Repubulika Iharanira Demokarasi ya Congo (RDC) yatangaje ku mugaragaro ko yatanze kandidatire ya Juliana Amato Lumumba ku mwanya w’Umunyamabanga Mukuru w’Organisation internationale de la Francophonie (OIF), mu matora ateganyijwe mu mpera za 2026. Ibi byemejwe ku wa 26 Gashyantare 2026 na Minisiteri y’Itangazamakuru n’Itumanaho ya RDC ibinyujije mu itangazo ryasohowe na Kinshasa.
Juliana Amato Lumumba ni umukobwa wa Patrice-Emery Lumumba, wabaye Minisitiri w’Intebe wa mbere wa Congo. Itangazwa ry’uyu mukandida rifite uburemere budasanzwe mu rwego rwa politiki n’amarangamutima, aho bamwe mu bayobozi ba Congo babwiye Ibiro Ntaramakuru by’Abanyekongo (ACP) ko “uburemere bw’izina rye, ubushobozi bwe n’inkunga y’igihugu cyose” bituma aba umukandida ufite amahirwe akomeye.
Mu itangazo ryashyizweho umukono n’ubuyobozi bwa Minisiteri y’Itangazamakuru, Guverinoma ya RDC yavuze ko kandidatire ya Juliana Amato Lumumba igamije gutanga umusanzu mu kuvugurura no kurushaho kugaragaza imbaraga z’umuryango wa Francophonie ku rwego mpuzamahanga.
Bwana Crispin Mbadhu Phanzu, Minisitiri wungirije ushinzwe Francophonie n’Abanye-Congo baba mu mahanga, yatangaje ko Congo yifuza “Francophonie igezweho, irushaho kwakira bose kandi iri hafi y’abaturage.” Yashimangiye ko ubunararibonye bwe mu miyoborere ya Leta, diplomasi y’umuco, ubufatanye mpuzamahanga no guteza imbere ubucuruzi muri Afurika bumugira umukandida ushoboye kandi w’umunyabikorwa.
Juliana Amato Lumumba afite impamyabumenyi y’Ikirenga yakuye mu Ishuri Rikuru ry’Ubushakashatsi mu Bumenyi bw’Imibereho (EHESS) i Paris. Yabaye Visi-Minisitiri w’Umuco n’Itangazamakuru, nyuma aba Minisitiri w’Umuco hagati ya 1997 na 2001. Yanabaye Umunyamabanga Mukuru w’Ihuriro ry’Inganda n’Ubucuruzi bya Afurika (UACCIAP) i Cairo kuva 2007 kugeza 2015.
Uretse ibikorwa bya politiki, azwi kandi nk’umushoramari washinze ibigo bikora mu by’itumanaho, ubujyanama n’ubucuruzi mpuzamahanga, ndetse akaba amaze imyaka myinshi atanga ibiganiro ku ruhando mpuzamahanga ku ruhare rw’umugore mu iterambere ry’ubukungu, kwihangira imirimo no kwishyira hamwe kwa Afurika.
Mu matora ataha, Juliana Amato Lumumba azahatana n’Umunyarwandakazi Louise Mushikiwabo, umaze manda ebyiri ayobora OIF. Mushikiwabo yatangiye izi nshingano mu 2019, aza kongera gutorerwa manda ya kabiri izarangira mu Gushyingo 2026.
U Rwanda ruherutse kongera kumugirira icyizere rumushyiraho nk’umukandida warwo mu matora ataha, aho azaba ahatanira manda ya gatatu. Mu gihe manda ze zabaye izo guharanira ko OIF irushaho kugira ijambo mu bibazo by’isi, by’umwihariko mu guteza imbere ururimi rw’Igifaransa, urubyiruko n’ikoranabuhanga, ubu ahanganye n’umukandida mushya ufite izina rikomeye mu mateka ya Congo no muri Afurika muri rusange.
Iri rushanwa rishobora kugira isura yihariye kuko rihuza ibihugu bibiri byo mu Karere k’Ibiyaga Bigari bifitanye amateka akomeye kandi akenshi atavugwaho rumwe mu bya politiki n’umutekano. Izina Lumumba rifite igisobanuro gikomeye mu mateka ya Congo no muri Afurika, mu gihe Mushikiwabo na we azwiho ubunararibonye muri dipolomasi, aho yabaye Minisitiri w’Ububanyi n’Amahanga w’u Rwanda mbere yo kujya kuyobora OIF.
Kuri ubu, amaso y’ibihugu bigize OIF arareba Kinshasa na Kigali, harebwa uko ibihugu bizitwara muri aya matora ashobora guhindura icyerekezo cy’uyu muryango uhuza ibihugu birenga 80 bikoresha Igifaransa cyangwa bifitanye umubano nabyo.
Tubibutse ko mushobora gukomeza kudukurikirana ku mbuga nkoranyambaga.
Kanda hano udukurikirane kuri Facebook, Hano udukurikirane kuri WhatsApp
