Uruganda rwa Volkswagen rwakomoje ku makuru yo gufunga no guhagarika ubucuruzi bwarwo mu Rwanda
Uruganda rukora imodoka rwa Volkswagen Group Africa rwanyomoje amakuru yari amaze iminsi akwirakwizwa n’abantu rutavuze amazina, yavugaga ko ishami ryarwo rikorera mu Rwanda ryahagaritse ibikorwa.
Uru ruganda rwemeje ko ibikorwa byarwo bigikomeje neza, ndetse ruri mu cyerekezo cyo kubyagura no kwimukira mu nyubako nshya.
Mu itangazo ryashyizwe hanze ku wa 24 Werurwe 2026, iri tsinda ryagaragaje ko ibivugwa ku kugabanya cyangwa guhagarika ibikorwa byaryo mu Rwanda nta shingiro bifite, rishimangira ko rifite gahunda ndende yo gukomeza gushora imari muri iki gihugu.
Volkswagen yatangaje ko guhera ku wa 1 Mata 2026, ishami ryayo rya Volkswagen Mobility Solutions Rwanda rizatangira gukorera mu cyanya cy’inganda cya Masoro, giherereye mu Karere ka Gasabo District. Izi nyubako nshya zizafasha kongera ubushobozi bw’ibikorwa bya serivisi zitandukanye zirimo gutwara abantu, guteranya imodoka, kuzigurisha no kuzitaho.
Kwamamaza ibihuha byavugaga ko ibikorwa by’uru ruganda byahagaze byajyanaga n’amakuru yavugaga ko aho uru ruganda rwakoreraga hahinduwe igaraje risanzwe.
Icyakora, ubuyobozi bwa Volkswagen bwabinyomoje, buvuga ko ibikorwa byari bisanzwe bikomeje ndetse n’ikorwa ryo kwimuka rikaba ari intambwe yo kubyagura aho kubigabanya.
Volkswagen yakomeje igaragaza ko u Rwanda ari isoko ry’ingenzi ku mugabane wa Afurika, ndetse ibikorwa byayo bikomeje kwaguka ku bufatanye n’andi mashami yayo yo mu karere. Ibi bijyana n’intego yo guteza imbere serivisi zigezweho zo gutwara abantu no guteza imbere inganda z’imodoka ku mugabane.
Uru ruganda runagaragaza uruhare rufite mu iterambere, aho mu 2025 rwasinyanye amasezerano n’Ishyirahamwe ry’Umukino w’Amagare mu Rwanda, FERWACY, yo gutanga imodoka nshya 114 zari kuzifashishwa mu gutegura Shampiyona y’Isi y’Amagare yabereye i Kigali.
Ibikorwa bya Volkswagen mu Rwanda byatangiye ku mugaragaro mu 2018, ubwo Perezida Paul Kagame yafunguraga uruganda ruteranyiriza imodoka muri iki gihugu. Kuva icyo gihe, uru ruganda rwagiye rwagura ibikorwa byarwo, rufasha mu guteza imbere ubwikorezi n’inganda.
Iri tangazo rije rikurikira imvugo n’inkuru zitandukanye zimaze iminsi zikwirakwizwa zigamije guharabika isura y’u Rwanda n’ishoramari ryarwo. Volkswagen ivuga ko izakomeza gukorana n’abafatanyabikorwa bayo mu guteza imbere ubucuruzi bwayo no gutanga serivisi zinoze ku baturage.
Mu gihe ibikorwa by’ubukungu bikomeje kwiyongera mu Rwanda, amagambo nk’aya ya Volkswagen agaragaza icyizere cy’abashoramari mpuzamahanga ku isoko ry’u Rwanda, ndetse n’uruhare rwaryo mu guteza imbere ubucuruzi n’inganda ku rwego rw’akarere.
Tubibutse ko mushobora gukomeza kudukurikirana ku mbuga nkoranyambaga.
Kanda hano udukurikirane kuri Facebook, Hano udukurikirane kuri WhatsApp
