Impagarara n’ubwoba bikomeje gufata intera mu bice bya Gurupoma ya Ikobo muri Teritwari ya Walikale, nyuma y’aho umuyobozi mushya w’umudugudu wa Kateku yishwe mu buryo bwateye ubwoba nyuma y’igihe gito cyane ahawe inshingano n’ihuriro AFC/M23.
Amakuru aturuka mu gace ka Iremya muri Gurupoma ya Ikobo avuga ko uwo muyobozi yiciwe iwe mu rugo mu ijoro ryo ku wa Gatatu tariki ya 13 Gicurasi 2026, aho yagabweho igitero n’abarwanyi ba Wazalendo bakorana n’ingabo za FARDC.
Abaturage bo muri ako gace bavuga ko abagabye icyo gitero bageze iwe nijoro, bamusanga mu rugo rwe imbere y’umugore n’abana be, maze bamurasa amasasu menshi mbere yo guhita bahungira mu bihuru bikikije uwo mudugudu.
Amakuru yatangajwe n’abari hafi y’aho byabereye avuga ko uburyo uwo muyobozi yishwemo bugaragaza ko yari yagabweho igitero cyateguwe mbere kandi kigamije kumwivugana nta mahirwe yo kurokoka.
Uyu mugabo yari amaze amasaha atarenze 48 gusa ashyizwe ku buyobozi bwa Kateku na AFC/M23 nyuma y’uko iri huriro rifashe ibice bya Gurupoma ya Ikobo rikahashyira ubuyobozi bushya mu rwego rwo gukomeza kugenzura ako karere.
Abasesenguzi ndetse n’abaturage bakurikiranira hafi ibibera muri Walikale bavuga ko ubwo bwicanyi bushobora kuba bufitanye isano n’amakimbirane ashingiye ku buyobozi ndetse no guhatanira kugenzura uturere turi hagati y’impande zihanganye muri Kivu y’Amajyaruguru.
Hari abaturage bavuga ko icyo gitero cyari ubutumwa bwari bugenewe AFC/M23, cyane cyane nyuma y’uko iri huriro ritangiye gushyiraho abayobozi bashya mu bice ryigaruriye.
Umwe mu batuye muri Ikobo yavuze ko abaturage bafite ubwoba bwinshi kuko ubwicanyi nk’ubwo bushobora gukomeza kwibasira abantu bose bakekwaho gukorana n’impande zihanganye.
Yagize ati: “Abantu bafite ubwoba bwinshi cyane. Kuba umuntu yicirwa iwe imbere y’umuryango we nyuma y’iminsi ibiri gusa ahawe inshingano, birerekana ko umutekano umeze nabi cyane.”
Andi makuru avuga ko nyuma yo kumwica, abagabye icyo gitero bahise baburirwa irengero mu mashyamba yo muri ako gace, ibintu byatumye abaturage bavuga ko umutekano ukomeje kuzamba umunsi ku munsi.
Urupfu rw’uyu muyobozi rubaye ubwa mbere muri Gurupoma ya Ikobo kuva AFC/M23 yafata icyo gice ikanatangira gushyiraho abayobozi b’inzego z’ibanze. Ibi bikomeje kongera impungenge z’uko ubushyamirane hagati ya AFC/M23, FARDC n’imitwe ya Wazalendo bushobora gukomeza gufata indi ntera muri Walikale ndetse no mu bindi bice bya Kivu y’Amajyaruguru.
Ku wa Kane tariki ya 14 Gicurasi 2026, umubiri wa nyakwigendera washyinguwe mu muhango waranzwe n’agahinda gakomeye n’icuraburindi. Abaturage benshi bitabiriye uwo muhango bavuga ko bababajwe n’uburyo ubwicanyi n’umutekano muke bikomeje gufata intera muri ako karere.
Amakuru yatangajwe na bamwe mu bakurikiranira hafi ibibera muri Walikale avuga ko impamvu nyakuri y’ubu bwicanyi itaramenyekana neza kugeza ubu, ariko benshi bakeka ko bifitanye isano n’intambara y’ubutegetsi n’ubugenzuzi bw’uturere iri kubera hagati y’impande zitandukanye zirwanira muri Kivu y’Amajyaruguru.
Mu gihe imirwano hagati ya AFC/M23, FARDC n’imitwe ya Wazalendo ikomeje mu bice byinshi byo muri Kivu y’Amajyaruguru, abaturage bakomeje kuba ab’imbere mu guhura n’ingaruka zirimo ubwicanyi, guhunga ibyabo, gutakaza imitungo ndetse no kubaho mu bwoba budashira.
Tubibutse ko mushobora gukomeza kudukurikirana ku mbuga nkoranyambaga.
Kanda hano udukurikirane kuri Facebook, Hano udukurikirane kuri WhatsApp
