Ihuriro rya AFC/M23 ryatangaje ko ryiyemeje gukomeza urugamba rwaryo rwo guharanira impinduka muri Repubulika Iharanira Demokarasi ya Congo binyuze mu cyerekezo cya politiki gishya ryise “Ordo ab Chao”, mu gihe Perezida Félix Antoine Tshisekedi we akomeje gutangaza ko ingabo za Leta ziri kugenda zitsinda abo zihanganye na bo ku rugamba kandi ko ziteganya kongera kwigarurira imijyi ya Goma na Bukavu.
Iyi gahunda nshya ya AFC/M23 yagaragajwe mu itangazo ryashyizwe ahagaragara n’Umuvugizi wa AFC/M23 mu bya Politiki, Lawrence Kanyuka, wasubizaga ku magambo Perezida Tshisekedi yavugiye i Houston muri Leta ya Texas muri Leta Zunze Ubumwe za Amerika.
Mu ijambo rye yagejeje ku Banye-Congo batuye muri uwo mujyi, Perezida Tshisekedi yavuze ko ingabo za Repubulika Iharanira Demokarasi ya Congo zikomeje gutsinda abo bahanganye ku rugamba kandi ko igihe kiri hafi kugira ngo Goma na Bukavu bisubire mu maboko ya Leta.
Yanashimangiye ko ubusugire n’ubwigenge bya Repubulika Iharanira Demokarasi ya Congo bitazigera biganirwaho cyangwa ngo hagire ibigenderwaho mu kubyumvikanaho.
Aya magambo ntiyakiriwe neza na AFC/M23, yahise ishinja RDC kunyuranya n’umwuka w’agahenge wari ugamije gufasha inzira y’ibiganiro n’iy’amahoro. Iri huriro ryavuze ko imvugo nk’iyo ishobora gukomeza guteza amacakubiri no kongera gukaza umwuka mubi hagati y’Abanye-Congo aho gufasha igihugu kugana ku bwiyunge n’ituze rirambye.
AFC/M23 ikomeje kandi gushinja ubutegetsi bwa Kinshasa kuba nyirabayazana w’ibibazo bya politiki, umutekano n’ubutabazi bimaze imyaka myinshi byugarije igihugu. Iri huriro rivuga ko uburyo igihugu kiyobowemo kugeza ubu butabashije gukemura ibibazo by’ibanze byugarije abaturage, bityo hakaba hakenewe icyerekezo gishya n’imiyoborere mishya.
Ni muri urwo rwego AFC/M23 yatangaje ko yahisemo gushyira imbere ihame rya “Ordo ab Chao”, interuro y’Ikilatini isobanura ngo “mu kajagari havuka gahunda nshya”.
Iyi mvugo imaze igihe kinini ikoreshwa mu mateka no muri filozofiya, aho isobanura uburyo ibihe birangwa n’ibibazo, imvururu cyangwa akajagari bishobora kuvamo impinduka zikomeye zitanga icyerekezo gishya cy’ubuzima cyangwa cy’imiyoborere.
Nk’uko AFC/M23 ibivuga, “Ordo ab Chao” ni yo nkingi y’icyerekezo cya politiki ishaka guha Repubulika Iharanira Demokarasi ya Congo. Iri huriro rivuga ko intego yaryo ari ukubaka igihugu gishingiye ku butabera, ubwuzuzanye bw’abaturage bose, kubazwa inshingano kw’abayobozi ndetse n’ubumwe bw’igihugu.
AFC/M23 ivuga ko muri iyo gahunda nshya amategeko ari yo azaba ari hejuru ya bose kandi ko igihugu kitazongera kuyoborwa hashingiwe ku mbaraga za gisirikare cyangwa ku nyungu z’agatsiko k’abanyapolitiki. Ivuga kandi ko buri muturage azaba afite uburenganzira bungana imbere y’amategeko kandi ko inzego z’ubuyobozi zizabazwa inshingano ku byo zikora.
Iri huriro ryongeye gushimangira ko rizakomeza kurinda abasivili n’imitungo yabo mu bice rigenzura, ndetse ko rizakomeza guharanira ko igihugu cyose kigira ubuyobozi bushingiye ku mategeko, ku mucyo no ku nyungu rusange z’abaturage.
Mu butumwa bwaryo bwa nyuma, AFC/M23 yavuze ko “Ordo ab Chao” atari interuro gusa cyangwa amagambo ya politiki, ahubwo ko ari icyerekezo cyagutse kigamije gusubiza ku murongo Repubulika Iharanira Demokarasi ya Congo no kongera guha abaturage icyizere cy’ejo hazaza gishingiye ku mahoro, ubutabera, uburinganire n’ubumwe bw’igihugu.
Mu gihe impande zitandukanye zikomeje gutanga ibitekerezo bitandukanye ku hazaza h’igihugu, gahunda ya “Ordo ab Chao” ishobora kuba imwe mu ngingo zizakomeza kugibwaho impaka mu rwego rwa politiki ya Congo mu minsi iri imbere, cyane cyane mu gihe ikibazo cy’umutekano n’ibiganiro by’amahoro bikomeje kuba bimwe mu bibazo bikomeye igihugu gihanganye na byo.
Tubibutse ko mushobora gukomeza kudukurikirana ku mbuga nkoranyambaga.
Kanda hano udukurikirane kuri Facebook, Hano udukurikirane kuri WhatsApp
