Inkuru zari zimaze iminsi zicicikana mu Burasirazuba bwa Repubulika Iharanira Demokarasi ya Congo ku rupfu rwa Général autoproclamé Byamungu Ruduga Addallah zamaze gufata indi ntera nyuma y’uko byemejwe ku mugaragaro ko uyu muyobozi ukomeye wa Wazalendo yapfuye azize igitero cya drone cyabereye i Luvungi mu Kibaya cya Rusizi.
Amakuru y’urupfu rwe yemejwe mu muhango wo kumushyingura wabereye i Kigongo muri teritware ya Uvira, aho abarwanyi ba Wazalendo, abayobozi b’iyo mitwe ndetse n’abaturage benshi bamuherekeje bwa nyuma.
Muri uwo muhango, bamwe mu barwanyi bakoranaga na we bamwise “intwari yaguye ku rugamba,” bavuga ko yari afite uruhare rukomeye mu guhuza no kuyobora imitwe ya Wazalendo ikorera muri Kivu y’Amajyepfo.
Abatanze ubuhamya muri uwo muhango bavuze ko Général Byamungu yarashwe na drone mu gihe yari mu bikorwa byo guhuza no gutunganya imitwe ya Wazalendo ikorera mu duce twa Luvungi n’ahandi mu Kibaya cya Rusizi.
Nubwo amakuru y’urupfu rwe yari amaze igihe avugwa cyane ku mbuga nkoranyambaga no mu baturage, kugeza igihe yashyingurwaga ni bwo benshi babyemeje nk’amakuru yizewe.
Urupfu rwa Byamungu ruje mu gihe ibikorwa bya gisirikare bikomeje gukaza umurego mu bice bya Uvira, Fizi na Mwenga, aho imitwe yitwaje intwaro ikomeje guhangana n’imitwe yitwara gisirikare ndetse n’ingabo za Leta ya Congo.
Général Byamungu yari umwe mu bayobozi bazwi cyane muri Wazalendo kubera uruhare rwe mu gushaka gushyira ku murongo iyo mitwe y’abaturage bavuga ko ihagurukiye kurwanya indi mitwe irimo MRDP-Twirwaneho, M23 n’indi ikorera mu Burasirazuba bwa Congo.
Mu bice byinshi bya Kivu y’Amajyepfo, bamwe mu bamushyigikiye bamubonaga nk’umuntu washakaga guhuriza hamwe imitwe itandukanye ya Wazalendo kugira ngo ikore nk’urwego rumwe rufite umurongo uhamye.
Hari abamushimaga bavuga ko yashoboye gukangurira urubyiruko rw’Abapfulero n’Ababembe kwinjira muri iyo mitwe no gufata intwaro kugira ngo barwane mu byo bise kurengera igihugu n’uturere twabo.
Gusa nubwo hari abamubonaga nk’umurinzi w’abaturage, ibikorwa bya Wazalendo bikomeje kuvugwaho byinshi bikomeye. Imiryango iharanira uburenganzira bwa muntu hamwe n’abaturage bo mu Burasirazuba bwa Congo bakomeje gushinja abarwanyi ba Wazalendo ibikorwa birimo kunyaga abaturage, gusahura imitungo, kwica abasivile no guteza umutekano muke mu bice bagenzura.
Ibi byatumye amateka ya Général Byamungu asiga ibitekerezo bivuguruzanya hagati y’abamufata nk’umuntu waharaniye guhuza abaturage mu rugamba rwitwaje intwaro n’abamushinja kugira uruhare mu bikorwa byatumye umutekano urushaho kuzamba muri Kivu y’Amajyepfo.
Abasesenguzi bavuga ko urupfu rwa Byamungu rushobora kugira ingaruka zikomeye ku mikorere ya Wazalendo muri teritware za Uvira na Fizi, cyane cyane kubera uburyo yari amaze kugira ijambo rikomeye mu guhuza imitwe yari isanzwe ikora mu buryo budafite umurongo umwe.
Hari impungenge ko kubura umuyobozi nk’uwo bishobora kongera amakimbirane hagati y’imitwe itandukanye ya Wazalendo cyangwa bikadindiza ibikorwa byayo bya gisirikare muri ako gace. Abandi na bo bavuga ko bishobora gutuma indi mitwe yitwaje intwaro irushaho kwagura ibikorwa byayo mu bice byari bisanzwe bigenzurwa n’abo barwanyi.
Intambara zikomeje kubera mu Burasirazuba bwa Congo zikomeje gufata indi sura, aho ikoreshwa rya drones, intwaro ziremereye n’imirwano ihanganishije imitwe myinshi bikomeje kugira ingaruka zikomeye ku buzima bw’abaturage.
Mu gihe abayobozi ba Wazalendo bakomeje guha icyubahiro Général Byamungu bamwita “intwari yaguye ku rugamba,” abaturage benshi bo muri Kivu y’Amajyepfo bakomeje kwibaza igihe amahoro azagarukira muri ibyo bice bimaze imyaka byinshi mu ntambara n’umutekano muke.
Tubibutse ko mushobora gukomeza kudukurikirana ku mbuga nkoranyambaga.
Kanda hano udukurikirane kuri Facebook, Hano udukurikirane kuri WhatsApp
