Abatuye mu bice bitandukanye by’u Rwanda baritegura iminsi itatu idasanzwe ishobora kubangamira ibikorwa bya buri munsi, nyuma y’itangazo ryasohowe na Sosiyete y’u Rwanda ishinzwe Ingufu (REG) rigaragaza gahunda y’ibura ry’amashanyarazi riteganyijwe hagati ya tariki ya 15 na 17 Mata 2026.
Iri tangazo ryateje impungenge ku baturage n’abakora ibikorwa by’ubucuruzi, cyane cyane abishingikiriza ku muriro w’amashanyarazi mu kazi kabo ka buri munsi.
Iyi gahunda ije mu gihe u Rwanda rukomeje kugaragaza intambwe ishimishije mu rwego rwo kugeza amashanyarazi kuri benshi, ariko bikagaragara ko ibikorwa byo gusana no kwagura imiyoboro bikiri ingenzi kugira ngo ubwuzuzanye bw’uru rwego n’iterambere rirambye bikomeze gutera imbere.
Ku wa 15 Mata 2026, abaturage bo ntara y’Iburasirazuba mu mirenge ya Musha na Mwurire mu Karere ka Rwamagana ni bo bazatangira guhura n’iki kibazo, aho amashanyarazi azaba yabuze hagati ya Saa Sita na Saa Cyenda z’amanywa.
Uyu munsi ufatwa nk’intangiriro y’iyi gahunda, aho ibikorwa byo gusana no kongera ubushobozi bw’imiyoboro bizatangirira mu Burasirazuba bw’igihugu.
Ku wa 16 Mata, ikibazo kizakomereza mu Ntara y’Iburengerazuba, aho imirenge ya Rubavu, Cyanzarwe, Rugerero na Nyakiriba yo mu Karere ka Rubavu izagerwaho n’iri bura ry’umuriro. Aha ni hamwe mu hantu hakunze kugaragara ibikorwa byinshi by’ubucuruzi n’ubukerarugendo, ku buryo abahakorera basabwa gufata ingamba zo kwitegura hakiri kare.
Ku munsi ukurikiyeho, ku wa 17 Mata, ingaruka zizagera mu turere twinshi kurushaho. Mu ntara y’Amajyaruguru mu Karere ka Musanze, imirenge ya Cyuve, Kinigi, Nyange, Shingiro na Muhoza izabura amashanyarazi.
Ni mu gihe mu Mujyi wa Kigali, Akarere ka Nyarugenge na ko kazagerwaho n’iki kibazo mu mirenge ya Mageragere na Nyamirambo. Uyu munsi kandi umuriro uzabura mu Karere ka Rwamagana, aho imirenge ya Kigabiro, Muhazi, Gishari, Munyaga, Munyiginya ndetse n’ibice bya Rubona na Mwurire bizagerwaho.
REG yasabye abaturage kwitwararika cyane muri iyi minsi, cyane cyane bakirinda kwegera insinga z’amashanyarazi, kuko bishoboka ko umuriro wagaruka mbere y’igihe cyari cyatangajwe, bigateza impanuka ku batabyitondeye.
Nubwo ibi bikorwa bishobora kubangamira ubuzima bwa buri munsi by’igihe gito, ubuyobozi bwa REG bushimangira ko ari ingenzi mu rwego rwo kunoza no kongera ubushobozi bw’imiyoboro y’amashanyarazi, bityo igihugu kigakomeza gutera imbere mu rwego rw’ingufu.
Ibi bije bishimangira ishusho y’impinduka ikomeye u Rwanda rwagezeho mu myaka mike ishize. Raporo yagejejwe ku Nama y’Abaminisitiri yo ku wa 15 Nzeri 2025 yagaragaje ko ingo zigerwaho n’amashanyarazi zari zimaze kugera kuri 85% mu mwaka wa 2025, zivuye munsi ya 2% mu mwaka wa 2000. Iyi mibare igaragaza urugendo rurerure igihugu cyanyuzemo mu kwihaza mu bijyanye n’ingufu.
Byongeye kandi, inyandiko y’imihigo ya Minisiteri y’Ibikorwaremezo y’umwaka wa 2025/2026 igaragaza ko ingo zirenga miliyoni 2.1 zifite amashanyarazi afatiye ku muyoboro mugari, mu gihe izirenga ibihumbi 893 zikoresha amashanyarazi akomoka ku mirasire y’izuba. Ibi byerekana uburyo igihugu cyahisemo inzira zitandukanye zo gukemura ikibazo cy’ingufu, hagamijwe kugera ku iterambere rirambye.
Nubwo bimeze bityo, ibura ry’amashanyarazi nk’iri ryongeye kwibutsa ko urugendo rukiri rurerure. Abaturage n’abakora ubucuruzi barasabwa gukomeza kwihangana no gufata ingamba zo guhangana n’ingaruka z’ibi bikorwa by’igihe gito, mu gihe igihugu gikomeje kubaka urufatiro rukomeye rw’iterambere rishingiye ku ngufu zihagije kandi zizewe.
