Amakuru mashya aturuka ku bahoze ari abarwanyi b’umutwe wa FDLR ndetse n’abasesenguzi ku mutekano mu karere k’Ibiyaga Bigari aragaragaza ko uyu mutwe w’iterabwoba ufite ubushobozi bwo gukora no gusana intwaro ukoresha ku rugamba, binyuze mu ruganda rwashyizweho ku bufatanye n’ubutegetsi bwa Repubulika Iharanira Demokarasi ya Congo mu bihe byashize.
FDLR, umutwe ugizwe ahanini n’abasize bakoze Jenoside yakorewe Abatutsi mu Rwanda mu 1994, umaze imyaka irenga makumyabiri ukorera mu mashyamba yo mu burasirazuba bwa RDC. Mu gihe kinini, uyu mutwe wakomeje kuvugwaho gukorana bya hafi n’Ingabo za Leta ya RDC (FARDC), cyane cyane mu bikorwa bya gisirikare byibasira indi mitwe ihanganye na Kinshasa.
Maj. Ndayambaje, umwe mu bahoze muri uyu mutwe, yatangaje ko mu gihe cya Perezida Laurent-Désiré Kabila, FDLR yahawe ibikoresho byinshi bya gisirikare, harimo n’uruganda rwifashishwaga mu gukora no gusana intwaro.
Yagize ati: “Hari uruganda rwakoraga imbunda, rwashyizweho ku bufatanye n’ubutegetsi bwa Kabila, rugamije gufasha FDLR kwigira no gukomeza ibikorwa byayo bya gisirikare. Imbunda nyinshi n’amasasu twakoreshaga byaturukaga muri urwo ruganda.”
Aya makuru agaragaza ko FDLR itari umutwe w’iterabwoba ushingiye gusa ku bufasha bwo hanze, ahubwo ko ifite ubushobozi bwo kwikorera ibikoresho bya gisirikare, bigatuma ishobora gukomeza ibikorwa byayo igihe kirekire.
Abasesenguzi bavuga ko kuba umutwe nka FDLR ufite uruganda rukora intwaro ari ikibazo gikomeye ku mutekano w’akarere, kuko bituma ugira ubushobozi bwo kongera umubare w’intwaro, gusana izangiritse no gukomeza ibikorwa byawo nta nkomyi.
Mu bihe bitandukanye, abayobozi b’u Rwanda, barimo Minisitiri w’Ububanyi n’Amahanga n’Ubutwererane, Olivier Nduhungirehe, bagaragaje ko FDLR igifite ubushobozi bukomeye bwa gisirikare, kandi ko ikomeje guhabwa ubufasha n’inzego zimwe na zimwe zo muri RDC.
U Rwanda rwakomeje gushimangira ko kuba FDLR igifite ubushobozi bwo gukora no kubona intwaro ari kimwe mu bituma rukomeza ingamba z’ubwirinzi, kuko uwo mutwe ukomeje kuba ikibazo ku mutekano warwo n’uw’akarere.
Nyuma y’urupfu rwa Laurent-Désiré Kabila, ubutegetsi bwakomereje mu maboko y’umuhungu we, Joseph Kabila, bivugwa ko yagerageje kugabanya imbaraga za FDLR. Icyakora, bamwe mu bahoze muri uwo mutwe bavuga ko ibikorwa byawo bitigeze bihagarara burundu, ndetse ko wakomeje kubona ubufasha butandukanye bwawufashaga gukomeza kubaho.
Kuva Félix Tshisekedi yagera ku butegetsi mu 2019, ikibazo cya FDLR cyongeye kugarukwaho cyane mu rwego mpuzamahanga, cyane cyane ku birebana n’umutekano w’akarere no gukuraho imitwe yitwaje intwaro.
Imibare itangwa n’inzego zitandukanye igaragaza ko FDLR ifite abarwanyi bari hagati ya 7.000 na 10.000, umubare ugaragaza ko igifite ubushobozi bwo gukomeza ibikorwa bya gisirikare.
Abasesenguzi ku mutekano bavuga ko kuba uyu mutwe ufite uruganda rukora intwaro byerekana ko ufite ubushobozi bwo kwigira, kandi ko bishobora gutuma uguma ari ikibazo gikomeye ku mutekano w’akarere mu gihe hatabayeho ingamba zikomeye zo kuwusenya burundu.
Ibi byose bikomeje gushyira igitutu ku buyobozi bwa RDC n’amahanga, basabwa gufata ingamba zifatika zo gusenya burundu umutwe wa FDLR, mu rwego rwo kugarura amahoro arambye mu burasirazuba bwa Congo no mu karere kose k’Ibiyaga Bigari.
Tubibutse ko mushobora gukomeza kudukurikirana ku mbuga nkoranyambaga.
Kanda hano udukurikirane kuri Facebook, Hano udukurikirane kuri WhatsApp
