Hari abagabo n’abasore benshi bavuga ko ibibazo byo mu ngo, amakimbirane adashira cyangwa kutumvikana n’abo bashakanye/bakundana bibasunikira kujya bamara igihe kinini mu tubari no gushaka abagore b’igihe gito, bamwe bakaba banahitamo gushaka abakobwa bicuruza kugira ngo babone ibyo bita “ihumure ry’akanya gato”.
Nubwo hari ababikora bumva ari uburyo bwo guhunga ibibazo cyangwa kugabanya agahinda, impuguke zitandukanye zigaragaza ko iyo nzira akenshi ikurura ibibazo birenze ibyo umuntu yashakaga guhunga. Abenshi bavuga ko amafaranga, ubuzima, umutekano ndetse n’umuryango bishobora kujya mu kaga kubera ibyemezo bifashwe mu buryo bwihuse.
Hari ibintu umunani umugabo wese utekereza kujya ku mukobwa wicuruza aba akwiye kubanza gutekerezaho mbere yo gufata icyemezo.
Icya mbere ni uko aba agiye kugura serivisi yo kwimara ipfa, atari urukundo. Hari abagabo bajya muri ubwo buzima bibwira ko bashobora kubona umuntu ubitaho cyangwa ubakunda by’ukuri, nyamara akenshi usanga isano iba yubakiye ku mafaranga gusa.
Hari n’abavuga ko bamwe mu bakobwa bicuruza bashobora kubikora bibereye mu bindi ubundi bakabwira umukiriya amagambo nk’aya ngo: “Gira vuba nigendere”, ibintu bigaragaza ko intego iba ari ugusoza akazi no kubona amafaranga.
Ikindi gikunze kuvugwa ni uko uwo mukobwa aba ari umucuruzi, naho umugabo akaba umuguzi. Ibyo bivuze ko amafaranga n’ibyo mwumvikanyeho biba bikwiye gusobanuka hakiri kare kugira ngo hatazagira amakimbirane cyangwa gushinjanya nyuma. Hari abagabo bavuga ko hari igihe bishyura ibintu batari biteze, harimo ibyo kunywa cyangwa ibindi bahawe batabanje kubyumvikanaho.
Abaganga n’inzobere mu buzima bakomeza kwibutsa abantu kwitwararika cyane ku ndwara zandurira mu mibonano mpuzabitsina. Ni yo mpamvu bavuga ko umuntu wese ufata uwo mwanzuro aba akwiye kwitwaza udukingirizo twizewe kandi twaguzwe ahantu hagenzuwe neza.
Hari kandi impungenge ziterwa n’isuku n’ubuzima bwo mu kanwa. Bamwe mu baganga bagaragaza ko gusomana n’abantu benshi batandukanye bishobora gutuma hari indwara zandurira mu matembabuzi yo mu kanwa no mu muhogo, zirimo herpes, gonorrhea ndetse na syphilis.
Abandi bavuga ko no kwitwara nabi mu gihe cy’imibonano bishobora gushyira umuntu mu kaga. Amazi ava mu mubiri ashobora gutwara mikorobe zitandukanye, ari na yo mpamvu abantu bagirwa inama yo kwirinda ibikorwa bishobora gutuma ayo matembabuzi akwira ku mubiri hose.
Ku rundi ruhande, ikibazo cy’umutekano na cyo gihangayikishije benshi. Hari abagabo bavuga ko bamwe mu bakobwa bicuruza bakorana n’amatsinda y’abajura cyangwa abantu bashobora kwiba umukiriya amafaranga, telefoni cyangwa ibindi bintu by’agaciro. Hari n’abavuga ko bamwe batezwe amabandi nyuma yo kujyanwa ahantu hatazwi.
Ni yo mpamvu abantu basabwa kubanza kureba niba aho bagiye bafite umutekano uhagije kandi bakamenya uko bakwitabara igihe ikibazo kibaye. Abasesenguzi bavuga ko kujya ahantu umuntu atizeye bishobora kumuviramo ibyago bikomeye birimo gukubitwa, kwibwa cyangwa no kuhagirira ikibazo cy’ubuzima.
Ikindi gikunze guteza amakimbirane ni ikibazo cy’urugo. Hari abagore benshi bavuga ko guca inyuma bikorwa n’abagabo babo ari imwe mu mpamvu zitera gutandukana kw’imiryango. Hari n’abavuga ko bamwe mu bakobwa bicuruza bashobora kwitaba telefone y’umugabo igihe ahamagawe n’umugore we, ibintu bishobora guteza amahane no gusenya icyizere cy’abashakanye.
Abajyanama b’imibanire y’abashakanye bavuga ko nubwo amakimbirane mu rugo aba ashobora gukomera, icyiza ari uko umugore n’umugabo bicara hamwe bakaganira ku bibazo bafite aho gushakira ibisubizo hanze y’urugo.
Bemeza ko ibiganiro, kwihangana no gushaka ubufasha bw’inzobere bishobora kurinda umuryango gusenyuka.
Hari abasoza bavuga ko “kwirinda biruta kwivuza”, bagasaba abagabo kutemera ko umujinya cyangwa agahinda by’akanya gato bibashyira mu byemezo bishobora kubagiraho ingaruka z’igihe kirekire ku buzima, ku mutekano no ku muryango.
Tubibutse ko mushobora gukomeza kudukurikirana ku mbuga nkoranyambaga.
Kanda hano udukurikirane kuri Facebook, Hano udukurikirane kuri WhatsApp
