Mu mpera z’icyumweru gishize, urubyiruko rw’u Burundi rwatangiye gukwirakwiza amakuru yavugaga ko hari amahirwe mashya yo kujya gukora mu Butaliyani biciye mu mahugurwa y’ururimi rw’Igitaliyani atangwa ku buntu. Ibaruwa iriho umukono wa Ambasaderi w’u Burundi mu Butaliyani, Ernest Ndabashinze, ni yo yabaye intandaro y’aya makuru, ndetse ivugwamo ko yandikiwe Minisitiri w’Ububanyi n’Amahanga w’u Burundi, Edouard Bizimana.
Iyo baruwa ifite nimero N° 204.03.14/05/MAEIRCD/2026, yanditswe ku wa 16/02/2026 yandikirwa i Roma, igaragaza ko Ambasade y’u Burundi i Roma yagiranye amasezerano y’ubufatanye na Kaminuza yitwa Université Auge de Rome, agamije gufasha urubyiruko rw’u Burundi kwiga Igitaliyani no kwinjira ku isoko ry’umurimo mu Butaliyani.
Nk’uko bigaragara muri iyo baruwa, iyo kaminuza yemeye gutanga amasomo y’Igitaliyani ku buntu mu buryo bw’ikoranabuhanga (online), ku rubyiruko rwifuza kuzaza gukurikira amasomo y’imyuga mu Butaliyani azabafasha kubona akazi mu bigo by’Abataliyani. Imyuga yavuzwe irimo: gusana ibinyabiziga, isuku, gutwara ibinyabiziga by’ubuhinzi, amahoteli, kwita ku bageze mu zabukuru, ubucuruzi bwo guteka, ububaji, ubwubatsi no gukora mu bubiko bw’ibicuruzwa.
Iyo baruwa isobanura ko urubyiruko ruzahita ruhabwa akazi rukigera mu Butaliyani, hanyuma rukajya rukurikira amasomo make ya tewori muri kaminuza, imyitozo y’umwuga igakorerwa mu kazi (on-the-job training).
Ariko nubwo ibi byumvikana nk’amahirwe akomeye ku rubyiruko rwugarijwe n’ubushomeri, hari ibibazo byinshi byatewe n’uburyo ayo makuru yakwirakwijwe. Igitangaje cya mbere ni uko iyo baruwa yandikiwe Minisitiri itigeze itangazwa ku rubuga rwa Minisiteri y’Ububanyi n’Amahanga y’u Burundi, cyangwa ngo ibe yatangajwe ku mugaragaro n’iyo minisiteri.
Mu buryo busanzwe mu Burundi, iyo Minisiteri y’Ububanyi n’Amahanga yakiriye amakuru ajyanye no kwiga cyangwa gukorera mu mahanga, ibimenyesha Minisiteri y’Uburezi kugira ngo itange amabwiriza no kubimenyesha ababyifuza. Icyakora kuri iyi nshuro, nta tangazo ryigeze risohoka.
Ikindi cyateje impaka ni uko bamwe mu rubyiruko bakurikiye link yatanzwe muri iyo baruwa, basanze bavuga ko amasomo y’Igitaliyani azamara amasaha 10 gusa. Ibi byatumye benshi bibaza uko umuntu ashobora kwiga ururimi rushya mu masaha 10 akaruhugukamo ku buryo rwamufasha gukora no kubana n’abaturage b’Igihugu cya kure nk’u Butaliyani.
Ku ruhande rumwe, urubuga rw’ikinyamakuru gishyigikiye Leta, The Messenger, rwemeje aya makuru, ruvuga ko ari gahunda nziza igamije gufasha urubyiruko kubona akazi no kwiteza imbere.
Ku rundi ruhande, urubuga Umuhinga Yigenga rwo rwatangaje ko ayo makuru ari ibinyoma byahimbwe n’abashaka kuyobya uburari no gukurura urubyiruko mu buryo budasobanutse.
Uku kutavuga rumwe kw’itangazamakuru kwatumye urujijo rwiyongera mu rubyiruko, bamwe batangira kuzuza amafishi basabwa no kohereza amakuru yabo kuri email yatanzwe (segreteriastudenti@augeuniversita.it), abandi bagira amakenga ko bashobora kugwa mu mutego w’abashukanyi.
Abasesenguzi b’ibijyanye n’akazi mu mahanga bavuga ko gahunda yo kohereza urubyiruko gukora mu Burayi isaba amasezerano asobanutse hagati y’ibihugu, ibisobanuro birambuye ku bijyanye na viza, amasezerano y’akazi, uburenganzira bw’umukozi n’uburyo azarindwa mu gihe hari ikibazo.
Iyo baruwa igaragaza ko uru rubyiruko ruzahita ruhabwa akazi rukigera mu Butaliyani. Ariko nta bisobanuro birambuye bitangwa ku bijyanye n’uburyo bwo kubona ibyangombwa by’inzira, amasezerano yanditse hagati y’umukozi n’umukoresha, cyangwa inshingano z’impande zombi.
Ibi byatumye bamwe batangira kwibaza niba koko hari amasezerano ya Leta ku rundi ruhande, cyangwa niba ari igikorwa cyatangijwe n’urwego rumwe rutanyuze mu nzira zisanzwe za dipolomasi.
Hari n’abagaragaza impungenge z’uko mu gihe aya makuru yaba ari ibinyoma, byaba ari uburyo bwo gukusanya amakuru y’urubyiruko no kurushuka, bikaba byabaviramo kugwa mu maboko y’abatekamutwe cyangwa abacuruza abantu.
Ku rundi ruhande, hari abavuga ko bidakwiye guhita byitirirwa uburiganya, kuko hari n’izindi gahunda zagiye zibaho zo kohereza abakozi mu mahanga biciye mu masezerano yemewe, kandi zikagenda neza.
Icyakora, mu bihe nk’ibi, icyo benshi basaba ni umucyo. Uwo mucyo waturuka kuri Minisitiri Edouard Bizimana ndetse na Ambasaderi Ernest Ndabashinze, bagasobanurira Abarundi niba iyi baruwa ari iy’ukuri, niba amasezerano yarashyizweho umukono ku mugaragaro, n’icyo urubyiruko rukwiye gukora.
Niba ari gahunda yemewe, byaba ari amahirwe akomeye ku rubyiruko rw’u Burundi, ariko hakenewe gutegurwa neza: kwiga ururimi bihagije, gusobanukirwa amategeko y’Igihugu ruzajyamo, no kumenya uburenganzira n’inshingano by’umukozi.
Niba kandi atari byo, byaba ari isomo rikomeye ku buyobozi bwo kwihutira gusobanurira abaturage amakuru akwirakwira, kugira ngo hatagira ugwa mu bishuko.
Kugeza ubu, urubyiruko rwinshi rukomeje gutegereza ijambo ryemewe rizaturuka mu nzego zibishinzwe. Mu gihe ayo makuru atarabonera igisubizo gisobanutse, impaka zirakomeje ku mbuga nkoranyambaga no mu biganiro by’abaturage.
Mu by’ukuri, ikibazo si amahirwe yo kujya gukora mu Butaliyani gusa, ahubwo ni ukwizera amakuru no kurinda ahazaza h’urubyiruko.
Tubibutse ko mushobora gukomeza kudukurikirana ku mbuga nkoranyambaga.
Kanda hano udukurikirane kuri Facebook, Hano udukurikirane kuri WhatsApp
