Impinduka nshya mu buyobozi bwa Kaminuza ya Goma (UNIGOM) zongeye gukurura ibitekerezo bya benshi nyuma y’uko ihuriro AFC/M23 ritangaje ishyirwaho rya Prof. Jean Baptiste Kakoma Sakatolo Zambeze ku mwanya w’Umuyobozi Mukuru w’iyi kaminuza iri mu zikomeye zo mu burasirazuba bwa Repubulika Iharanira Demokarasi ya Congo.
Iri shyirwaho ryatangajwe binyuze mu Cyemezo No 032/COORDA-PAJD/BB/AFC-M23 cyo ku wa 29 Gicurasi 2026, cyashyizweho umukono na Bertrand Bisimwa usanzwe ari Umuhuzabikorwa Wungirije wa AFC/M23 ushinzwe ibibazo bya politiki, ubutegetsi, ubutabera na dipolomasi, mbere yo kwemezwa na Corneille Nangaa Yobeluo uyoboye iri huriro.
Prof. Jean Baptiste Kakoma Sakatolo Zambeze aje gusimbura Prof. Mughanda Muhindo Célestin wari umaze igihe ayobora Kaminuza ya Goma ariko akaba aherutse gukurwa kuri uwo mwanya nyuma y’uko AFC/M23 ivuze ko yari amaze igihe atagaragara ku kazi.
Izi mpinduka mu buyobozi bw’iriya Kaminuza zabaye nyuma y’umunsi umwe gusa AFC/M23 itangaje ku wa Kane tariki ya 28 Gicurasi 2026 ko Prof. Mughanda yirukanwe ku nshingano ze.
AFC/M23 ntiyahagarikiye gusa ku gushyiraho Umuyobozi Mukuru mushya wa UNIGOM, ahubwo yanatangaje abagize komite nshya izaba iyoboye iyi kaminuza mu nzego zitandukanye.
Mu bayobozi bashya bashyizweho harimo Prof. Richard Kabuyanga Kabuseba wagizwe Umunyamabanga Mukuru ushinzwe amasomo, Prof. Nzabandora Ndimubanzi wagizwe ushinzwe ubushakashatsi, ndetse na Butotima Safari wagizwe Umunyamabanga Mukuru ushinzwe ubutegetsi.
Paluku Malisawa na we yahawe inshingano zo kuyobora urwego rushinzwe ingengo y’imari muri iyi kaminuza.
Mu ngingo ya gatatu y’icyemezo cyashyizwe ahagaragara, AFC/M23 yavuze ko “ingingo zose z’amategeko cyangwa ibyemezo byari byarafashwe mbere kandi binyuranyije n’iki cyemezo bivanyweho.”
Ishyirwa mu bikorwa ry’iki cyemezo ryahawe Umunyamabanga Uhoraho wa AFC/M23, mu rwego rwo kwihutisha imikorere y’ubuyobozi bushya.
Kaminuza ya Goma izwi nka UNIGOM ni kimwe mu bigo bikomeye by’amashuri makuru bikorera mu Mujyi wa Goma, umujyi ukomeje kugenzurwa na AFC/M23 nyuma yo kwagura ibice iri huriro rifiteho ububasha mu Ntara ya Kivu y’Amajyaruguru.
Izi mpinduka mu buyobozi bwa UNIGOM zije mu gihe ubuyobozi bwa AFC/M23 bukomeje gushyira abantu bashya mu nzego zitandukanye z’ubutegetsi, uburezi n’imiyoborere mu bice bugenzura.
Abasesenguzi bavuga ko izi gahunda zigaragaza uburyo iri huriro rikomeje kubaka inzego z’imikorere no gukomeza kugaragaza ubushobozi bwo kuyobora ibice rifite mu maboko, cyane cyane mu rwego rw’uburezi n’ibikorwa bya serivisi za Leta.
Ihinduka ry’ubuyobozi bwa Kaminuza ya Goma rishobora kugira ingaruka ku mikorere y’iyi kaminuza, ku banyeshuri ndetse no ku bakozi bayo, cyane cyane mu gihe akarere ka Kivu y’Amajyaruguru gakomeje guhangana n’ibibazo by’umutekano muke n’impinduka za politiki.
Hari abategereje kureba niba ubuyobozi bushya bwa UNIGOM buzazana impinduka mu rwego rw’amasomo, ubushakashatsi ndetse n’imicungire y’ibikorwa bya buri munsi muri iyi kaminuza ifite amateka akomeye muri aka karere.
Kumenyekana kw’izi mpinduka kandi byongeye kwerekana uburyo uburezi bukomeje kuba kimwe mu bice bikomeye bihindurwamo abayobozi mu duce tugenzurwa na AFC/M23, mu gihe ibikorwa bya politiki n’umutekano bikomeje guhindura imiterere y’ubuyobozi muri Kivu y’Amajyaruguru.
Tubibutse ko mushobora gukomeza kudukurikirana ku mbuga nkoranyambaga.
Kanda hano udukurikirane kuri Facebook, Hano udukurikirane kuri WhatsApp
