Guverinoma y’u Rwanda yatangaje ko amafaranga igihugu gishyira mu bikorwa byo kurwanya iterabwoba mu Ntara ya Cabo Delgado muri Mozambique arenga inshuro 10 inkunga itangwa n’Umuryango w’Ubumwe bw’u Burayi, ibintu byongeye gutuma hibazwa ku hazaza h’ubu butumwa bw’umutekano mu gihe hari impinduka ziri mu mikoranire mpuzamahanga.
Umuvugizi wa Guverinoma y’u Rwanda, Yolande Makolo, yavuze ko inkunga ya miliyoni 20 z’Amayero Ingabo z’u Rwanda zahawe binyuze mu kigega cya European Peace Facility yamaze gukoreshwa, ariko ko amafaranga igihugu cyashoye muri ubwo butumwa ari menshi cyane kurusha ayo.
Yagize ati: “Usibye amafaranga menshi u Rwanda rushora muri ubu butumwa, hari n’ukwitanga kudasanzwe kw’abasirikare bacu bamwe bahasiga ubuzima.”
Aya makuru yagarutsweho nyuma y’inkuru y’ikinyamakuru Bloomberg ivuga ko amasezerano y’inkunga yatanzwe n’Umuryango w’Ubumwe bw’u Burayi azarangira muri Gicurasi 2026.
Iyo nkunga ya miliyoni 20 z’Amayero yemejwe n’abaminisitiri b’ububanyi n’amahanga b’ibihugu bigize Umuryango w’Ubumwe bw’u Burayi mu nama yabereye i Brussels ku wa 18 Ugushyingo 2024.
Yari ikurikiye indi nkunga ingana na miliyoni 20 z’Amayero yatanzwe mu Ukuboza 2022, nyuma y’uko Ingabo z’u Rwanda zitangiye ubutumwa bwo gufasha guhashya ibyihebe mu Ntara ya Cabo Delgado.
Ariko amakuru mashya agaragaza ko nta gahunda iriho yo kongera ayo masezerano, mu gihe Umuryango w’Ubumwe bw’u Burayi uvuga ko uri gusuzuma ingaruka z’ibihano biherutse gufatirwa Ingabo z’u Rwanda.
Ku wa 2 Werurwe 2026, Leta Zunze Ubumwe za Amerika zatangaje ibihano ku buyobozi bw’Ingabo z’u Rwanda, RDF, zibushinja ubufatanye n’umutwe wa M23 mu burasirazuba bwa Repubulika Iharanira Demokarasi ya Congo.
U Rwanda rwahakanye kenshi ibyo birego, ruvuga ko ari ibirego bya politiki bidafite ibimenyetso.
Umuvugizi w’Umuryango w’Ubumwe bw’u Burayi yavuze ko bari gukurikirana neza ingaruka z’izo ngamba za Amerika ku mikoranire n’u Rwanda mu bikorwa by’umutekano.
Makolo yasobanuye ko Ingabo z’u Rwanda zagiye muri Cabo Delgado mu 2021 zibisabwe na leta ya Mozambique, kandi ko intego nyamukuru yari ugufasha igihugu cy’inshuti mu guhangana n’iterabwoba.
Ati: “Ingabo z’u Rwanda zagiye muri Cabo Delgado zibisabwe na leta ya Mozambique. Amafaranga si yo yari igitekerezo cya mbere.”
Yongeyeho ko umusaruro w’ubu butumwa umaze kugaragara mu buryo bufatika, kuko abaturage benshi basubiye mu byabo, ibikorwa by’ubucuruzi byongeye gufungura, ndetse n’abana basubira ku ishuri.
Abasesenguzi bavuga ko ibikorwa by’Ingabo z’u Rwanda byagize uruhare runini mu kongera umutekano mu gace kari karibasiwe n’ibyihebe, bigafasha n’imishinga minini y’ishoramari kongera gukora.
Intara ya Cabo Delgado ifite ubukungu bukomeye bwa gaz, aho kompanyi y’Abafaransa TotalEnergies iyoboye umushinga munini wo gucukura no kohereza gaze mu mahanga ufite agaciro ka miliyari 20 z’amadolari.
Uyu mushinga unashyigikiwe na banki ya Amerika Export-Import Bank of the United States yashoyemo miliyari 4.7 z’amadolari.
Umushakashatsi mukuru mu kigo Foundation for Defense of Democracies i Washington, Daniel Swift, yavuze ko bishoboka ko Amerika idashaka ko ibihano yafatiye Ingabo z’u Rwanda byabangamira cyane ibikorwa by’ubukungu biri muri Mozambique.
Yagize ati: “Nta muntu wifuza ko imishinga ikomeye y’ishoramari rya Amerika mu gace gakungahaye kuri gaz yangirika kubera ibibazo bya politiki.”
Mu butumwa bwe, Makolo yagaragaje ko niba ibikorwa by’Ingabo z’u Rwanda muri Cabo Delgado bitabonwa nk’ingenzi cyangwa bidahabwa agaciro, byaba byiza ko hashyirwaho ibiganiro byo gusuzuma niba ayo masezerano yakomeza.
Yagize ati: “Niba ubuyobozi bwa RDF bwabona ko ibikorwa by’umutekano u Rwanda rukorera muri Cabo Delgado bidashimwa, byaba byiza gusaba leta guhagarika amasezerano y’impande zombi yo kurwanya iterabwoba, Ingabo zikava yo.”
Ibi bivuze ko ahazaza h’ubu butumwa bushobora guterwa n’ibiganiro bizahuza ibihugu birebwa n’iki kibazo, cyane cyane mu gihe umutekano w’akarere, inyungu z’ubukungu n’imikoranire mpuzamahanga bikomeje guhura mu buryo bukomeye.
Mu gihe ibihugu byinshi bikomeje guhangayikishwa n’iterabwoba mu karere ka Afurika y’Iburasirazuba n’Amajyepfo, uruhare rw’u Rwanda muri Cabo Delgado rukomeje kuba kimwe mu bikorwa bikomeye by’umutekano byashyizwe imbere mu myaka yashize.
Tubibutse ko mushobora gukomeza kudukurikirana ku mbuga nkoranyambaga.
Kanda hano udukurikirane kuri Facebook, Hano udukurikirane kuri WhatsApp
