Intambara iri hagati ya Iran ku ruhande rumwe na Leta Zunze Ubumwe za Amerika na Israel ku rundi ruhande ikomeje gukaza umurego, mu gihe ibitero by’indege n’ibisasu bya misile bikomeje kwibasira ibice bitandukanye byo mu Burasirazuba bwo Hagati.
Ni mu gihe Iran yamaze kubona umuyobozi mushya w’ikirenga, Mojtaba Khamenei, wasimbuye se Ayatollah Ali Khamenei uherutse kwicwa mu bitero byagabwe kuri iki gihugu.
Mu masaha ashize, abaturage bo mu murwa mukuru wa Iran, Tehran, n’umujyi mutagatifu wa Qom bavuze ko bumvise ibisasu byinshi nyuma y’ibitero by’indege byagabwe na Israel hamwe n’ingabo za Amerika. Ibi bitero byibanze cyane ku bikorwaremezo by’ingufu zirimo inganda za peteroli, aho umwotsi mwinshi uvugwa ko wangije ikirere cyo mu murwa mukuru.
Umuvugizi wa Minisiteri y’Ububanyi n’Amahanga ya Iran, Esmaeil Baghaei, yavuze ko igihugu cye kiri mu ntambara kitihitiyemo, ahubwo ko cyayitewe. Yashinje Amerika na Israel gushaka gusenya igihugu cya Iran no kwigarurira umutungo wacyo wa peteroli.
Yagize ati: “Intego yabo ni ugucamo ibice igihugu cyacu bakigarurira umutungo wacu wa peteroli no guhungabanya ubusugire bwacu.”
Yakomeje avuga ko Iran izakomeza kwirwanaho kugeza igihe ibitero by’amahanga bizahagarara.
Hagati muri ibi bibazo by’intambara, abayobozi bakuru ba Iran barimo ingabo, Guverinoma n’inteko ishinga amategeko bahise barahiza ubuyobozi bwa Mojtaba Khamenei, wabaye umuyobozi wa gatatu w’ikirenga wa Iran.
Perezida wa Iran, Masoud Pezeshkian, yavuze ko guhitamo uyu muyobozi mushya ari “ikimenyetso cy’ubushake bw’abaturage,” kandi ko azafasha igihugu gukemura ibibazo by’intambara n’ubukungu.
Ibihugu bimwe by’inshuti za Iran birimo u Burusiya na byo byahise byohereza ubutumwa bwo kumwifuriza imirimo myiza. Perezida w’u Burusiya Vladimir Putin yavuze ko yizeye ko azahuza Abanya-Iran mu bihe bikomeye igihugu kirimo.
Nubwo Iran ivuga ko irimo kwirwanaho, ibisasu bya misile n’indege zitagira abapilote (drones) byayo byakomeje kugera mu bindi bihugu byo mu karere.
Igihugu cya Qatar cyatangaje ko cyahagaritse misile 17 na drones esheshatu zoherejwe zivuye muri Iran, mu gihe nta muntu wahasize ubuzima.
Naho ingabo za NATO zatangaje ko zarashe misile yari igiye kugera muri Turukiya, ikaba ari inshuro ya kabiri mu cyumweru kimwe bibaye.
Hagati aho, Leta Zunze Ubumwe z’Abarabu (UAE) nazo zatangaje ko zahagaritse misile n’indege zitagira abapilote zaturutse muri Iran, mu gihe ibitero byabyo kuva intambara yatangira byageze kuri misile zirenga 250 na drones zirenga 1,400.
Hari kandi amakuru ateye inkeke ku bijyanye n’ingaruka z’intambara ku basivili. Amashusho mashya yasohotse agaragaza ko misile ya Amerika yo mu bwoko bwa Tomahawk ishobora kuba yaguye ku ishuri ry’abakobwa mu mujyi wa Minab muri Iran, igahitana abantu 175, benshi muri bo bakaba ari abana.
Mu gihugu cya Lebanon naho, ishami ry’Umuryango w’Abibumbye ryita ku bana (UNICEF) ryatangaje ko nibura abana 83 bamaze kwicwa mu cyumweru kimwe gishize mu bitero by’intambara hagati ya Israel na Hezbollah.
Iyi ntambara irimo no guteza ibibazo bikomeye ku bukungu bw’isi. Ibiciro bya peteroli byazamutse bikagera hejuru ya $119 ku ngunguru, bituma ibihugu bikomeye ku isi bihurira mu biganiro byihutirwa.
Ibihugu bigize G7 n’Ikigo Mpuzamahanga gishinzwe Ingufu (IEA) byatangiye gutekereza ku kurekura bimwe mu bubiko bwihutirwa bwa peteroli kugira ngo bigabanye izamuka ry’ibiciro ku isoko mpuzamahanga.
Mu gihe intambara ikomeje kwaguka, Perezida wa Lebanon Joseph Aoun yasabye ko habaho agahenge karambye hagati ya Israel na Hezbollah, anasaba ko ingabo za Lebanon zigenzura utundi turere twari turi mu maboko y’uyu mutwe.
Abasesenguzi mpuzamahanga bavuga ko iyi ntambara ishobora gukomeza igihe kirekire, cyane ko Iran ikomeje gukoresha drones zihendutse kandi zoroshye gukora, mu gihe Amerika na Israel byo bikomeje kugaba ibitero byibasira ibirindiro by’ingabo n’ibikorwaremezo.
Gusa benshi baraburira ko niba iyi ntambara itahagarara vuba, ishobora guteza umutekano muke mu karere kose k’Uburasirazuba bwo Hagati ndetse ikanagira ingaruka zikomeye ku bukungu bw’isi.
Tubibutse ko mushobora gukomeza kudukurikirana ku mbuga nkoranyambaga.
Kanda hano udukurikirane kuri Facebook, Hano udukurikirane kuri WhatsApp
