Mu gihe ikibazo cy’umutekano n’uburenganzira bwa muntu gikomeje kugenda kivugwa cyane mu Burundi, Urukiko Rukuru rwa Cibitoke ruherereye mu majyaruguru y’uburengerazuba bw’igihugu, ku wa 3 Gashyantare 2026 rwakatiye Imbonerakure eshanu igifungo cy’umwaka, nyuma yo guhamywa icyaha cyo kubangamira umutekano w’igihugu n’ubusugire bwacyo.
Izi Mbonerakure, zigize urubyiruko rushamikiye ku ishyaka CNDD-FDD riri ku butegetsi, zakatiwe nyuma y’aho ubushinjacyaha bubashinje kujya bambuka mu buryo bunyuranyije n’amategeko berekeza muri Repubulika Iharanira Demokarasi ya Congo, bifashishije inzira z’ubusamo, mu bihe byari byaranzwe no gufungwa kw’umupaka w’ibihugu byombi.
Nk’uko byagaragajwe mu rukiko, izi Mbonerakure zafatanyaga mu bikorwa byo kwambutsa abaturage b’Abanye-Congo bari barabuze uko basubira iwabo nyuma y’ifungwa ry’umupaka mu Ukuboza 2025. Zambutsaga abo bantu umugezi wa Ruzizi, uhuza u Burundi na RDC, zikanambutsa n’ibicuruzwa bitandukanye birimo ibikomoka kuri peteroli, byose bikanyuzwa mu nzira zitemewe n’amategeko.
Perezida w’Urukiko Rukuru rwa Cibitoke, Sylvestre Mukeshimana, yavuze ko ibimenyetso byatanzwe n’ubushinjacyaha bihagije kandi byemeza ko aba basore bakoze ibyaha baregwa. Yabahamije icyaha cyo kubangamira umutekano w’igihugu, abakatira igifungo cy’umwaka umwe, ndetse anabaca ihazabu ingana n’ibihumbi 50 by’amafaranga y’u Burundi (Fbu).
Mu magambo ye, Mukeshimana yashimangiye ko ubutabera butazongera kurebera abakora ibyaha, anaburira ko umuntu wese uzarenga ku mategeko azajya akurikiranwa nta vangura iryo ari ryo ryose, yaba uwo mu mashyaka ari ku butegetsi cyangwa atariyo.
Iki cyemezo kije mu gihe Imbonerakure zimaze igihe zivugwaho ibikorwa by’ubugizi bwa nabi n’iterabwoba rikorerwa abaturage. Imiryango iharanira uburenganzira bwa muntu igaragaza ko mu mwaka wa 2025 wonyine, mu Burundi hishwe abantu barenga 400, aho abagera ku 110 bivugwa ko bishwe n’uru rubyiruko rushamikiye ku butegetsi, ariko ntihagire abaryozwa ibyo byaha.
Abasesenguzi babona iki cyemezo nk’intambwe idasanzwe, kuko Imbonerakure akenshi zitavugirwamo mu nkiko nubwo zivugwa mu bikorwa bikomeye byo guhungabanya umutekano n’uburenganzira bw’abaturage. Gusa bamwe bakomeza kwibaza niba iri fungwa ry’izi mbonerakure eshanu rizaba intangiriro y’ubutabera busesuye, cyangwa niba ari icyemezo cyihariye gishingiye ku bihe byihariye by’umutekano muke mu karere.
Perezida w’u Burundi, Évariste Ndayishimiye, yagaragaje ko atishimiye na busa ibikorwa byakozwe n’Imbonerakure zafashwe zijya muri Repubulika Iharanira Demokarasi ya Congo zinyuze mu nzira zitemewe.
Mu magambo ye yagiye agaruka ku gukaza umutekano no kubahiriza amategeko, Ndayishimiye yashimangiye ko nta muntu n’umwe uri hejuru y’amategeko, kandi ko ibikorwa bishobora guhungabanya umutekano w’igihugu cyangwa umubano n’ibihugu by’abaturanyi bidakwiye kwihanganirwa, kabone n’iyo byaba byakozwe n’abashamikiye ku ishyaka riri ku butegetsi.
Ibyakozwe n’izi Mbonerakure byafashwe nk’ibibangamira umurongo Perezida yari yarashyizeho wo gukomeza kugarura isura nziza y’u Burundi mu karere no ku rwego mpuzamahanga.
Mu gihe ubutegetsi bwe bwari buri gushyira imbaraga mu gukemura ibibazo by’umutekano no kunoza umubano n’igihugu cya Congo, ibikorwa byo kwinjira mu bundi buryo mu gihugu cy’abaturanyi byafashwe nk’ihungabana rikomeye ku migambi ya Leta, bituma ubuyobozi bukuru bw’igihugu bufata umwanzuro wo kutabyihanganira.
Abegereye ubutegetsi bagaragaza ko ifatwa n’igifungo cy’izi Mbonerakure ari ikimenyetso cy’uko Perezida Ndayishimiye atifuza ko izina ry’ubuyobozi bwe rikomeza kwitirirwa ibikorwa by’urugomo n’ibinyuranyije n’amategeko.
Tubibutse ko mushobora gukomeza kudukurikirana ku mbuga nkoranyambaga.
Kanda hano udukurikirane kuri Facebook, Hano udukurikirane kuri WhatsApp
