Abaturage b’akarere ka Umoja muri Kenya wagize agahinda kadasanzwe nyuma y’urupfu rwa Alphy Migasa, umutoza w’imyitozo ngororamubiri (gym) wari ukunzwe cyane muri ako gace.
Amakuru aturuka mu baturage b’aho byabereye avuga ko Migasa yagabweho igitero n’umusirikare w’ingabo za Kenya (Kenya Defence Forces – KDF) wari umaze iminsi avuye mu butumwa bw’amahoro muri Somalia.
Uwo musirikare, bivugwa, yamenye amakuru ko umugore we yaba afitanye umubano wihariye na Migasa, bikaba aribyo byamuteye uburakari bukomeye.
Ibyabaye byatangiriye mu kabari kagurisha inzoga muri Umoja, aho uwo musirikare yakurikiye Migasa, maze havuka amakimbirane yahise akurikirwa n’imirwano. Migasa yakomerekeye muri ubwo bushyamirane, ajyanwa kwa muganga, ariko ntiyabashije kurokoka, ahita yitaba Imana ari kuvurirwa mu bitaro.
Amashusho yakwirakwijwe ku mbuga nkoranyambaga agaragaza Migasa ari mu kazi ke ka buri munsi, atoza abakiliya be imyitozo ngororamubiri. Abamuzi bavuga ko ayo mashusho azahora ari urwibutso rw’umutoza w’impano idasanzwe, wabaye umuyobozi mwiza ku bantu benshi, kandi wibandaga ku kubaka ubuzima buzira umuze.
Abaturage bo muri Umoja barasaba ko inzego zishinzwe umutekano zikora iperereza rihamye ku rupfu rwa Migasa, mu rwego rwo gukumira ko ibindi byaha nk’ibi byongera kuba. Umuryango we n’abakiliya be barasaba ubutabera kandi basaba ko ibyaha nk’ibi bitazigera bisubira mu karere.
Umutoza Migasa yamenyekanye kubera ubuhanga bwe, kwitanga, no guha abakiliya be inyigisho z’imyitozo ngororamubiri ku buryo bwihariye. Urupfu rwe rwashenguye cyane imitima y’abakiliya be, cyane cyane urubyiruko rwamukundaga kubera uburyo yabafashaga kubaho neza mu mubiri no mu mutima.
Tubibutse ko mushobora gukomeza kudukurikirana ku mbuga nkoranyambaga.
Kanda hano udukurikirane kuri Facebook, Hano udukurikirane kuri WhatsApp
