Ibikorwa by’intambara byongeye gufata indi ntera mu misozi miremire ya Mulenge, aho amakuru aturuka mu bice bitandukanye bya Minembwe, Bijombo na Gakenke agaragaza umunsi umwe waranzwe n’imirwano ikomeye yasize ihinduye byinshi ku ruhande rw’ingabo za Leta ya Repubulika Iharanira Demokarasi ya Congo n’abafatanyabikorwa bazo.
Ku wa Mbere tariki ya 06 Mata 2026, amakuru yizewe aturuka mu basirikare bari ku rugamba yemeza ko umutwe wa MRDP–Twirwaneho wagabye ibitero byo kwihimura no kwirwanaho mu bice bitandukanye, ugasubiza inyuma ibitero byari byagabwe n’ingabo za FARDC zifatanyije n’ingabo z’u Burundi ndetse n’indi mitwe bakorana.
Mu gace ka Kajembwe ku Ndondo, muri grupema ya Bijombo ho muri teritwari ya Uvira, habereye imirwano yatangiye mu masaha ya kare y’igitondo.
Amakuru atangwa n’abari hafi y’aho imirwano yabereye avuga ko ingabo za Leta n’abafatanyabikorwa bazo ari zo zabanje kugaba igitero, ariko ziza gusubizwa inyuma mu buryo bukomeye, zisiga ibikoresho bya gisirikare birimo imbunda n’amasasu menshi.
Iyo mirwano yamaze amasaha menshi, aho byageze hafi saa sita z’amanywa ingabo zagabye igitero zisubira inyuma mu kajagari, ibintu byagaragaje icyuho mu mikorere yazo no mu itegurwa ry’ibitero.
Ahandi habereye imirwano ikomeye ni mu gace ka Kuwimiko, hafi ya centre ya Minembwe muri teritwari ya Fizi. Aho naho ingabo za FARDC n’abafatanyabikorwa bazo zongeye kugaba igitero, ariko amakuru akavuga ko zasubijwe inyuma vuba cyane, nyuma yo guhangana n’amasasu menshi yaturukaga ku barwanyi ba MRDP–Twirwaneho.
Abasirikare benshi bahungiye mu bihuru no mu bisambu, ibintu byasize urugamba rusa n’urwahise rurangira mu gihe gito.
Amakuru atangwa n’umwe mu bari ku rugamba avuga ko ingabo za FARDC n’abafatanyabikorwa bazo bagabye igitero ariko bagasubizwa inyuma mu buryo bwihuse, nyuma yo guhangana n’amasasu menshi.
Umwe mu barwanyi ba MRDP–Twirwaneho yagize ati: “Twabavunderejemo amasasu ku buryo bahise batatana; bamwe bahungira mu bihuru, abandi mu bisambu. Byari ibihe bikomeye kuri bo.”
Ibi byatumye uwo murongo w’urugamba usenyuka mu gihe gito, abasirikare benshi basubira inyuma badafite uko bihagararaho, ibintu byongeye kugaragaza ubukana bw’imirwano yari irimo kuba muri ako gace.
Mbere y’ibi bitero byose, mu gitondo kare cyane hari habaye indi mirwano i Gakenke, na yo yasize igaragaje intege nke ku ruhande rw’ingabo za Leta n’abazifasha. N’ubwo yamaze igihe gito, amakuru ahamya ko hari abasirikare bahasize ubuzima abandi bagakomereka bikomeye.
Ibi bikorwa by’imirwano bibaye mu gihe aka karere kamaze igihe kirekire karangwa n’umutekano mucye, aho imitwe itandukanye yitwaje intwaro ihanganye ku mpamvu zirimo ubutegetsi, ubutaka n’amoko.
MRDP–Twirwaneho ikomeje kugaragara nk’imwe mu mitwe ifite imbaraga muri utu duce tw’imisozi, aho ifite ubumenyi bwimbitse bw’aho ikorera n’uburyo bwo guhangana n’ingabo zisanzwe.
Ku rundi ruhande, ibikorwa bya FARDC bifatanyije n’ingabo z’u Burundi n’indi mitwe irimo FDLR, Wazalendo n’Imbonerakure byakomeje guteza impaka, cyane cyane ku birego bivuga ko hari ibikorwa byibasira abaturage b’Abanyamulenge, ibintu bikomeza kongera umwuka mubi n’ubwumvikane buke mu karere.
Gutsindwa kw’ingabo za Leta n’abafatanyabikorwa bazo mu bice bitandukanye mu gihe gito byatumye hibazwa ku mikorere yazo, cyane cyane ku bijyanye n’amakuru y’ibanze (intelligence) ndetse n’imitegurire y’ibitero.
Hari abasesenguzi bavuga ko kuba batamenya neza imiterere y’aho barwanira biri mu bituma bahura n’ibihombo bikomeye.
Ku baturage bo muri aka karere, uyu munsi wabaye nk’undi mutwaro mushya wiyongera ku buzima busanzwe bugoye. Abenshi bahora bahunga, babura aho bakinga umusaya, mu gihe abandi babura ibiribwa n’ubuvuzi kubera umutekano muke ukomeje kwiyongera.
Uko imirwano ikomeza kwiyongera mu bice bya Minembwe, Bijombo na Uvira, birushaho kugaragara ko ikibazo cy’umutekano mu burasirazuba bwa Congo kidashobora gukemurwa n’amasasu gusa.
Abasesenguzi n’imiryango mpuzamahanga bakomeje kugaragaza ko hakenewe ibiganiro bya politiki n’ubuhuza bwimbitse, aho impande zose zirebwa n’iki kibazo zagira uruhare mu gushaka amahoro arambye.
Ibi bitero byabaye mu munsi umwe gusa byerekanye neza ko urugamba rukomeje gufata indi ntera, kandi ko amahoro akiri kure mu karere kamaze imyaka myinshi karazahajwe n’intambara zidashira. Mu gihe nta gisubizo gifatika kiraboneka, abaturage bakomeje kuba ari bo bahura n’ingaruka zikomeye z’iyi mirwano ikomeje guhindura ubuzima bwabo umunsi ku wundi.
Tubibutse ko mushobora gukomeza kudukurikirana ku mbuga nkoranyambaga.
Kanda hano udukurikirane kuri Facebook, Hano udukurikirane kuri WhatsApp
