Umunyarwandakazi utazi gusoma neza yakatiwe nyuma yo gufatirwa mu mugambi wo kwiba arenga miliyoni 280 Frw muri banki
Mu gihugu cya Uganda, inkuru y’umutekano muke mu rwego rw’imari yongeye kugarukwaho cyane nyuma y’uko Umunyarwandakazi Elizabeth Mbabazi akatiwe igifungo cy’amezi atandatu azira uruhare mu mugambi wo gushaka kwiba amafaranga menshi muri banki.
Icyemezo cyafashwe n’urukiko rukorera mu bwami bwa Buganda, cyakurikiye iperereza ryagaragaje ko Mbabazi yari mu itsinda ry’abantu bagerageje gucucura Stanbic Bank amafaranga angana na miliyoni 725 z’amashilingi ya Uganda, asaga miliyoni 280 z’amafaranga y’u Rwanda.
Nk’uko byagaragajwe mu iburanisha, uyu mugambi wari ugamije kwibasira ishami rya banki riri mu nyubako izwi nka Acacia Mall i Kampala. Abaregwa bagerageje kubikuza amafaranga aruta ayo bari bafite bakoresheje inyandiko mpimbano, zirimo indangamuntu z’impimbano.
Mu bikorwa bye, Mbabazi yari yiyise Enid Kukunda, akoresheje umwirondoro utari uwe mu gushaka kuyobya uburari.
Mu rukiko, Mbabazi yemeye icyaha, anagaragaza ko yashowe muri uwo mugambi n’umugore witwa Flower Njawuzi. Yavuze ko yari yemerewe guhabwa amashilingi miliyoni 10 mu gihe umugambi wagerwaho.
Yagize ati: “Ntabwo nari nzi ko inyandiko dukoresha ari impimbano kuko ntazi gusoma neza.”
Ibi byatumye urukiko rufata icyemezo cyo kumugabanyiriza ibihano hashingiwe ku kuba yaratanze ubufatanye mu iperereza.
Abandi bantu bakekwaho uruhare muri uyu mugambi barimo Faridah Kobusingye, Flower Njawuzi na Joel Mucunguzi bo bakomeje guhakana ibyaha byose baregwa.
Urubanza rwabo ruzakomeza kuburanishwa ku wa 13 Mata 2026, aho biteganyijwe ko hazasuzumwa ibimenyetso birambuye by’ubushinjacyaha.
Iyi dosiye yongeye kugaragaza ubukana bw’ibyaha byifashisha inyandiko mpimbano mu rwego rw’imari mu karere ka Afurika y’Iburasirazuba. Inzobere zigaragaza ko hakenewe kongera ingamba zo kugenzura imyirondoro y’abakiliya n’imikorere ya banki, cyane cyane mu mijyi minini.
Tubibutse ko mushobora gukomeza kudukurikirana ku mbuga nkoranyambaga.
Kanda hano udukurikirane kuri Facebook, Hano udukurikirane kuri WhatsApp
