Ku wa Gatanu, u Rwanda rwakiriye abarwanyi b’umunani bari baranzwe no gukora ibikorwa bya gisirikare mu mutwe w’ingabo zidasanzwe za FDLR, zizwi nka CRAP, mu kigo cya Mutobo giherereye mu karere ka Musanze. Aba barwanyi bashyizwe mu bikorwa byo gusubizwa mu buzima busanzwe, aho bagomba guhabwa amahugurwa, ubujyanama n’ubufasha mu kwiyubaka no gusubira mu muryango.
Gatabazi Jean Marie Vianney, umwe mu bagize inama y’abakomiseri muri Komisiyo y’Igihugu Ishinzwe Gusezerera no Gusubiza mu Buzima Busanzwe Abahoze ari Abasirikare, yavuze ko aba barwanyi bayoborwa na Lieutenant-Colonel Guillaume. Yavuze kandi ko batari bonyine, kuko mu baturutse mu mashyamba harimo n’undi umwe waturutse mu mutwe wa Nyatura ndetse n’abasivile batandatu barimo abapasiteri bafashaga FDLR mu bikorwa bya gisirikare n’ubukangurambaga.
Abakiriwe i Mutobo ku wa Gatanu bariyongera ku bandi 19 bakiriwe ku wa Kabiri tariki ya 20 Mutarama 2026, barimo abarwanyi 13 baturutse mu mitwe ya FDLR, Wazalendo ndetse n’ingabo za Repubulika Iharanira Demokarasi ya Congo (FARDC). Kuva mu minsi itatu ishize, u Rwanda rumaze kwakira ababarirwa muri 33 bahoze mu mashyamba ya Congo, bagahabwa uburyo bwo gusubira mu buzima busanzwe.
Gatabazi yasobanuye ko gahunda yo gusubiza mu buzima busanzwe abahoze ari abasirikare igamije guca inzira z’imirwano, kurwanya ibikorwa by’ubugizi bwa nabi, no guteza imbere amahoro n’umutekano mu gihugu no mu karere kose k’ibiyaga bigari.
U Rwanda rwakiriye aba barwanyi, nyuma y’igihe rusinye amasezerano y’amahoro hagati yarwo na RDC yari amaze igihe kinini ategerejwe, yashyizweho umukono mu muhango wabereye i Washington D.C., imbere y’abakuru b’ibihugu bya Afurika bitandukanye. Muri aya masezerano, RDC yategetswe gusenya burundu umutwe wa FDLR.
Mbere y’isinywa ry’amasezerano, Trump yakiriye muri Oval Office Perezida Paul Kagame w’u Rwanda n’umwe we, Perezida Félix Tshisekedi wa RDC, bagirana ibiganiro byamaze iminota myinshi byibanze ku mahame y’amasezerano. Amasezerano agizwe n’ibyiciro bitatu: amahame shingiro ajyanye n’amahoro, amasezerano y’ubufatanye mu bukungu n’ukwihuza mu karere, n’ahandi hagamije gushyira hamwe ingamba zo gukemura amakimbirane.
Uyu muhango wari witabiriwe n’abakuru b’ibihugu birimo João Lourenço (Angola), William Ruto (Kenya), Evariste Ndayishimiye (Burundi), Umuyobozi wa Komisiyo y’Umuryango wa Afurika Yunze Ubumwe Mahmoud Ali Youssouf, Uhuru Kenyatta wahoze ayobora Kenya, Olusegun Obasanjo wahoze ayobora Nigeria, hamwe na Visi Perezida wa Uganda, Jessica Alupo. Perezida wa FIFA, Gianni Infantino, nawe yari ahari.
Trump yashimangiye ko uyu munsi ari umunsi udasanzwe kuri Afurika, ku bihugu by’u Rwanda na RDC ndetse no ku Isi yose, avuga ko aya masezerano ari intambwe ikomeye mu guhagarika ibinyacumi by’imyaka y’ubugizi bwa nabi no gutangira umwaka mushya w’ituze n’ubufatanye hagati y’ibi bihugu. Yashimangiye kandi ko Perezida Kagame na Tshisekedi bagaragaje ubushake budasanzwe bwo gushyira mu bikorwa aya masezerano.
Aya masezerano yari yitezweho kuba ari intambwe ikomeye mu gukemura amakimbirane yateje umutekano muke mu karere k’ibiyaga bigari, ashyiraho inzira ifatika yo gukorana hagati y’ibihugu byombi mu rwego rw’amahoro, ubukungu n’imiyoborere. By’umwihariko, bigaragara ko guhana amakuru ku mutekano, kubaka ubushobozi mu baturage no gutanga ubufasha ku bahoze barwana, bizafasha mu kurwanya ibikorwa by’abagizi ba nabi no kugabanya amakimbirane mu baturage.
Tubibutse ko mushobora gukomeza kudukurikirana ku mbuga nkoranyambaga.
Kanda hano udukurikirane kuri Facebook, Hano udukurikirane kuri WhatsApp
