Inkuru nshya yagaragaye muri Afurika y’Epfo irimo gukurura impaka zikomeye ku mikorere ya za Ambasade n’uburyo abakozi bamwe bashobora gukoresha nabi ububasha bafite, aho umugore ukora muri Minisiteri y’umutekano w’imbere mu gihugu akurikiranyweho gutanga Visa mu buryo butemewe, abitewe n’umubano wihariye yari afitanye n’uwayihabwaga.
Uwo mugore witwa Boitumelo Shounyane, wari umukozi wa Ambasade ya Afurika y’Epfo muri Nigeria, arakekwaho kuba yarahaye Visa y’imyaka itanu umusore ukomoka muri Nigeria witwa Musa Abdulmuminj Ahmed, nubwo yari yatanze ibyangombwa byaje kugaragara ko ari impimbano.
Amakuru atangwa n’inzego z’iperereza agaragaza ko iki kibazo cyatangiye mu mwaka wa 2018, ubwo Ahmed yasabaga Visa ajyanye n’ibikorwa by’ubucuruzi.
Icyakora, nyuma byaje kumenyekana ko inyandiko yatanze igaragaza ko ari umuyobozi w’ikigo cyitwa Saravin Technologies itari ifite ibimenyetso by’ukuri, ndetse n’amasezerano yavugaga ko gifitanye na sosiyete zo muri Afurika y’Epfo nka MVR Solutions na Raubex na yo aza gusanga ari impimbano.
Nubwo mu mategeko kuba abantu bakundana atari icyaha, iperereza ryagaragaje ko umubano wa hafi hagati ya Boitumelo na Ahmed ari wo ushobora kuba waragize uruhare rukomeye mu kwemeza dosiye ituzuye neza, bigatuma atanga Visa mu buryo bunyuranyije n’amabwiriza.
Ikindi cyateje impungenge inzego z’umutekano ni amakuru avuga ko uyu musore yanemerewe kwinjira mu bice by’ibanga bya Ambasade, aho yamaze amasaha menshi, ibintu bishobora kuba byarashyize mu kaga umutekano w’iki kigo cy’ububanyi n’amahanga.
Nyuma yo kumenya aya makuru, ikigo gishinzwe iperereza ku mutekano muri za Ambasade cyahise gitangira gukora iperereza ryimbitse, rigamije kumenya niba hari abandi bakozi baba baragize uruhare muri iki kibazo cyangwa niba ari icyemezo cyafashwe n’umuntu umwe.
Kuri ubu, dosiye ya Boitumelo Shounyane iri gusuzumwa n’Akanama gashinzwe imyitwarire muri Minisiteri y’umutekano w’imbere mu gihugu muri Afurika y’Epfo, kakazafata icyemezo ku gihano gishobora kumufatirwa, birimo no kuba yakwirukanwa burundu mu kazi cyangwa agashyikirizwa ubutabera.
Iyi nkuru ije yiyongera ku zindi zimaze iminsi zigaragaza ibibazo by’imiyoborere n’imikorere mu nzego zimwe na zimwe z’ibihugu bya Afurika, aho bamwe mu bakozi bashinjwa gushyira inyungu zabo bwite imbere y’inyungu z’igihugu.
Abasesenguzi bavuga ko ibi bigaragaza ko hakenewe gukazwa uburyo bwo kugenzura imikorere y’abakozi ba Leta, cyane cyane abakora mu nzego zifite aho zihuriye n’umutekano n’abinjira n’abasohoka mu gihugu, kuko amakosa nk’aya ashobora kugira ingaruka zikomeye ku rwego mpuzamahanga.
Nubwo iperereza rigikomeje, iyi dosiye yamaze gutuma hibazwa byinshi ku buryo urukundo n’amarangamutima bishobora kwivanga mu kazi ka Leta, bikaba byatuma amategeko atubahirizwa uko bikwiye.
Mu gihe Afurika y’Epfo ikomeje guhangana n’iki kibazo, haribazwa niba hari izindi dosiye nk’izi zishobora kuba zarabayeho zitahishuwe, bikaba byasaba inzego bireba gukaza ingamba zo gukumira ruswa n’ikorwa ry’ibyaha mu nzego za Leta.
Tubibutse ko mushobora gukomeza kudukurikirana ku mbuga nkoranyambaga.
Kanda hano udukurikirane kuri Facebook, Hano udukurikirane kuri WhatsApp
