Mu gihe intambara ikomeje gufata indi ntera hagati ya Iran, Israel na Leta Zunze Ubumwe za Amerika, inkuru y’akababaro n’uburakari yongeye gusakara ku Isi hose, nyuma y’uko Leta ya Iran yemeje urupfu rwa Dr. Ali Larijani, wari Umunyamabanga w’Inama y’Umutekano y’icyo gihugu.
Uyu muyobozi w’inararibonye yiciwe mu gitero gikomeye cyagabwe mu murwa mukuru Tehran, mu ijoro ryo ku wa 16 rishyira uwa 17 Werurwe 2026, igitero Iran ishinja ingabo za Israel ko ari zo zagikoze.
Amakuru y’urupfu rwe yemejwe binyuze ku rubuga rwe rwa X, aho ubutumwa bwuje amarangamutima bwatangajwe bugira buti: “Baturage ba Iran, Abasilamu n’ababohowe bose ku Isi, umukozi w’Imana yasanze Umwami nk’uwahowe ukwemera.” Ibi byahise bifatwa nk’itangazo ryemeza ko Larijani yitabye Imana nk’intwari y’igihugu.
Urupfu rwa Larijani ntirwaje rwonyine. Yisanze mu mubare w’abandi bayobozi bakomeye bamaze kwicwa muri iyi ntambara, barimo na Ali Hosseini Khamenei wahoze ari Umuyobozi w’Ikirenga wa Iran, wishwe mbere y’ibi bitero bikomeje gukaza umurego.
Nyuma y’aya makuru, umutwe w’ingabo zidasanzwe za Iran uzwi nka IRGC wahise utangaza ko watangiye ibikorwa byo kwihorera.
Mu itangazo ryayo, yavuze ko ibitero byatangiye kugabwa muri Israel mu rwego rwo guhorera Larijani ndetse na Gholamreza Soleimani, wari Umuyobozi w’umutwe wa Basij, na we wapfuye uwo munsi.
Ibi byahise byerekana ko iyi ntambara iri kugana ku rwego rukomeye kurushaho, aho buri ruhande rushaka kwerekana imbaraga zarwo, rutitaye ku ngaruka ku baturage n’umutekano w’akarere.
Perezida wa Iran, Massoud Pezeshkian, ni we washyize Larijani kuri uyu mwanya ukomeye muri Kanama 2025. Icyo gihe, yari yanahawe inshingano zo guhagararira Umuyobozi w’Ikirenga mu Nama y’Umutekano, ibintu byamugize umuntu w’ingenzi cyane mu byemezo bya politiki n’umutekano.
Larijani yari asanzwe ari umwe mu banyapolitiki bafite ubunararibonye bukomeye muri Iran. Yigeze kuyobora itsinda ryaganiraga ku ikoreshwa ry’ingufu za nucléaire hagati ya 2005 na 2007, ndetse aba na Perezida w’Inteko Ishinga Amategeko kuva mu 2008 kugeza mu 2020.
Nyuma y’urupfu rwa Khamenei, amakuru atandukanye yavugaga ko Larijani yari amaze gufata inshingano zisa n’iz’Umuyobozi w’Ikirenga by’agateganyo, cyane cyane mu bijyanye no kuyobora ingamba z’intambara no gukoresha imbuga nkoranyambaga mu guhangana n’ibihugu byamurwanyaga.
Kuva tariki ya 28 Gashyantare 2026, ubwo intambara yeruye yatangiraga hagati ya Amerika, Israel na Iran, ibintu byakomeje kuzamba. Ibitero by’indege, misile ndetse n’intambara z’ikoranabuhanga byatumye Isi yose ihangayikishwa n’aho ibintu bishobora kugera.
Urupfu rwa Larijani ruje rwiyongera ku zindi mpfu z’abayobozi bakomeye, ibintu bishobora gutuma Iran irushaho gukaza ingamba zo kwihorera. Abasesenguzi mpuzamahanga bavuga ko ibi bishobora gutuma intambara irushaho gukwira mu karere kose k’Uburasirazuba bwo Hagati.
Ku ruhande rwa Israel, igisirikare cyayo cyatangaje ko Larijani yari amaze gufata inshingano zikomeye mu buyobozi bwa Iran nyuma y’urupfu rwa Khamenei, bityo akaba yari umwe mu bantu b’ingenzi bagombaga kwibasirwa mu rwego rwo kugabanya imbaraga z’uwo bahanganye.
Ibi byerekana ko ibitero biri kugabwa bitakiri ibyo guhangana gusa, ahubwo byamaze gufata isura yo gushaka gusenya burundu ubuyobozi bw’uwo bahanganye.
Ku baturage ba Iran, uru rupfu rwateje agahinda gakomeye ariko runatera n’uburakari. Imyigaragambyo n’ibikorwa byo gushyigikira ubuyobozi bw’igihugu byatangiye kugaragara hirya no hino, abaturage basaba ko igihugu cyabo cyihorera byihuse.
Ku rwego mpuzamahanga, ibihugu byinshi byatangiye guhamagarira impande zombi kugabanya umwuka mubi no gushaka inzira y’ibiganiro. Gusa, uko ibintu bihagaze ubu, biragaragara ko inzira y’amahoro ikiri kure.
Abasesenguzi bagaragaza ko urupfu rwa Larijani rushobora kuba impinduka ikomeye muri iyi ntambara, kuko yari umuntu w’ingenzi mu gufata ibyemezo no guhuza inzego zitandukanye z’umutekano.
Mu gihe ibikorwa byo kwihorera bikomeje gutangazwa na Iran, haribazwa niba ibi bitazakurura indi mirwano ikomeye kurushaho, ishobora no kugera ku rwego rw’intambara y’Isi yose.
Iyi ntambara irimo kwinjira mu cyiciro gishya, aho kwica abayobozi bakuru b’ibihugu bihanganye biri kuba nk’ingamba zisanzwe z’intambara, ibintu byongera impungenge ku hazaza h’umutekano w’Isi.
Urupfu rwa Dr. Ali Larijani si igihombo kuri Iran gusa, ahubwo ni ikimenyetso gikomeye cy’uko iyi ntambara iri kugenda irushaho gukara no gufata indi ntera ishobora kugira ingaruka ku Isi yose. Icyizere cy’amahoro kiracyari gike, mu gihe imbunda zikomeje kuvuga.
Tubibutse ko mushobora gukomeza kudukurikirana ku mbuga nkoranyambaga.
Kanda hano udukurikirane kuri Facebook, Hano udukurikirane kuri WhatsApp
