Igihugu cya Libya cyongeye kwinjira mu bihe bikomeye by’akajagari n’impaka nyuma y’inkuru yemeje urupfu rwa Saif al-Islam Gaddafi, umuhungu wa Muammar Gaddafi wayoboye Libya imyaka irenga 40, rukaba rwatumye havuka impaka nshya ku mutekano, politiki n’ahazaza h’iki gihugu kimaze imyaka myinshi mu mvururu.
Amakuru yatangajwe n’itangazamakuru mpuzamahanga, harimo na Al Jazeera, avuga ko Saif al-Islam Gaddafi yitabye Imana ku wa 3 Gashyantare 2026, aguye mu Mujyi wa Zintan, uherereye mu burengerazuba bwa Libya, aho yari amaze igihe kirekire aba mu bwigunge.
Urupfu rwe rwemejwe n’umujyanama we mu bya politiki, Abdullah Othman, wavuze ko Saif al-Islam yari afite imyaka 53 y’amavuko. Icyateye uru rupfu ntikiramenyekana ku mugaragaro, ariko amakuru ya mbere akomeje kuvuga ko ashobora kuba yarashwe, ibintu byatumye hibazwa byinshi ku mutekano we no ku bari bamukikije.
Abayobozi batandukanye ba Libya batangiye gusaba ko hakorwa iperereza ryigenga kandi ritabogamye. Khaled al-Mishri, wahoze ayobora Inama Nkuru y’Igihugu yashyizweho nyuma y’impinduramatwara yo mu 2011, yatangaje ko urupfu rwa Saif al-Islam rudakwiye gufatwa nk’ibisanzwe, asaba ko ukuri ku byabaye gushyirwa ahagaragara.
Nubwo Saif al-Islam atigeze agira umwanya wemewe mu buyobozi bwa Leta, benshi mu basesenguzi bemera ko ku ngoma ya se yari umwe mu bantu bakomeye cyane mu gufata ibyemezo, by’umwihariko hagati ya 2000 na 2011. Yafatwaga nk’umurage wa politiki wa Muammar Gaddafi, kandi bamwe bamubonagamo umuntu washoboraga gusimbura se.
Nyuma y’ihirikwa ry’ubutegetsi bwa Muammar Gaddafi mu 2011, Saif al-Islam yagerageje guhunga ariko afatirwa mu Mujyi wa Zintan, aho yafungiwe imyaka myinshi. Icyo gihe, yari umwe mu bantu bashakishwaga cyane, ndetse Urukiko Mpuzamahanga Mpanabyaha (ICC) rwari rwaramusabiye gutabwa muri yombi.
Mu 2017, Saif al-Islam yaje kurekurwa ku mbabazi, ibintu byatumye havuka amakuru avuga ko ashobora kongera kwinjira muri politiki ya Libya, cyane cyane mu bihe by’amatora. Nubwo atigeze yongera kugaragara cyane mu ruhame, izina rye ryakomeje kuba ikimenyetso gikomeye mu mateka ya Libya.
Urupfu rwe ruje mu gihe Libya igikomeje guhangana n’amakimbirane ya politiki, imitwe yitwaje intwaro, n’ubuyobozi bubiri buhanganye. Abasesenguzi bavuga ko uru rupfu rushobora kongera umwuka mubi mu gihugu, cyane cyane mu turere twari tugifite abashyigikiye umuryango wa Gaddafi.
Kugeza ubu, abaturage ba Libya n’amahanga bakomeje gutegereza ibisubizo by’iperereza, mu gihe impaka ku mateka, uruhare n’ingaruka za Saif al-Islam Gaddafi ku gihugu cye zikomeje gufata indi ntera.
Tubibutse ko mushobora gukomeza kudukurikirana ku mbuga nkoranyambaga.
Kanda hano udukurikirane kuri Facebook, Hano udukurikirane kuri WhatsApp
