Umugaba Mukuru w’Ingabo za AFC/M23 (ARC) akaba n’umuhuzabikorwa wa gisirikare muri iri huriro, Général-Major Sultani Makenga, yayoboye umuhango wo gusoza icyiciro cya kabiri cy’amahugurwa y’ingengabitekerezo agenewe abanyamuryango b’iri huriro bazwi nk’aba-Cadres, igikorwa cyabereye mu kigo cy’amahugurwa cya Kanombe giherereye muri Teritwari ya Rutshuru, ku wa Kane tariki ya 30 Mata.
Aya mahugurwa yiswe “Intake 002 Uongozi Bora”, yitabiriwe n’abantu 534 baturutse mu bice bitandukanye bigize Teritwari ya Rutshuru, birimo za Groupement, imijyi n’uduce tw’ubucuruzi.
Ni amahugurwa AFC/M23 ivuga ko yateguwe mu rwego rwo “gukomeza kubaka no gukomeza imiyoborere ya politiki n’iy’ubutegetsi bw’uyu mutwe”, hagamijwe gutegura abayobozi bafite umurongo uhamye mu mitekerereze n’imikorere.
Mu ijambo rye, Gen. Makenga yashimangiye ko ingengabitekerezo ari inkingi ya mwamba mu kubaka igisirikare n’imiyoborere bya politiki bifite icyerekezo.
Yagaragaje ko nta mpinduka irambye ishoboka hatabayeho abayobozi bafite imyumvire ihamye ku nshingano zabo, abibutsa ko bagomba kuba intangarugero mu baturage.
Yagize ati: “Mugomba guhora mugaragaza indangagaciro zirimo inshingano, ubunyangamugayo no kwegera abaturage mu kazi kanyu ka buri munsi.”
Yakomeje asobanura ko ibi ari ingenzi cyane “mu gihe igihugu kiri mu bihe by’intambara byatewe n’ubutegetsi bwa Kinshasa,” ashimangira ko uruhare rwabo ruzaba ingenzi mu guhindura uko ibintu bikorwa.
Umuvugizi wa AFC/M23, Lawrence Kanyuka, na we yagarutse ku kamaro k’aya mahugurwa, agaragaza ko ari intambwe ikomeye mu rugendo rwo kubaka ubuyobozi bufite ireme.
Yavuze ko iki gikorwa cyerekana ubushake bw’iri huriro bwo guteza imbere “imiyoborere ishingiye ku myitwarire myiza, ubumenyi bwa politiki n’ubwitange ku gihugu.”
AFC/M23 kandi yagaragaje ko umuhango wo gusoza aya mahugurwa ugaragaza “ubushake bwo gukomeza gushinga imizi mu bice igenzura no kuzamura abayobozi bashya b’aho, bashobora guteza imbere umushinga wa politiki uhamye, utandukanye n’imikorere yanenzwe y’ubutegetsi buriho i Kinshasa.”
Aba-Cadres barangije aya mahugurwa biyongereye ku bandi bayasoje mu cyumweru cyabanje, bikaba bigaragaza ko iri huriro rikomeje gushora imbaraga mu gutegura abayobozi benshi mu gihe gito.
Amakuru aturuka muri AFC/M23 agaragaza ko aba bayobozi bashya bagomba koherezwa mu bice bitandukanye igenzura ndetse n’aho iteganya kugera mu minsi iri imbere.
Ibi bikorwa by’amahugurwa byerekana icyerekezo AFC/M23 iri gushyiramo imbaraga mu kubaka inzego z’ubuyobozi zishingiye ku bumenyi n’ingengabitekerezo, mu gihe intambara n’impaka za politiki bikomeje gufata indi ntera mu burasirazuba bwa Repubulika Iharanira Demokarasi ya Congo.
Tubibutse ko mushobora gukomeza kudukurikirana ku mbuga nkoranyambaga.
Kanda hano udukurikirane kuri Facebook, Hano udukurikirane kuri WhatsApp
