Umuryango wa Afurika Yunze Ubumwe (AU) ukomeje kongera imbaraga mu gukemura amakimbirane hagati y’ibihugu binyuze mu nzira z’amahoro, aho wahaye Ambasaderi Albert Shingiro wahoze ari Minisitiri w’Ububanyi n’Amahanga w’u Burundi inshingano nshya zikomeye ku rwego mpuzamahanga.
Mu itangazo ryashyizwe ahagaragara ku wa 25 Werurwe 2026, AU yemeje ko Shingiro yagizwe intumwa idasanzwe izafasha mu ishyirwa mu bikorwa ry’icyemezo cyafashwe n’Urukiko Mpuzamahanga ku makimbirane amaze igihe hagati ya Gabon na Guinée-Equatoriale.
Aya makimbirane ashingiye ahanini ku mipaka y’ubutaka n’inyanja ndetse n’ubusugire ku birwa bya Mbanié, Conga na Cocoteros, bikunze guteza impaka hagati y’ibi bihugu byombi.
Izi nshingano zije zikurikira ibiganiro byabaye ku wa 14 Gashyantare 2026 byahuje impande zombi biyobowe na AU, aho Gabon na Guinée-Equatoriale byongeye kugaragaza ubushake bwo kubahiriza icyemezo cy’urukiko mu mahoro no mu bufatanye.
Ni icyemezo cyafashwe mbere ku wa 19 Gicurasi 2025, kigamije gushyiraho umurongo uhamye w’imipaka no gukemura burundu ayo makimbirane.
Mu nshingano nshya, Shingiro azibanda ku guhuza impande zombi binyuze mu biganiro, bigamije kumvikana ku buryo bwimbitse bwo gushyira mu bikorwa icyemezo cy’urukiko, hubahirizwa amahame n’amasezerano shingiro ya AU.
Ibi biganiro biteganyijwe kuzaba urufunguzo mu gukumira ko ayo makimbirane yakongera kubyara umwuka mubi cyangwa se amakimbirane ashobora guhungabanya umutekano w’akarere.
Perezida wa Komisiyo ya AU, Mahmoud Ali Youssouf, yagaragaje icyizere gikomeye afitiye Shingiro, ashingiye ku bunararibonye bwe mu bijyanye n’ububanyi n’amahanga.
Yavuze ko ategereje ko azagira uruhare rukomeye mu guteza imbere ituze, ubufatanye n’imibanire myiza hagati ya Gabon na Guinée-Equatoriale.
Ambasaderi Albert Shingiro si mushya mu rwego rwa dipolomasi, kuko yabaye Minisitiri w’Ububanyi n’Amahanga w’u Burundi hagati ya 2020 na 2025, mbere yo gusimburwa na Edouard Bizimana mu mpinduka zakozwe na Perezida Evariste Ndayishimiye. Ubu burambe bwe mu kazi ka dipolomasi ni bwo AU ishingiraho imwizeza izi nshingano zikomeye.
Ishyirwaho rya Shingiro rishimangira uburyo AU ikomeje guharanira ko ibibazo by’amakimbirane muri Afurika bikemurwa n’Abanyafurika ubwabo, binyuze mu biganiro n’amategeko mpuzamahanga, aho gukoresha imbaraga za gisirikare. Ni intambwe igamije kubaka Afurika irangwa n’amahoro arambye n’ubufatanye hagati y’ibihugu biyigize.
Tubibutse ko mushobora gukomeza kudukurikirana ku mbuga nkoranyambaga.
Kanda hano udukurikirane kuri Facebook, Hano udukurikirane kuri WhatsApp
