Mu gihe umwuka w’intambara mu Burasirazuba bwo Hagati ukomeje gututumba, Israel yagabye ibitero ku birindiro bya Hezbollah na Hamas muri Liban, mu gihe Leta Zunze Ubumwe za Amerika yohereje indege zirenga 50 z’intambara muri ako karere, bikaba bishobora gutera umwuka mubi ugera ku rwego rwo gukwirakwira mu ntambara hagati ya Iran na Amerika.
Ku wa Gatanu, Igisirikare cya Israel cyagabye ibitero bikomeye mu Majyepfo n’Uburasirazuba bwa Liban, bihitana abantu 10 barimo umuyobozi ukomeye wa Hezbollah, abandi 50 barakomeretse. Ibi bitero byibasiye ibirindiro by’uyu mutwe mu gace ka Baalbek ndetse no mu Majyepfo ya Ain al-Hilweh.
Igisirikare cya Israel (IDF) cyatangaje ko ibitero bya mbere byagabwe ku bigo bitatu by’ubuyobozi bya Hezbollah yari imaze iminsi yitegura kugaba ibisasu bya missile kuri Israel.
Mu itangazo ryashyizwe hanze ku itariki 21 Gashyantare, igisirikare cyavuze ko: “Twakuyeho burundu ahantu hatatu hatandukanye umutwe w’iterabwoba wa Hezbollah wateguriraga ibisasu bya missile ushaka kugaba ibitero kuri Israel.”
Hezbollah yemeje ko abarwanyi bayo umunani bishwe, harimo n’umwe mu bayobozi bayo b’ingenzi, Hussein Mohammad Yaghi.
Byongeye, Igisirikare cya Israel cyagabye ikindi gitero ku kigo cy’ubuyobozi cya Hamas mu gace ka Ain al-Hilweh hafi y’inkambi icumbikiye impunzi z’Abanya-Palestine hafi y’Umujyi wa Sidon. Hamas yamaganye aya makuru ivuga ko ahibasiwe atari ku birindiro byayo, ahubwo ari ahakoreraga urwego rushinzwe umutekano w’iyo nkambi.
Perezida wa Liban, Joseph Aoun, yamaganye ibi bitero avuga ko ari “igikorwa gishya cyo guhonyora ubusugire bwa Liban no kurenga ku mategeko mpuzamahanga,” asaba ibihugu bishyigikiye amahoro mu karere no muri Amerika gushyira igitutu kuri Israel kugira ngo ihagarike ibyo bitero.
Ni mu gihe, indege zirenga 50 za gisirikare za Leta Zunze Ubumwe za Amerika zagaragaye mu kirere zerekeza mu Burasirazuba bwo Hagati.
BBC yatangaje ko izo ndege zavuye mu Burayi mu gihe cy’amasaha 24 yo ku itariki 20 Gashyantare 2026, harimo indege 31 zo mu bwoko bwa C-17 Globemaster III, izindi 7 zo mu bwoko bwa C-5 Galaxy, n’indege 9 zo mu bwoko bwa KC-135 Stratotanker zongerera izindi amavuta mu kirere. Hari kandi indege eshatu za F-22 Raptor fighter jets zavuye ku birindiro by’Ingabo za Amerika mu Bwongereza, zerekeza mu Burasirazuba bwo Hagati.
Byongeye, ubwato bwa gisirikare buzwi ku isi nka USS Gerald R Ford bwagaragaye buva mu Nyanja ya Atlantique bugana mu Nyanja ya Méditerranée, bikaba bishobora gufasha ibikorwa bya Amerika mu Burasirazuba bwo Hagati.
Umusesenguzi mu by’ingendo z’indege, Sam Wise, yavuze ko kugurutsa indege nyinshi ku munsi umwe “atari ikintu gisanzwe,” bikaba bishobora kuba igikorwa gikomeye ku gisirikare cy’igihugu icyo ari cyo cyose.
Umwuka mubi hagati ya Amerika na Iran warushijeho gukura mu ntangiriro z’uyu mwaka, nyuma y’imyigaragambyo ikomeye mu mijyi yo muri Iran mu Ukuboza 2025. Abaturage bari binubiraga ikiguzi cy’ubuzima cyari cyarazamutse n’ukugabanuka kw’agaciro k’ifaranga ryabo.
Perezida wa Amerika, Donald Trump, aherutse gutangaza ko yatanze iminsi iri hagati ya 10 na 15 ku nyirantarengwa Iran ngo amenye niba ibiganiro impande zombi ziri kugirana bizatanga umusaruro cyangwa bizasubira mu ntambara.
Iran imaze imyaka irenga mirongo itatu itanga inkunga ya gisirikare, amafranga n’amakuru y’ubutasi ku mutwe wa Hamas, umutwe w’Abanya-Palestine ukora ibikorwa by’intambara mu gace ka Gaza.
Nanone Iran ni umuterankunga w’ingenzi wa Hezbollah yo muri Liban; iyi mutwe wubatswe kandi ukomeza gushyigikirwa cyane n’Umutwe w’Abasirikare b’Ingabo z’Impinduramatwara za Iran (IRGC) mu buryo bw’amafaranga, intwaro n’ubumenyi bwa gisirikare.
Abasesenguzi bavuga ko iyi nkunga ya Iran ku mitwe ya Hamas na Hezbollah yabaye ihame muri politiki yayo yo kugera ku ntego zayo za gisirikare n’ubutwererane muri ako karere, kandi bituma ayo matsinda abona ubushobozi bwo gukora ibikorwa by’intambara cyangwa guhangana na Israel mu bihe by’umutekano mucye.
Tubibutse ko mushobora gukomeza kudukurikirana ku mbuga nkoranyambaga.
Kanda hano udukurikirane kuri Facebook, Hano udukurikirane kuri WhatsApp
