na Leroy Jacques Mickels batabonetse kubera imvune.
Undi mukinnyi utagaragara ku rutonde ni Hakim Sahabo ukinira AEK Athens yo mu Bugereki, aho amakuru avuga ko atabonye umwanya uhagije wo gukina muri iyi minsi ishize.
Mu bakinnyi bahamagawe, abakina imbere mu Rwanda ni 11. Ikipe ya APR FC ni yo ifitemo benshi kuko yatanze abakinnyi batandatu, barimo Hakizimana Adolphe, Niyigena Clément, Nshimiyimana Yunus, Byiringiro Jean Gilbert, Niyomugabo Claude na Ruboneka Jean Bosco.
Hari kandi umunyezamu Kwizera Olivier wo muri Rayon Sports, Niyongira Patience wa Police FC ndetse na Mbonyumwami Taiba wa Marine FC.
Ikipe ya Kiyovu Sports na yo ifitemo abakinnyi babiri bahamagawe, barimo rutahizamu Uwiyaremye Fidali wahamagawe bwa mbere mu Ikipe y’Igihugu.
Mu bakinnyi bakina hanze y’u Rwanda, Constantine yakomeje kugirira icyizere abakina i Burayi, muri Afurika y’Amajyaruguru no muri Leta Zunze Ubumwe za Amerika. Harimo Mutsinzi Ange ukinira Zira FK, Mugisha Bonheur wa Al Masry, Bizimana Djihad wa CS Constantine ndetse na Samuel Gueulette ukinira Raal La Louviere.
Abakunzi b’Amavubi bazaba bahanze amaso cyane uburyo Noam Emeran azitwara ubwo azaba akinira Amavubi rye rya mbere, cyane cyane kubera uburambe yanyuzemo mu mupira wo ku rwego rwo hejuru mu Bwongereza mbere yo kujya gukina mu Buholandi.
Umukino wa mbere Amavubi azakina uzayahuza na Comores ku wa 6 Kamena mbere yo guhura na Tanzania ku wa 9 Kamena.
Urutonde rw’abakinnyi bahamagawe mu Mavubi
Abanyezamu: Niyongira Patience, Hakizimana Adolphe na Kwizera Olivier.
Ba myugariro: Mutsinzi Ange, Niyigena Clément, Kavita Phanuel Mabaya, Nshimiyimana Yunus, Byiringiro Jean Gilbert, Imanishimwe Emmanuel na Niyomugabo Claude.
Abakina hagati: Noam Emeran Fritz, Kwizera Jojea, Kury Johan Marvin, Mugisha Bonheur, Bizimana Djihad, Samuel Marie Gueulette, Ruboneka Jean Bosco na Muhire Kevin.
Ba rutahizamu: Nshuti Innocent, Uwineza Rene, Biramahire Abeddy, Mickels Joy Slayd, Uwiyaremye Fidali na Mbonyumwami Taiba.
Tubibutse ko mushobora gukomeza kudukurikirana ku mbuga nkoranyambaga.
Kanda hano udukurikirane kuri Facebook, Hano udukurikirane kuri WhatsApp
