Guverinoma y’u Burusiya yatangaje ko yahagaritse burundu ikoreshwa rya WhatsApp ku butaka bwayo, nyuma y’uko iyi serivisi yananiwe kubahiriza amabwiriza mashya yashyizweho agamije guha Leta ubushobozi bwo kugera ku makuru y’abayikoresha.
Iyi gahunda yatangajwe ku wa 12 Gashyantare 2026 n’Umuvugizi w’Ibiro bya Perezida w’u Burusiya, Dmitry Peskov, wavuze ko icyemezo cyo guhagarika WhatsApp cyafashwe nyuma y’uko sosiyete iyigenzura, Meta, itubahirije ibisabwa n’amategeko mashya y’iki gihugu.
Peskov yagize ati: “WhatsApp yahagaritswe kuko Meta iyigenzura yananiwe gukurikiza amabwiriza twari twayihaye. Ni yo mpamvu Guverinoma yahisemo guhagarika uru rubuga kugira ngo irinde inyungu z’igihugu n’umutekano w’amakuru y’abaturage.”
Nyuma yo guhagarika WhatsApp, ubuyobozi bw’u Burusiya bwahise bushishikariza abaturage gukoresha urubuga rushya rw’itumanaho rwiswe MAX, rwakozwe kandi rugenzurwa imbere mu gihugu.
Peskov yavuze ko uru rubuga rushya ari igisubizo kirambye ku kibazo cy’itumanaho, ashimangira ko MAX ifite ubushobozi bwo gutanga serivisi zizewe kandi zihuye n’amategeko y’igihugu.
Ati: “MAX ni urubuga rushya, ruteye imbere, rworoshye gukoresha kandi rurizewe kuko ari urwa Leta yacu. Turashishikariza abaturage bose gutangira kurukoresha kuko rwujuje ibisabwa byose.”
Amakuru aturuka mu nzego z’ikoranabuhanga mu Burusiya avuga ko MAX ifite ubushobozi bwo guhuza itumanaho risanzwe n’izindi serivisi za Leta, zirimo serivisi z’indangamuntu, kwishyura serivisi za Leta, ndetse no kubona amakuru y’ubuyobozi.
Nubwo Leta y’u Burusiya ivuga ko MAX igamije koroshya ubuzima bw’abaturage, hari impungenge zikomeje kugaragazwa n’impuguke n’abaturage ku bijyanye n’ibanga ry’amakuru yabo bwite.
Abasesenguzi benshi bavuga ko uru rubuga rushobora gukoreshwa nk’igikoresho cyo kugenzura abaturage no gukurikirana ibikorwa byabo bya buri munsi. Icyakora, Guverinoma y’u Burusiya yamaganye ibyo birego, ivuga ko MAX yashyizweho hagamijwe guteza imbere ikoranabuhanga ry’igihugu no kugabanya kwishingikiriza ku masosiyete yo mu mahanga.
Iki cyemezo kiri mu murongo wa politiki nshya y’u Burusiya yo guteza imbere “ubwigenge bw’ikoranabuhanga,” aho iki gihugu cyifuza kugenzura neza imiyoboro y’itumanaho ikoreshwa ku butaka bwacyo.
Mu myaka yashize, u Burusiya bwakajije amategeko agenga ikoreshwa ry’imbuga nkoranyambaga n’izitanga serivisi z’itumanaho zirimo Snapchat, Facebook, Instagram na YouTube, busaba izi sosiyete kubika amakuru y’abaturage imbere mu gihugu no kuyatanga igihe asabwe n’inzego z’umutekano.
Ibigo byanze kubahiriza aya mabwiriza byagiye bihura n’ibihano bikomeye, birimo gucibwa amande cyangwa guhagarikwa burundu.
WhatsApp yari imwe mu mbuga zikoreshwa cyane mu Burusiya, aho abarenga miliyoni 100 bayifashishaga mu kohererezanya ubutumwa, guhamagara, no gukora ibikorwa by’ubucuruzi.
Guhagarikwa kwayo biteganyijwe kugira ingaruka zikomeye ku buzima bwa buri munsi bw’abaturage, cyane cyane abakoresha WhatsApp mu kazi, ubucuruzi, no kuvugana n’imiryango yabo iri mu mahanga.
Hari kandi impungenge ko iki cyemezo gishobora kongera icyuho hagati y’u Burusiya n’ibihugu byo mu Burengerazuba, cyane cyane mu bijyanye n’ikoranabuhanga n’ubwisanzure bwo gutanga ibitekerezo.
Iki cyemezo kigaragaza neza umugambi w’u Burusiya wo kubaka sisiteme y’ikoranabuhanga yigenga, idashingiye ku masosiyete yo mu mahanga.
Abasesenguzi bavuga ko niba MAX izashobora gusimbura WhatsApp neza, bishobora gutuma u Burusiya bugera ku ntego yabwo yo kugenzura byuzuye itumanaho riri ku butaka bwabwo.
Icyakora, haracyari kwibazwa niba abaturage bazemera byoroshye uru rubuga rushya, cyangwa niba bazakomeza gushaka ubundi buryo bwo gukoresha serivisi z’itumanaho zo hanze mu buryo bwihishe.
Tubibutse ko mushobora gukomeza kudukurikirana ku mbuga nkoranyambaga.
Kanda hano udukurikirane kuri Facebook, Hano udukurikirane kuri WhatsApp
