Ku gicamunsi cyo kuri uyu wa Gatatu, tariki ya 18 Werurwe 2026, Perezida wa Repubulika y’u Rwanda, Paul Kagame, yakiriye mu biro bye intumwa ziyobowe na David A. Bednar, umwe mu bayobozi bakuru b’Itorero The Church of Jesus Christ of Latter-day Saints, bari mu ruzinduko rw’akazi mu Rwanda.
Ibi biganiro byabereye mu biro bya Perezida byibanze ku gushimangira ubufatanye hagati y’u Rwanda n’iri torero rifite ibikorwa bikomeye hirya no hino ku Isi, cyane cyane mu guteza imbere imibereho myiza y’abaturage, uburezi, ndetse n’iterambere ry’ubukungu.
Nk’uko byatangajwe n’impande zombi, Perezida Kagame na Bednar baganiriye ku ndangagaciro zihuriweho zirimo gukorera abaturage, guteza imbere uburezi bufite ireme, no gushyigikira ibikorwa bigamije kuzamura imibereho y’abaturage.
Mu kiganiro cyabo, bashimangiye ko uburezi ari imwe mu nkingi z’iterambere rirambye, bityo hakenewe ubufatanye bw’inzego zitandukanye zirimo amadini, leta n’abafatanyabikorwa mpuzamahanga kugira ngo hagerwe ku iterambere rifatika.
Itorero The Church of Jesus Christ of Latter-day Saints rizwi cyane ku Isi hose, rifite abayoboke barenga miliyoni 17.5, rikaba rimaze igihe rikora ibikorwa by’ubugiraneza n’iterambere mu bihugu byinshi.
Ryashinzwe mu 1830 na Joseph Smith mu mujyi wa New York muri Leta Zunze Ubumwe za Amerika, rikaba rifite icyicaro gikuru i Salt Lake City muri Leta ya Utah. Abayoboke baryo bemera Bibiliya ndetse n’igitabo cy’Aba-Mormon, bagahamya ukwemera kwabo kuri Yesu Kristo nk’Umukiza.
Uru ruzinduko rw’izi ntumwa rufatwa nk’intambwe ikomeye mu gukomeza umubano hagati y’u Rwanda n’imiryango mpuzamahanga ishingiye ku myemerere ya gikirisitu, cyane cyane mu bijyanye n’iterambere rirambye.
U Rwanda rusanzwe rufite politiki yo gukorana n’amadini mu bikorwa by’iterambere, aho amadini agira uruhare rukomeye mu burezi, ubuvuzi no gufasha abatishoboye. Ibi biganiro rero bishobora gutuma habaho imishinga mishya izibanda ku rubyiruko, uburezi n’imibereho myiza.
Abasesenguzi bagaragaza ko gukomeza ubufatanye nk’ubu bishobora kongera amahirwe ku Banyarwanda, cyane cyane mu bijyanye n’ishoramari mu burezi no mu bikorwa by’ubugiraneza.
Kwakira intumwa zituruka mu itorero rikomeye nka The Church of Jesus Christ of Latter-day Saints byerekana ko u Rwanda rukomeje kuba igihugu gifunguye ku bufatanye mpuzamahanga, kandi gifite icyerekezo cyo guteza imbere imibereho myiza y’abaturage bacyo binyuze mu bufatanye n’inzego zitandukanye.
Mu gihe u Rwanda rukomeje gushyira imbere gahunda zo kwihutisha iterambere, ubufatanye n’imiryango ifite ubunararibonye mu bikorwa by’imibereho myiza n’uburezi bukomeje gufatwa nk’inkingi ikomeye izafasha kugera kuri iyo ntego.
Tubibutse ko mushobora gukomeza kudukurikirana ku mbuga nkoranyambaga.
Kanda hano udukurikirane kuri Facebook, Hano udukurikirane kuri WhatsApp
