Urupfu rwa Patrick Mwangi w’imyaka 28 na Jackline Wambui w’imyaka 25, bo mu gace ka Nyerere muri Kenya, rukomeje gutera urujijo nyuma y’uko bombi basanzwe bapfuye hashize amasaha atatu gusa batangiye kubana nk’umugabo n’umugore.
Ibyavuye mu isuzuma ry’imirambo byagaragaje ko bombi bapfuye bazize kubura umwuka, bikekwa ko byatewe no kunigwa. Polisi iri gukurikirana impamvu n’uko urupfu rwabo rwabaye, mu gihe hakomeje gusuzumwa niba umwe muri bo yaba yarishe undi mbere yo kwiyahura.
Polisi iri gukurikirana uko urupfu rwabaye
Umuyobozi wa Polisi mu Ntara ya Murang’a, Cleti Kimaiyo, yavuze ko ibimenyetso bya mbere by’iperereza byerekana ko bishoboka ko umwe muri abo bombi yaba yarahitanye mugenzi we, nyuma akiyambura ubuzima.
Kimaiyo ariko yanavuze ko iperereza ritararangira, bityo ko Polisi ikomeje kureba n’izindi mpamvu zishobora kuba zaragize uruhare muri urwo rupfu.
Abaganga babitse ibipimo by’amaraso by’abitabye Imana kugira ngo hakorwe ibindi bizamini. Ibyo bizamini bizafasha kumenya niba inzoga cyangwa ibindi bintu byaba byaragize uruhare mu byabaye.
Bagarutse mu rugo batinze
Ku mugoroba wo ku wa 9 Kanama 2026, Wambui yageze kwa Mwangi ahagana saa kumi z’umugoroba, aho yari aje gutangirira ubuzima bushya nyuma y’imyaka hafi itatu bakundana.
Nyuma yo kugera mu rugo, bombi bavuye mu rugo bari kuri moto ya Mwangi bajya kwizihiza intangiriro y’ubuzima bari batangiye. Bagarutse ahagana saa moya z’umugoroba, ariko mu gihe kitageze ku isaha imwe nyuma yaho bombi bari bamaze gupfa.
Ku munsi w’urupfu rwabo, amakuru avuga ko bari banyuze mu tubari two muri Maragua na Gakoigo ndetse bakanasura bamwe mu bagize umuryango wa Mwangi mbere yo gusubira mu rugo.
Umubano wabo wari umaze imyaka hafi itatu
Nubwo Mwangi na Wambui bari bamaze igihe bakundana, imiryango yabo ivuga ko umubano wabo waranzwe n’amakimbirane, gutandukana no kongera kwiyunga.
Nyina wa Mwangi, Bilha Wangare, yavuze ko yari yaragiye agira uruhare mu biganiro byo kubunga inshuro nyinshi. Yavuze ko ibibazo byabo byibandaga ku mafaranga, telefoni, imibanire n’imiryango ndetse no kutizerana.
Mwangi yakoraga akazi ko gutwara abantu kuri moto, mu gihe Wambui yakoraga imirimo inyuranye yabonaga.
Impaka ku mafaranga n’imitungo
Mwangi yari yarigeze gushinja Wambui kumutwarira amafaranga agera ku bihumbi 100 by’amashilingi ya Kenya.
Ku rundi ruhande, Wambui yasabaga Mwangi kumuha ibyangombwa bya moto ye ndetse n’icyemezo cy’ubutaka bungana na acre 0,1 yari yaraguze i Makuyu muri Maragua.
Hari kandi kutumvikana ku mafaranga Mwangi yahaga ababyeyi be. Wambui yashinjaga mugenzi we kwita ku babyeyi be kurusha uko yitaga ku mubano wabo.
Inama yo kubunga yabaye mbere y’urupfu
Ku wa 4 Kanama, Wangare yateguye inama yo kugerageza gukemura amakimbirane yari hagati y’abo bakundana.
Muri iyo nama, Mwangi yavuze ko yifuzaga ko Wambui yabanza kumubyarira mbere y’uko batangira kubana burundu, mu gihe Wambui yakomeje gusaba ibyangombwa by’imitungo ya Mwangi.
Amaherezo bumvikanye ko Mwangi azafasha Wambui gutangiza ubucuruzi ku isoko rya Irembu, na we akemera ko batangira guteganya kubyara.
Nyuma y’iyo nama, Mwangi yahaye nyina ibyangombwa bya moto n’iby’ubutaka ngo abibike, avuga ko atari yizeye Wambui.
Ku wa 6 Kanama, Wambui yahamagaye Wangare amubwira ko yafashe umwanzuro wo kujya kubana na Mwangi. Yavuze ko yari kwimukira iwe ku wa 9 Kanama, ari na wo munsi yagezeyo.
Amasaha ya nyuma y’abari batangiye ubuzima bushya
Nyuma yo gusubira mu rugo ahagana saa moya z’umugoroba, Wangare yavuze ko Wambui yasaga n’uwasinziriye cyane kandi ananiwe, mu gihe Mwangi na we yasaga n’uwanyoye inzoga.
Mbere yo gusubira iwe, Mwangi yagiye gusura ababyeyi n’abavandimwe be, aganira na buri wese. Nyina yavuze ko uburyo yabasuye bwatumye nyuma abifata nk’aho umuhungu we yari arimo kubasezeraho.
Mwangi kandi yabwiye nyina ko Wambui yari yashyize ku mbuga nkoranyambaga ifoto y’undi mugabo ndetse akamwoherereza iyo foto, amubwira ko natamufata neza yari kuzamuta akajya kuri uwo mugabo.
Tubibutse ko mushobora gukomeza kudukurikirana ku mbuga nkoranyambaga.
Kanda hano udukurikirane kuri Facebook, Hano udukurikirane kuri WhatsApp
