Amakuru akomeje guturuka mu misozi ya Minembwe muri Kivu y’Amajyepfo arerekana ubukana bw’imirwano imaze iminsi ihanganishije ihuriro ry’ingabo za Leta ya Repubulika Iharanira Demokarasi ya Congo (FARDC) rifatanyije n’ingabo z’u Burundi (FDNB), hamwe na Twirwaneho iri mu bufatanye n’ihuriro rya AFC/M23.
Inkuru zituruka mu binyamakuru bitandukanye byo mu karere ndetse n’abasesenguzi bakurikiranira hafi ibibera ku rugamba, zigaragaza ko mu cyumweru kimwe gusa ingabo z’u Burundi zaba zaratakaje abasirikare bagera kuri 235.
Nubwo aya makuru ataremezwa ku mugaragaro n’ubuyobozi bw’u Burundi cyangwa ubwa FDNB, akomeje gukwirakwira mu gihe imirwano ikomeje gufata indi ntera muri ako gace.
Minembwe, imyaka myinshi imaze iri mu bice byakunze kurangwa n’umutekano muke, yongeye kuba imwe mu ngingo zikomeye z’intambara iri kubera mu burasirazuba bwa RDC.
Mu byumweru bishize, ingabo z’u Burundi zongereye umubare w’abasirikare boherezwa muri aka gace nyuma yo kunyura mu nzira ya Bibokoboko berekeza ku birindiro bitandukanye byo muri Minembwe.
Icyo gikorwa cyari kigamije gufasha FARDC kongera kugenzura ibice byari bimaze igihe bivugwamo ibikorwa by’imitwe irwanya ubutegetsi bwa Kinshasa. Icyakora, imiterere y’ako karere igizwe n’imisozi miremire, ibibaya byimbitse n’inzira zigoranye byatumye ibikorwa bya gisirikare biba ingorabahizi.
Amakuru aturuka ku rugamba avuga ko Twirwaneho ifatanyije na AFC/M23 yakoresheje uburyo bwo kugaba ibitero byihuse no gukoresha ubumenyi bw’akarere kugira ngo ibashe guhangana n’ingabo zari zoherejweyo.
Abakurikirana iyi ntambara bavuga ko ubu buryo bwatumye hari ibirindiro byinshi byagabweho ibitero bikomeye ndetse hakabaho n’ibico byahitanye abasirikare benshi.
By’umwihariko, amakuru atandukanye agaragaza ko imwe mu mpamvu nyamukuru zateye igihombo gikomeye ku ngabo z’u Burundi ari ugukomanyirizwa mu nzira zihuza Minembwe na Uvira. Aho ni hamwe mu hantu hafatwa nk’ingirakamaro mu kugenzura urujya n’uruza rw’ibikoresho bya gisirikare ndetse n’ingabo zoherezwa ku rugamba.
Abasesenguzi bavuga ko iyo imihanda nk’iyo idafite umutekano, ibikorwa byo gutanga ubufasha ku ngabo ziri imbere ku rugamba birushaho kugorana, bikaba byagira ingaruka ku mikorere yazo ndetse n’ubushobozi bwo guhangana n’umwanzi.
Iki gihombo kivugwa cy’abasirikare 235 cyongeye kuvugisha benshi mu Burundi, cyane cyane mu gihe igihugu gikomeje kugira uruhare rugaragara mu bikorwa bya gisirikare muri RDC kuva mu mwaka wa 2023.
Nubwo ubuyobozi bw’u Burundi bwakomeje gushimangira ko ibikorwa byabwo bigamije kurinda umutekano w’akarere no kurwanya imitwe yitwaje intwaro ibangamira umutekano, hari amajwi akomeje kwibaza ku ngaruka z’iyi ntambara ku gihugu.
Amakuru aturuka mu nzego zitandukanye avuga ko ikibazo cyo gutoroka igisirikare cyakomeje kugaragara mu ngabo z’u Burundi.
Hari raporo zerekana ko bamwe mu basirikare bagaragaza impungenge zo koherezwa ku rugamba rwo muri RDC, ibintu byatumye hafatwa ingamba zitandukanye zigamije gukaza igenzura ku basirikare.
Muri uwo murongo, amakuru yagiye atangazwa mu mezi ashize yavugaga ko hari ibyemezo byafashwe birimo kugenzura cyane inyandiko z’inzira z’abasirikare kugira ngo hagabanywe umubare w’abava mu gisirikare cyangwa abatorokera mu mahanga.
Hari kandi amakuru avuga ko mu nzego zimwe z’abasirikare bakuru hakomeje kuvugwa ibitekerezo bitandukanye ku cyemezo cyo gukomeza kohereza ingabo muri RDC, nubwo nta rwego rwa Leta rwigeze rutangaza ku mugaragaro ko habayeho kutavuga rumwe ku miyoborere y’iyi ntambara.
Kugeza ubu, ubuyobozi bw’u Burundi n’ubw’ingabo zabwo ntiburatangaza umubare nyawo w’abasirikare baba baraguye muri iyi mirwano. Nk’uko byagiye bigaragara mu bihe byashize, amakuru yerekeye igihombo cya gisirikare akenshi akomeza kuba ibanga rikomeye.
Mu gihe imirwano ikomeje muri Minembwe no mu bindi bice bya Kivu y’Amajyepfo, amaso y’abatuye akarere ndetse n’abakurikiranira hafi politiki n’umutekano byo mu Karere k’Ibiyaga Bigari akomeje kureba uko ibintu bizagenda mu minsi iri imbere.
Abasesenguzi benshi bemeza ko ibibera muri Minembwe bishobora kugira uruhare rukomeye mu guhindura ishusho y’urugamba rwose rwo mu burasirazuba bwa RDC.
Tubibutse ko mushobora gukomeza kudukurikirana ku mbuga nkoranyambaga.
Kanda hano udukurikirane kuri Facebook, Hano udukurikirane kuri WhatsApp
