Mu gihe mu Burasirazuba bwa Repubulika Iharanira Demokarasi ya Congo hakomeje kugaragaramo umwuka mubi w’umutekano muke, umutwe wa MRDP-Twirwaneho watangaje ko uhangayikishijwe cyane n’ibitero bikomeje kugabwa ku basivili b’Abanyamulenge batuye mu gace ka Minembwe.
Ibi byagarutsweho mu itangazo ryashyizwe ahagaragara ku wa 25 Werurwe 2026, aho uyu mutwe wagaragaje ko mu minsi ishize hagabwe ibitero bikomeye hifashishijwe indege zitagira abapilote (drone), byahitanye abantu benshi ndetse bigakomeretsa abandi.
Uretse ubuzima bw’abaturage bwahatikiriye, iri tangazo rinavuga ko ibyo bitero byanasenye ibikorwa remezo birimo insengero ndetse na radiyo Tuungane, imwe mu zari zisanzwe zifasha abaturage kubona amakuru no gusangira ibitekerezo.
MRDP-Twirwaneho ishinja ihuriro ry’ingabo zikorana n’ubutegetsi bwa Kinshasa kuba inyuma y’ibi bitero, ivuga ko ari ugukomeza kurenga ku gahenge kari karashyizweho mu rwego rwo guhosha imirwano imaze igihe mu burasirazuba bw’iki gihugu. Iyi mvugo ije yiyongera ku bindi birego bimaze igihe bishyirwa ku ruhande rwa Leta ya Congo, bishinjwa kutubahiriza amasezerano agamije kugarura amahoro.
Abaturage bo muri utu duce bavuga ko uretse ubwicanyi, ubuzima bwabo bwarushijeho kuzahara bitewe no kwangirika kw’imitungo yabo. Amatungo arimo inka n’andi matungo magufi yarapfuye cyangwa aranyagwa, mu gihe imyaka yari igeze igihe cyo gusarurwa nayo yangiritse. Ibi bishobora guteza ikibazo gikomeye cy’inzara n’ubukene, cyane cyane ku miryango isanzwe ibayeho mu buzima bworoheje.
Amakuru atangwa na MRDP-Twirwaneho agaragaza ko igiteye impungenge kurushaho ari uko ibi bitero byiyongereye mu gihe ibiganiro by’amahoro byari bimaze gutangira, ibintu uyu mutwe ubona nko kubangamira inzira y’amahoro no gushaka gukomeza guhohotera abasivili.
Mu gusaba ubutabazi, MRDP-Twirwaneho yahamagariye umuryango mpuzamahanga kudaceceka kuri ibi bikorwa, ahubwo ugashyira igitutu ku babigizemo uruhare kugira ngo baryozwe ayo mahano. Igaragaza ko kutagira icyo ukora ku ruhande rw’amahanga bishobora gutuma ikibazo kirushaho gukomera no gufata indi ntera.
Nubwo bimeze bityo, uyu mutwe wongeye gushimangira ko uzakomeza kurinda abasivili n’ibyabo, usaba ko habaho ubufatanye mu gushaka ibisubizo birambye byazana amahoro arambye muri aka gace kamaze igihe karazahajwe n’intambara n’amakimbirane ashingiye ku moko n’inyungu za politiki.
Ibi bibaye mu gihe ikibazo cy’umutekano muke mu burasirazuba bwa Congo gikomeje kuba ingorabahizi, aho impande zitandukanye zikomeje gushinjanya ibikorwa by’ubugizi bwa nabi, mu gihe abasivili ari bo bakomeje kuba ibitambo by’aya makimbirane.
Tubibutse ko mushobora gukomeza kudukurikirana ku mbuga nkoranyambaga.
Kanda hano udukurikirane kuri Facebook, Hano udukurikirane kuri WhatsApp
