Iperereza riracyakomeje ku kibazo cyatumye umunyamakuru wa siporo Sadi Habimana afungwa nyuma y’ibyabereye kuri Stade ubwo hasozwaga shampiyona y’icyiciro cya mbere mu Rwanda.
Sadi Habimana, umaze imyaka azwi mu itangazamakuru rya siporo mu Rwanda, ari mu maboko ya Polisi kuva ku wa Gatanu tariki ya 29 Gicurasi 2026, nyuma y’ibkorwa byabereye kuri Stade mu mukino wahuje Rayon Sports na Kiyovu Sports.
Uyu mukino warangiye amakipe yombi anganyije igitego 1-1, umusaruro watumye Rayon Sports irangiza shampiyona iri ku mwanya wa kane ndetse inabona amahirwe yo kuzaserukira igihugu mu mikino ya CAF Confederation Cup.
Amakuru aturuka ku bari hafi y’aho byabereye avuga ko ikibazo cyatangiye mu gihe umukino wari ugikomeje. Sadi Habimana ngo yifuzaga kugera mu gice cyari cyagenewe abanyamakuru kugira ngo afate telefone ye yari yasize muri ako gace.
Ubwo yageraga ku muryango winjira muri icyo gice, umukozi ushinzwe umutekano yamusabye kutinjira. Icyo cyemezo cyateje kutumvikana hagati y’impande zombi, impaka zirushaho gukomera uko iminota yagendaga ishira.
Abari aho bavuga ko muri uko guterana amagambo habayeho gusunikana, aho bivugwa ko Sadi Habimana yasunitse uwo mukobwa wari ushinzwe umutekano. Nyuma y’ako kanya, uwo mukozi yahise yitabaza inzego z’umutekano zari hafi aho zirimo Polisi y’u Rwanda.
Polisi yahise ifata Sadi Habimana imujyana kugira ngo hakorwe iperereza ku byabaye. Kuva icyo gihe kugeza ubu, amakuru ahari agaragaza ko agifungiye kuri Sitasiyo ya Polisi ya Rwezamenyo mu Karere ka Nyarugenge.
Mu bisobanuro yatanze nyuma yo gufatwa, Sadi Habimana yavuze ko nta mugambi yari afite wo kugirira nabi cyangwa kubangamira uwo mukozi ushinzwe umutekano. Yagaragaje ko ibyabaye byaturutse ku kutumvikana kwabaye muri uwo mwanya, aho buri ruhande rwari ruhangayikishijwe n’inshingano zarwo.
Ku ruhande rw’uwo mukobwa wari ushinzwe umutekano, yatangaje ko ibyabaye byamuhungabanyije kandi bikamugiraho ingaruka. Yavuze ko nyuma y’icyo gikorwa yumvise ububabare mu gatuza, bituma asaba ko ikibazo cyakurikiranwa n’inzego zibishinzwe.
Mu rwego rwo gukomeza iperereza, Polisi yasabye ko hatangwa ibyangombwa bya muganga bishobora kugaragaza niba koko hari ikibazo cy’ubuzima cyatewe n’ibyabaye. Ibyo bizafasha mu gusuzuma neza imiterere y’ikirego ndetse n’inzira amategeko azafata muri uru rubanza.
Kugeza ubu nta mwanzuro wa nyuma uratangazwa n’inzego zibishinzwe, ndetse iperereza rikomeje kugira ngo hamenyekane ukuri ku byabaye hagati y’impande zombi.
Sadi Habimana ni umwe mu banyamakuru bazwi mu rwego rwa siporo mu Rwanda. Mu rugendo rwe rw’itangazamakuru yakoreye ibitangazamakuru bitandukanye birimo Umuseke, BTN TV na B+, aho yakurikiranye amakuru menshi ya siporo yo mu Rwanda no hanze yarwo.
Ifungwa rye ryakuruye impaka n’ibitekerezo bitandukanye ku mbuga nkoranyambaga, aho bamwe basaba ko hakorwa iperereza ryimbitse kandi ridafite aho ribogamiye kugira ngo hamenyekane neza ibyabaye, mu gihe abandi bibutsa ko kubaha amabwiriza y’umutekano ari inshingano za buri wese uri ahabera ibikorwa rusange.
Mu gihe iperereza rikomeje, amaso y’abakunzi ba siporo, abanyamakuru n’abakurikiranira hafi ibijyanye n’ubutabera akomeje kureba icyo inzego zibishinzwe zizatangaza ku byabereye kuri Stade ku munsi wasozaga shampiyona, ibyatumye umwe mu banyamakuru bazwi cyane mu Rwanda asanga ari mu maboko y’amategeko.
Tubibutse ko mushobora gukomeza kudukurikirana ku mbuga nkoranyambaga.
Kanda hano udukurikirane kuri Facebook, Hano udukurikirane kuri WhatsApp
