Inkuru y’ifatwa rya Niyigaba Clement uzwi nka DC Clement ku mbuga nkoranyambaga yakomeje kuvugisha benshi, ikomatanya ibijyanye n’ikoreshwa ry’ubutaka, kubahiriza amategeko ndetse n’uruhare rw’imbuga nkoranyambaga mu kugaragaza ibibazo by’abaturage.
Byatangiye ubwo uyu mugabo yasangizaga abamukurikira amashusho y’inzu ye iri gusenywa, agaragaza ko yari afite ibyangombwa byo kubaka ishuri ariko agatungurwa n’uko ubuyobozi bw’Akarere ka Gasabo bwohereje abasenya batigeze banamuganiriza ku kibazo.
Mu byo yatangaje, Niyigaba yavuze ko yari yanasabye ubuyobozi kumwemerera kwisenyera ku bushake bwe, ariko ngo ntibyubahirizwa, bigatuma ibikorwa byo gusenya bikorwa ku buryo atishimiye.
Icyakora, ubuyobozi bw’Umujyi wa Kigali bwahakanye iby’iyo nyubako yubatswe mu buryo bwemewe. Umuvugizi wabwo, Emma Claudine Ntirenganya, yasobanuye ko icyangombwa Niyigaba yari afite cyari icyo gusana igice cy’inzu ishaje, inkuta ebyiri no gusimbuza amabati, aho kuba icy’ubwubatsi bushya cyangwa guhindura imiterere y’inyubako.
Ibi byahise bituma ikibazo kirushaho gufata indi ntera, cyane cyane nyuma y’uko amashusho akwirakwiye ku mbuga nkoranyambaga, bamwe mu baturage bagaragaza impungenge ku buryo amategeko yubahirizwa, abandi bagasaba ko hakazwa igenzura ku iyubakwa ry’inyubako mu mujyi.
Nyuma y’iyi nkubiri y’amakuru, Urwego rw’Ubugenzacyaha (RIB) rwatangaje ko rwataye muri yombi Niyigaba Clement. Umuvugizi warwo, Dr. Murangira B. Thiery, yemeje ko afunzwe akekwaho ibyaha birimo kwangiza ikintu cy’undi no kurwanya ububasha bw’amategeko.
Amategeko ahana ibyaha mu Rwanda agaragaza ko ushishikariza abandi kwigomeka ku mabwiriza y’amategeko aba akoze icyaha, gishobora guhanishwa igifungo kiri hagati y’imyaka itanu n’irindwi, kikiyongera bitewe n’ingaruka cyateye. Nanone, kwangiza umutungo w’undi nabyo bihanishwa igifungo n’ihazabu, bitewe n’uburemere bw’icyaha.
Iki kibazo kije cyiyongera ku zindi mpaka zisanzwe zivugwa ku micungire y’imiturire n’imitunganyirize y’umujyi wa Kigali, aho ubuyobozi bukomeje gushimangira ko kubaka bitemewe bidashobora kwihanganirwa, mu rwego rwo kurengera umutekano n’iterambere rirambye.
Tubibutse ko mushobora gukomeza kudukurikirana ku mbuga nkoranyambaga.
Kanda hano udukurikirane kuri Facebook, Hano udukurikirane kuri WhatsApp
