Amakuru aturuka mu misozi miremire y’i Mulenge, mu Ntara ya Kivu y’Amajyepfo mu burasirazuba bwa Repubulika Iharanira Demokarasi ya Congo, aravuga ko imirwano ikomeye yongeye kubura hagati y’umutwe wa MRDP–Twirwaneho n’ingabo zifatanyije zirimo iza FARDC, iz’u Burundi, hamwe n’imitwe ya Wazalendo na FDLR. Iyi mirwano yabereye mu duce twa Gahwela na Point Zero, hafi y’umujyi wa Minembwe.
Nk’uko byatangajwe n’itangazamakuru ndetse n’abaturage bo muri ako gace, igitero cya mbere cyagabwe mu gace ka Gahwela, aho ingabo zaturutse muri Secteur ya Lulenge muri Teritwari ya Fizi zagerageje gusunika abarwanyi ba MRDP–Twirwaneho zibakura mu birindiro byabo. Icyakora, amakuru yemeza ko iki gitero cyahuye n’imbaraga zikomeye, bituma izo ngabo zisubira inyuma nyuma yo gutakaza abasirikare benshi n’ibikoresho bya gisirikare birimo imbunda n’amasasu.
Ku rundi ruhande, imirwano yo kuri Point Zero yatangiriye ku dusozi dukikije aka gace, aho uruhande rw’ingabo zifatanyije rwashakaga kwisubiza uduce twa Kalingi, Bidegu, Kalongi na Gakenge, twari twafashwe na MRDP–Twirwaneho mu mirwano yabaye ku wa 13 Gashyantare 2026. Abari hafi y’aho imirwano yabereye bavuga ko hakoreshwaga imbunda ziremereye n’izoroheje, ibintu byateje igihunga mu baturage benshi.
Nubwo umubare nyawo w’abaguye muri iyi mirwano utaratangazwa ku mugaragaro, amakuru y’ibanze agaragaza ko ingabo zifatanyije zahaburiye abasirikare benshi, bituma zisubira inyuma zigana mu mashyamba ari hafi ya Mutambara. Abaturage bavuga ko uru rugamba rwari rukomeye kurusha urwabaye mu minsi ishize, kandi ko rwongeye kwerekana ko umutekano ukomeje kuba muke muri aka karere.
Iyi mirwano ibaye nyuma y’igihe gito MRDP–Twirwaneho ifashe uduce twinshi two mu nkengero za Minembwe, ibintu byatumye ingabo za Leta n’abo bafatanyije bongera kwisuganya bagamije kubwisubiza. Kwinjira kw’ingabo z’u Burundi muri iyi mirwano bikomeje kuvugwaho cyane, aho bivugwa ko zifatanya na FARDC mu bikorwa byo kugenzura aka gace.
Mu misozi miremire y’i Mulenge hamaze imyaka myinshi habera amakimbirane ashingiye ku bibazo by’umutekano, ubutaka n’imibanire y’amoko atandukanye. Ibi byatumye aka gace gakomeza kuba indiri y’imirwano ihoraho, abaturage bagahora mu bwoba bwo kwimurwa cyangwa guhunga ingo zabo.
Abaturage benshi bavuga ko nubwo imirwano yo kuri uyu munsi yatuje, umwuka ukomeje kuba mubi kandi impande zose zikomeje kwisuganya. Hari impungenge ko hashobora kubaho indi mirwano mu minsi iri imbere.
Kugeza ubu, ubuyobozi bwa FARDC, ingabo z’u Burundi ndetse na MRDP–Twirwaneho ntiburagira icyo butangaza ku mugaragaro kuri iyi mirwano. Icyakora, abasesenguzi bagaragaza ko igisubizo kirambye kitazava mu mbaraga za gisirikare gusa, ahubwo ko hakenewe ibiganiro byimbitse bishobora kugarura amahoro n’umutekano urambye mu misozi miremire y’i Mulenge no mu nkengero za Minembwe.
Tubibutse ko mushobora gukomeza kudukurikirana ku mbuga nkoranyambaga.
Kanda hano udukurikirane kuri Facebook, Hano udukurikirane kuri WhatsApp
