Amasasu menshi n’urusaku rwinshi byumvikanye mu gace ka Makala mu murwa mukuru Kinshasa, aho abasirikare n’abapolisi ba Repubulika Iharanira Demokarasi ya Congo barasanye bikomeye mu minsi ibiri ikurikiranye, ku wa 21 no ku wa 22 Mata 2026, bikurura impagarara n’ubwoba mu baturage.
Amakuru atangwa n’abaturage bo muri aka gace agaragaza ko intandaro y’iyi mirwano yabayeho nyuma y’uko abasirikare bakorera mu gace ka Mabulu bitambitse abapolisi bo mu mutwe ushinzwe ubutabazi bwihuse bari mu gikorwa cyo guta muri yombi urubyiruko rukekwaho ubujura.
Icyo gihe, impande zombi zahise zitangira kurasana, ibintu byaje gufata indi ntera ubwo uru rubyiruko bivugwa ko rufitanye isano n’umutwe w’amabandi uzwi nka Kuluna rwatangiye gufasha abasirikare guhangana n’abapolisi.
Iyi mirwano, nk’uko byatangajwe n’ikinyamakuru Actualité, yatangiriye ku muhanda wa Elengesa hafi y’ikigo cya gisirikare, aho uru rubyiruko rwafatiwe, ikomeza kugera hafi y’ikigo cya Polisi kiri ku muhanda wa Kibambi 1.
Aho hose, abaturage bavuga ko amasasu yavugaga ubudahwema, bamwe bagahungira mu nzu zabo, abandi bakaryama hasi kugira ngo birinde amasasu yageraga hirya no hino.
Abiga mu ishuri riri hafi y’aho imirwano yabereye nabo bahuye n’ibihe bikomeye, aho byabaye ngombwa ko baryama hasi mu byumba by’amashuri, mu gihe urusaku rw’amasasu rwari rukomeje kumvikana.
Umwe mu babyeyi yagize ati: “Twagize ubwoba bwinshi, abana bararyamye hasi, nta cyo twari gukora uretse gusaba Imana ko birangira.”
Uretse ubwoba n’ihungabana ryatewe n’iyi mirwano, ibikorwa remezo nabyo byangiritse ku buryo bugaragara.
Inzu z’abaturage zegereye aho imirwano yabereye zasahuwe, mu gihe sitasiyo ya Polisi iri ku muhanda wa Kimfumu yo yasenywe burundu. Ibi byatumye abaturage barushaho kugira impungenge ku mutekano wabo, cyane cyane mu gace gasanzwe kavugwamo ibikorwa by’ubujura n’amabandi.
Ku wa 22 Mata, Meya wa Komini ya Makala, Ngudia Kabongo, yemeje aya makuru avuga ko nubwo imirwano yabaye ikomeye, nta muntu wayipfiriye mo.
Yagize ati: “Nta muntu wapfuye muri iyi mirwano, ariko hari byinshi byangiritse, birimo sitasiyo nto ya Polisi.”
Aya magambo agaragaza uburemere bw’ibyangiritse n’ubwo nta buzima bwatakaye.
Mu rwego rwo gukumira ko ibintu byarushaho kuzamba, ku mugoroba wo ku wa 22 Mata 2026, ubuyobozi bwafashe icyemezo cyo kohereza itsinda rihuriweho ry’abasirikare n’abapolisi kugira ngo bakore uburinzi bufatanyije.
Ibi byitezweho kugarura ituze mu gace ka Makala, nubwo abaturage bakomeje kugaragaza impungenge z’uko umutekano ushobora kongera guhungabana igihe icyo ari cyo cyose.
Iyi mirwano igaragaje ikibazo gikomeye cy’imikoranire mibi hagati y’inzego z’umutekano muri RDC, aho aho gufatanya kurwanya ibyaha, hari aho usanga zihangana ubwazo.
Abasesenguzi bemeza ko ibi bishobora kongera imbaraga z’imitwe y’abagizi ba nabi nka Kuluna, ikunze kwifashisha icyuho cy’umutekano muke mu duce dutandukanye twa Kinshasa.
Ku baturage ba Makala, ibyabaye ni isomo rikomeye ribibutsa ko umutekano wabo ugihangayikishije. Nubwo ingamba zatangiye gufatwa, benshi baracyafite ubwoba, bibaza niba ituze rizagaruka burundu cyangwa niba aya masasu ashobora kongera kumvikana mu minsi iri imbere.
Tubibutse ko mushobora gukomeza kudukurikirana ku mbuga nkoranyambaga.
Kanda hano udukurikirane kuri Facebook, Hano udukurikirane kuri WhatsApp
