Amakuru amaze iminsi acicikana mu banyamakuru, abasesenguzi ba politiki ndetse no ku mbuga nkoranyambaga aravuga ku rugendo rwihariye rwa Jean-Luc Habyarimana, umuhungu Juvénal Habyarimana wari Perezida wa Repubulika y’u Rwanda mbere ya Jenoside yakorewe Abatutsi mu 1994, wagiriye uruzinduko mu Burundi ndetse bikavugwa ko rwahuriranye n’ibikorwa by’inzego z’ubutasi za Repubulika Iharanira Demokarasi ya Congo.
Iyi ngingo yakuruye impaka nyinshi kubera uburyo ihurirana n’ibihe akarere k’Ibiyaga Bigari karimo, aho ikibazo cy’umutekano muke mu burasirazuba bwa RDC gikomeje kuba kimwe mu bibazo bikomeye bihangayikishije ibihugu by’akarere.
Amakuru asesengurwa n’ibitangazamakuru bitandukanye byo mu karere agaragaza ko uru ruzinduko rutarebwa nk’urusanzwe. Ahubwo bamwe mu bakurikiranira hafi ibya politiki n’umutekano bavuga ko rushobora kuba rufite aho ruhuriye n’imigambi minini y’ubufatanye hagati y’inzego zimwe z’umutekano zo muri RDC n’iz’u Burundi.
Jean-Luc Habyarimana ni umwe mu bantu bakomeje kuvugwa kenshi mu bibazo bifitanye isano n’amateka ya politiki y’u Rwanda. Nubwo atari umuyobozi wa gisirikare cyangwa umunyapolitiki ukomeye ufite ubushobozi bwo kuyobora umutwe runaka, izina rye rikomeje kugira uburemere mu bantu bamwe bagendera ku mateka y’uwahoze ayobora u Rwanda mbere ya Jenoside yakorewe Abatutsi mu 1994.
Abasesenguzi bamwe bavuga ko kuba yaragaragaye mu rugendo rwavuzweho byinshi mu Burundi bishobora gusobanurwa nk’ikimenyetso cy’uko hari impinduka zishobora kuba ziri kuba mu mikoranire y’ibihugu bimwe byo mu karere.
Aya makuru anahurirana n’ubufatanye bumaze igihe hagati ya FARDC n’Ingabo z’u Burundi zikorera mu burasirazuba bwa RDC. Mu myaka yashize, u Burundi bwohereje ingabo muri DRC mu rwego rwo gufasha ibikorwa byo kurwanya imitwe yitwaje intwaro ikorera muri ako gace.
Ni muri urwo rwego amakuru avuga ko uruzinduko rwa Jean-Luc Habyarimana rwahuriranye n’inama n’ibiganiro bivugwaho kuba byarimo bamwe mu bayobozi b’inzego z’umutekano n’ubutasi muri RDC no mu Burundi.
Hari kandi amakuru yakunze kuvugwa n’ibitangazamakuru byo mu karere agaragaza ko mu duce twa Pinga na Walikale habaye ibiganiro byahuzaga abantu batandukanye bafite aho bahuriye n’ibibazo by’umutekano mu karere. Nubwo amakuru menshi kuri izo nama atigeze yemezwa ku mugaragaro, yakomeje kuvugwaho cyane mu bitangazamakuru bikurikirana iby’umutekano n’intambara zo mu burasirazuba bwa Congo.
Abasesenguzi bamwe bavuga ko izina rya Habyarimana rishobora kuba rikoreshwa nk’ikimenyetso gishobora guhuza abantu bafite amateka cyangwa inyungu zimwe muri politiki yo kwibasira u Rwanda. Ni muri urwo rwego bamwe bavuga ko ashobora kuba afatwa nk’ikiraro hagati y’impande zitandukanye zifite inyungu mu bibazo by’umutekano bikomeje kuvugwa muri DRC.
Ibi kandi bibaye mu gihe umubano hagati ya Kigali na Kinshasa ukomeje kugibwaho impaka kubera ibibazo by’umutekano muke mu burasirazuba bwa Congo ndetse n’ibirego byagiye bitangirwa impande zombi.
Ku rundi ruhande, ubuyobozi bwa Perezida Évariste Ndayishimiye bwakomeje gushimangira ubufatanye bwa gisirikare hagati y’u Burundi na DRC. Mu mezi ashize habaye inama zitandukanye zahuje abayobozi bakuru ba gisirikare ndetse n’abaminisitiri b’Ingabo b’ibihugu byombi hagamijwe kunoza ibikorwa by’umutekano ku mipaka no mu burasirazuba bwa Congo.
Ibi byose bituma uruzinduko rwa Jean-Luc Habyarimana rwongera kwibazwaho cyane n’abakurikirana ibibera mu karere. Icyakora kugeza ubu nta tangazo riratangazwa n’impande zose zivugwa muri aya makuru risobanura ku buryo burambuye intego y’uru ruzinduko cyangwa ibyo rwagezeho.
Tubibutse ko mushobora gukomeza kudukurikirana ku mbuga nkoranyambaga.
Kanda hano udukurikirane kuri Facebook, Hano udukurikirane kuri WhatsApp
