Leta Zunze Ubumwe za Amerika yamaganye byimazeyo amakuru yavugaga ko izagira uruhare mu gutera inkunga umutwe mushya wa Repubulika Iharanira Demokarasi ya Congo (RDC) uzashinzwe kurinda ibirombe by’amabuye y’agaciro, ibintu byahise bitera urujijo n’impaka ku mikoranire mpuzamahanga mu bijyanye n’umutekano n’ubukungu muri iki gihugu gikungahaye ku mutungo kamere.
Ku wa 27 Mata 2026, urwego rwa RDC rushinzwe kugenzura ubucukuzi bw’amabuye y’agaciro rwari rwatangaje ko hagiye gushyirwaho umutwe udasanzwe uzaba ufite inshingano zo gucunga no kurinda umutekano w’ibirombe biherereye mu bice bitandukanye by’igihugu.
Uyu mutwe, nk’uko byasobanuwe, uzatangira akazi mu mpera z’uyu mwaka ufite abasirikare 3000, naho gahunda igateganya ko mu mwaka wa 2028 uzaba ugeze ku mubare w’abagera ku 20.000.
Iryo tangazo ryari ryagaragaje ko ibikorwa by’uyu mutwe bizatwara asaga miliyoni 100 z’Amadolari ya Amerika, ndetse rikavuga ko inkunga izava mu bafatanyabikorwa barimo Leta Zunze Ubumwe za Amerika na Leta Zunze Ubumwe z’Abarabu (UAE), hashingiwe ku bufatanye busanzwe hagati y’impande zombi mu rwego rw’umutekano n’ishoramari.
Icyakora, ku wa 28 Mata 2026, Ambasade ya Amerika muri RDC yahise isohora itangazo rinyomoza ayo makuru, ivuga ko nubwo hari ubufatanye hagati ya Amerika na RDC mu nzego zitandukanye, nta gahunda ihari yo gutera inkunga uwo mutwe mushya.
Iyo Ambasade yagize iti: “Leta Zunze Ubumwe za Amerika ntizizatera inkunga umutwe uzarinda umutekano w’ibirombe by’amabuye y’agaciro muri RDC.”
Aya magambo yahise akurura igitutu gikomeye ku rwego rwa RDC rushinzwe ubugenzuzi bw’ubucukuzi bw’amabuye y’agaciro, rwari rwatangaje amakuru ya mbere. Mu gihe kitageze ku masaha 24, uru rwego rwahise rusohora irindi tangazo rikosora ibyo rwari rwatangaje mbere.
Mu itangazo rishya, uru rwego rwasobanuye ko uwo mushinga wo gushyiraho umutwe wihariye wo kurinda ibirombe ukiri mu rwego rw’ibiganiro n’ubufatanye n’abafatanyabikorwa batandukanye, barimo Amerika na UAE, ariko rushimangira ko nta gihugu na kimwe kizawutera inkunga mu buryo bw’amafaranga nk’uko byari byabanje kuvugwa.
Ibi byatumye hibazwa byinshi ku buryo amakuru y’ibikorwa bikomeye nk’ibi ashyirwa ahagaragara, cyane cyane mu gihugu nka RDC gifite amateka y’imitwe yitwaje intwaro n’ibibazo by’umutekano bikunze kuzenguruka umutungo kamere.
Abasesenguzi bagaragaza ko umushinga nk’uyu ushobora kuba ugamije gukemura ikibazo cy’icuruzwa ry’amabuye y’agaciro ridakurikije amategeko no kongera umutekano mu duce tw’ibirombe, ariko nanone bakibaza ku bushobozi bwawo mu gihe utabonye inkunga ihamye n’ubufatanye bwagutse mpuzamahanga.
Nubwo hari ukutavuga rumwe ku bijyanye n’inkunga, uruhare rw’ibihugu bikomeye n’ibigo mpuzamahanga mu micungire y’umutekano w’ibirombe bya RDC rukomeje kuba ingingo y’ingenzi, cyane ko ari ho haturuka umutungo munini igihugu cyubakiraho ubukungu bwacyo, ariko nanone bikaba intandaro y’amakimbirane n’imitwe yitwaje intwaro imaze imyaka myinshi mu burasirazuba bwacyo.
Uko ibintu bizagenda mu ishyirwa mu bikorwa ry’uyu mushinga bizaterwa ahanini n’uburyo ubuyobozi bwa RDC buzashobora gukorana n’abafatanyabikorwa ndetse no gushyiraho uburyo bwizewe bwo gucunga uwo mutwe, hatabayeho kwivanga kw’inyungu z’amahanga cyangwa iz’imbere mu gihugu zishobora kuwutesha intego.
Tubibutse ko mushobora gukomeza kudukurikirana ku mbuga nkoranyambaga.
Kanda hano udukurikirane kuri Facebook, Hano udukurikirane kuri WhatsApp
