Mu buzima busanzwe, abantu benshi babyuka buri gitondo bagana ku kazi bafite intego imwe: gushaka imibereho. Benshi bakora imirimo igoye, bakamaramo amasaha menshi kugira ngo babone amafaranga yo kubaho no kwiteza imbere.
Ariko mu gihe benshi bahanganye n’akazi katoroshye, hari abantu bake bashoboye kubona uburyo budasanzwe bwo kwinjiza amafaranga, nubwo buba busa n’aho nta kintu gikomeye bakora.
Umwe muri abo ni Shoji Morimoto, umugabo w’Umuyapani wahinduye igitekerezo cyoroshye cyane akakigira umushinga umwinjiriza amafaranga. Uyu mugabo w’imyaka 40 y’amavuko yamamaye ku isi kubera serivisi ye idasanzwe: abantu baramukodesha kugira ngo ajyane na bo aho bagiye, ariko nta kindi kintu bamwitezeho uretse kubana na bo.
Mu mwaka wa 2018 ni bwo Morimoto yatangije umushinga we wari ufite igitekerezo cyoroshye ariko gitangaje. Yise serivisi ye “Hire me to do nothing”, bisobanura ngo “nkodeshe kugira ngo nkore ubusa.”
Igitekerezo cye cyari uko umuntu ashobora kumuhamagara akamubwira aho agiye cyangwa icyo agiye gukora, hanyuma Morimoto akamuherekeza ariko nta bindi bikorwa agomba gukora. Ntamusaba kumuganiriza, kumufasha mu kazi cyangwa kumugira inama. Icyo akora gusa ni ukubana na we muri icyo gihe.
Nubwo byumvikana nk’igitekerezo kidasanzwe, cyahise gikundwa cyane mu Buyapani. Mu myaka mike gusa, Morimoto amaze gukodeshwa n’abantu barenga 4.000 bamusabye kubaherekeza mu bikorwa bitandukanye by’ubuzima bwa buri munsi.
Morimoto asobanura ko mbere y’icyorezo cya COVID-19, akazi ke kari kamaze kumuhesha amafaranga menshi kurusha uko abantu benshi babitekereza. Umuntu umwe wamukodeshaga yishyuraga amadolari agera kuri 68 kugira ngo amuherekeze mu gikorwa runaka.
Ibi byatumaga rimwe na rimwe ashobora kwinjiza arenga amadolari 300 ku munsi, ibintu byatumye umushinga we uba ubucuruzi buhamye nubwo ushingiye ku gitekerezo cyoroshye cyane.
Abamukodesha baba bafite impamvu zitandukanye. Hari abamusaba kubaherekeza mu gusangira, mu kugenda mu mujyi, cyangwa mu kugenda mu rugendo ruto. Hari n’abigeze kumusaba kubaherekeza mu bihe bikomeye by’ubuzima, urugero nko kujya gusinya impapuro za gatanya kugira ngo batiyumva bari bonyine.
Morimoto avuga ko abakiliya be benshi ari abantu badakunda kuvuga menshi. Baba bakeneye gusa umuntu wo kubana na we, atari uwo kuganiriza cyane cyangwa kubaza ibibazo byinshi.
Ibi ni byo bituma uburyo bwe bwo gukora bworoha. We ubwe yivuga nk’umuntu utuje kandi udakunda kuvuga menshi. Iyo myitwarire ye ni yo ihuza neza n’abamukodesha kuko na bo baba bakeneye umugenzi utabahutaza mu biganiro byinshi.
Mu by’ukuri, igitekerezo cye cyerekanye ko mu mijyi minini y’isi hari abantu benshi bahura n’ikibazo cy’irungu. Nubwo baba bafite akazi, inshuti cyangwa imiryango, hari igihe bakeneye gusa umuntu wo kubana na we mu gihe gito.
Nubwo Morimoto yemera guherekeza abantu mu bikorwa byinshi bitandukanye, hari ibyo yanga gukora. Yatangaje ko adashobora guherekeza abantu bagiye kuryamana cyangwa mu bikorwa bidasobanutse.
Hari kandi ibindi bikorwa adakunda nko kujya mu bitaramo cyangwa mu bintu bisaba urusaku rwinshi. Ahitamo ibikorwa byoroshye aho ashobora kubana n’umukiliya mu ituze.
Shoji Morimoto, w’imyaka 41 ukomoka mu Buyapani, yinjiza hafi $80.000 ku mwaka ni ukuvuga arenga miliyoni 100 Frw.
Morimoto asobanura ko igitekerezo cyose cyaturutse ku kintu cyoroshye: akunda kubana n’abantu. Nubwo atavuga menshi, kumarana igihe ari kumwe n’abandi biramushimisha.
Yabonye ko hari abantu benshi bakeneye uwo mwanya, maze atekereza uburyo bwo kuwubyaza umusaruro. Icyatangaje benshi ni uko igitekerezo cyari gito cyaje guhinduka ubucuruzi bukomeye.
Mu ntangiriro z’umwaka wa 2025, Morimoto yatangaje impinduka nshya mu buryo akora akazi ke. Yavuze ko azajya atanga serivisi ze ku buntu benshi.
Icyakora, abakiliya bazajya bamwishyurira amafaranga yakoresheje mu ngendo cyangwa mu byo kurya igihe bari kumwe. Uyu mwanzuro wafashwe nyuma y’imyaka myinshi akora uwo murimo, kandi bigaragaza ko akomeza gushimishwa cyane no kubana n’abantu kurusha inyungu z’amafaranga gusa.
Tubibutse ko mushobora gukomeza kudukurikirana ku mbuga nkoranyambaga.
Kanda hano udukurikirane kuri Facebook, Hano udukurikirane kuri WhatsApp
