Urwego rw’Igihugu rw’Iterambere (RDB) rwafashe icyemezo cyo gufunga by’agateganyo hoteli enye zo mu Rwanda nyuma y’ubugenzuzi bwimbitse bwagaragaje ko hari ibibazo bikomeye byatumaga zituzuza ibisabwa mu rwego rw’ubukerarugendo n’amahoteri.
Iki cyemezo kije mu gihe urwego rw’amahoteri n’ubukerarugendo rukomeje kwaguka ku muvuduko munini mu Rwanda, igihugu gikomeje kwiyubaka nk’icyerekezo cy’abakerarugendo n’abashoramari baturutse hirya no hino ku isi.
Hoteli zafunzwe zirimo Century Park Hotel and Residences iherereye mu gace ka Nyarutarama mu Mujyi wa Kigali, Dove Luxury Hotel yo mu Karere ka Gicumbi mu Ntara y’Amajyaruguru, Highland Resort Ltd ikorera mu Karere ka Rulindo ndetse na Nengo Eden Park Hotel yo mu Karere ka Rubavu mu Ntara y’Iburengerazuba.
Nk’uko byatangajwe na RDB, iki cyemezo cyafashwe nyuma y’isuzuma ryari rigamije kureba niba ibikorwa by’aya mahoteli byubahiriza amabwiriza n’amahame agenga urwego rw’ubukerarugendo n’amacumbi yakira abashyitsi.
Mu byasuzumwe harimo imicungire y’amahoteli, umutekano rusange w’abayagana, isuku, uburyo ibiribwa bibikwa n’uko bitegurwa, ubuziranenge bwa serivisi zitangwa ndetse n’ibindi bipimo bifatwa nk’ingenzi mu kwakira neza abashyitsi no kubaha serivisi zifite ireme.
Abasesenguzi mu rwego rw’ubukerarugendo batanze impuruza ku Buziranenge n’Umutekano mu ruganda rwUbukerarugendo mu Rwanda bavuga ko ubuziranenge bwa serivisi ari imwe mu nkingi zikomeye zituma igihugu gikomeza gukurura ba mukerarugendo. Bagaragaza ko amakosa agaragara muri serivisi z’amahoteli ashobora kugira ingaruka ku isura y’igihugu no ku cyizere cy’abashyitsi.
Gufunga aya mahoteli ntabwo bivuze ko ibikorwa byayo bihagaritswe burundu. Ahubwo ni icyemezo kigamije guha abayafite umwanya wo gukosora ibibazo byagaragajwe n’abagenzuzi kugira ngo bongere kubahiriza ibisabwa n’amategeko.
RDB yasobanuye ko ayo mahoteli atemerewe gukomeza ibikorwa byose bifitanye isano no kwakira abashyitsi cyangwa gutanga serivisi z’ubukerarugendo kugeza igihe azaba yamaze gukemura ibibazo byagaragajwe.
Nyuma yo gukora impinduka zisabwa, ayo mahoteli azasaba kongera kugenzurwa n’inzego zibifitiye ububasha mbere y’uko yemererwa gusubukura ibikorwa byayo.
Icyemezo cyo gufunga aya mahoteli cyatumye hongera kuvugwa ku kamaro ko gukomeza kugenzura ubuziranenge bw’ibigo bikora mu rwego rw’ubukerarugendo, cyane cyane mu gihe u Rwanda rukomeje kwakira inama mpuzamahanga, ibikorwa by’ubukerarugendo n’abashyitsi benshi kurusha uko byari bimeze mu myaka ishize.
Imibare y’Ikigo cy’Igihugu cy’Ibarurishamibare igaragaza ko urwego rw’amahoteri rwakomeje kwaguka ku buryo bugaragara mu myaka irindwi ishize. Mu mwaka wa 2018, mu Rwanda habarizwaga hoteli 669 zifite ibyumba 13.802.
Mu mwaka wa 2019 umubare wa hoteli wazamutse ugera kuri 836 zifite ibyumba 16.113, naho mu 2020 ugera kuri 870 zifite ibyumba 17.078.
Mu mwaka wa 2021, igihugu cyari gifite hoteli 911 zifite ibyumba 18.201, mu gihe mu 2022 habaye izamuka rikomeye ryatumye umubare wa hoteli ugera kuri 1.189 n’ibyumba 21.232.
Nubwo mu 2023 habayeho igabanuka rito rikageza umubare wa hoteli kuri 1.175 zifite ibyumba 21.217, mu mwaka wa 2024 hongeye kugaragara izamuka rikomeye aho igihugu cyabarurwaga hoteli 1.460 zifite ibyumba 25.330.
Iyi mibare igaragaza ko ishoramari mu rwego rw’amahoteri rikomeje kwiyongera, cyane cyane mu Mujyi wa Kigali no mu turere dukunze gusurwa n’abakerarugendo bifuza kureba ibyiza nyaburanga by’u Rwanda.
Mu gihe uru rwego rukomeza gutera imbere, inzego zibishinzwe zikomeje gushimangira ko kwagura ibikorwa bidahagije ahubwo ko hagomba kujyana no kubungabunga ubuziranenge, umutekano n’ireme rya serivisi.
Ni byo bifatwa nk’urufunguzo rwo gukomeza kubaka izina ry’u Rwanda nk’ahantu hizewe kandi hakunzwe n’abashyitsi baturutse impande zose z’isi.
Icyemezo cya RDB cyo gufunga by’agateganyo aya mahoteli enye ni ikimenyetso cy’uko inzego z’ubuyobozi zikomeje gushyira imbere iyubahirizwa ry’amabwiriza no kurinda isura y’urwego rw’ubukerarugendo, rumaze kuba imwe mu nkingi z’ingenzi z’ubukungu bw’u Rwanda.
Tubibutse ko mushobora gukomeza kudukurikirana ku mbuga nkoranyambaga.
Kanda hano udukurikirane kuri Facebook, Hano udukurikirane kuri WhatsApp
