Mu gihe akarere k’Ibiyaga Bigari gakomeje kuba mu mwuka mubi w’umutekano muke, amakuru mashya aravuga ko umujyi wa Uvira uri mu Burasirazuba bwa Repubulika Iharanira Demokarasi ya Congo ushobora kuba uri kwinjira mu cyiciro gishya cy’intambara ishobora no gukwira mu bihugu bihana imbibi.
Amakuru aturuka mu nzego zitandukanye z’umutekano aravuga ko hari igitero kinini kiri gutegurwa, aho bivugwa ko ingabo zisaga ibihumbi 10 zimaze kwegeranywa muri aka gace.
Muri izo ngabo harimo abarwanyi b’umutwe wa FDLR bagera ku 2,700, abasirikare b’u Burundi basaga 4,000, hamwe n’imitwe ya Mai-Mai, Wazalendo ndetse n’abacanshuro baturutse mu bihugu by’amahanga.
Abasesenguzi bavuga ko uku kwegeranya ingabo kutari ukw’ubwirinzi busanzwe, ahubwo ari igikorwa cyagutse gishobora kuganisha ku ntambara yeruye.
Ibi bikomeje gufatwa nk’ikimenyetso cy’uko ubuyobozi bwa Kinshasa bushobora kuba bugerageza gusubiramo uburyo bwakoreshejwe mu bitero byabereye i Goma, ariko kuri iyi nshuro bikaba bishobora kuba bifite ingaruka zikomeye kurushaho.
Amakuru aturuka i Bujumbura avuga ko Perezida w’u Burundi, Evariste Ndayishimiye, yaba yarijeje ubuyobozi bwa Congo ubufasha mu bikorwa bya gisirikare, ndetse ko Uvira ifatwa nk’ahantu heza ho gutangiriza ibikorwa bishobora guhungabanya umutekano w’u Rwanda, bitewe n’uko yegereye imbibi zarwo.
Icyakora, hari amakuru yizewe avuga ko inzego z’ubutasi z’u Burundi zagaragaje impungenge zikomeye kuri iyi gahunda, ziburira ko kwimura intambara ikegera u Rwanda ndetse n’u Burundi bishobora guteza akaga gakomeye ku mutekano w’akarere kose. Nubwo bimeze bityo, bivugwa ko Perezida Ndayishimiye atigeze ahindura icyemezo cye, bitewe n’igitutu kinini cyaturutse i Kinshasa.
Ikindi gikomeje gutera impungenge ni uko intwaro ziremereye zirimo imbunda za rutura (artillery) zimaze koherezwa muri Uvira, ibintu abasesenguzi bafata nk’ikimenyetso cy’uko imirwano ishobora gutangira mu gihe cya vuba.
Ibi byose bije byiyongera ku mateka mabi y’intambara zimaze igihe mu Burasirazuba bwa Congo, aho ibikorwa bya gisirikare bikunze gukurura ingaruka zikomeye ku baturage, zirimo guhunga, ubwicanyi ndetse n’ihungabana rikabije.
Ku ruhande rw’u Rwanda, ibi bikorwa bikomeje gukurikiranwa hafi cyane, cyane ko byaba bifite ingaruka zitaziguye ku mutekano warwo. Abasesenguzi bavuga ko mu gihe iyi gahunda yashyirwa mu bikorwa, ishobora gutuma intambara yaguka ikagera ku rwego rwo hejuru, igahungabanya umutekano w’akarere kose.
Mu gihe amahanga akomeje guhamagarira impande zose kwirinda gukoresha ingufu za gisirikare, biragaragara ko ibintu bishobora gukomera kurushaho mu minsi iri imbere, cyane cyane niba nta biganiro bya dipolomasi byihuse bibayeho.
Uvira ishobora kuba igiye kuba isibaniro rishya ry’akaga, rikaba rishobora no guhindura isura y’intambara imaze igihe mu Burasirazuba bwa Congo.
Abaturage bo muri aka gace n’ab’akarere kose bakomeje gutegereza bareba uko ibintu bizagenda, mu gihe impungenge zikomeje kwiyongera ku hazaza h’umutekano wabo.
Perezida Félix Tshisekedi arashinjwa n’abasesenguzi kongera gukoresha uburyo bwamaze kugaragara ko butagize umusaruro, bwagize uruhare rukomeye mu gutuma umujyi wa Goma ufatwa n’umitwe yitwaje intwaro wa M23.
Nk’uko byagenze icyo gihe, kwishingikiriza ku mitwe itandukanye idafite umurongo umwe, irimo abarwanyi ba FDLR, Mai-Mai na Wazalendo, hamwe n’abafatanyabikorwa baturutse hanze barimo n’ingabo z’u Burundi, bigaragazwa nk’ikibazo gikomeye cy’imiyoborere n’imikorere ya gisirikare idahuye.
Abahanga mu bya gisirikare bavuga ko ubu buryo bwo guhuriza hamwe ingabo zidafite icyerekezo kimwe bushobora kongera guteza akavuyo ku rugamba aho kugera ku ntsinzi.
Byongeye kandi, nk’uko byagaragaye mu rugamba rwa Goma, gushyira imbere imbaraga za gisirikare aho gushyira imbaraga mu biganiro bya dipolomasi no gushakira umuti urambye ikibazo, bishobora kongera gushyira mu kaga umutekano w’akarere.
Abasesenguzi bemeza ko gusubiramo aya makosa bishobora gutuma Uvira na yo ihinduka ikibuga cy’imirwano gikomeye, kikagira ingaruka nk’izabaye i Goma cyangwa se zikarushaho kuba mbi, cyane cyane ko kuri iyi nshuro hari ibimenyetso by’uko hifashishwa n’intwaro ziremereye kurushaho.
Tubibutse ko mushobora gukomeza kudukurikirana ku mbuga nkoranyambaga.
Kanda hano udukurikirane kuri Facebook, Hano udukurikirane kuri WhatsApp
