Mu gihe ibihugu byinshi bya Afurika bikomeje guhura n’ihungabana ry’ubukungu rishingiye ku bibazo by’umutekano n’imihindagurikire y’amasoko ku Isi, u Rwanda rwo rukomeje kugaragaza isura yihariye y’iterambere rihamye.
Imibare iheruka igaragaza ko ubukungu bw’igihugu bwiyongereye ku kigero cya 9,4% mu mwaka wa 2025, bukomeza gushyira u Rwanda mu bihugu bifite umuvuduko uri hejuru ku mugabane.
Urwego rw’Igihugu rw’Iterambere (RDB) ruvuga ko iri zamuka rishingiye ku miyoborere ihamye, icyizere abashoramari bagirira igihugu ndetse n’ingamba zifatika zo guteza imbere ishoramari ry’imbere n’iriva hanze.
Nubwo mu karere k’ibiyaga bigari hakomeje kugaragara umwuka mubi by’umwihariko mu burasirazuba bwa Repubulika Iharanira Demokarasi ya Congo, abayobozi b’u Rwanda bashimangira ko ibyo bitigeze bihungabanya icyerekezo cy’ubukungu bw’igihugu.
Umuyobozi Mukuru wa RDB, Jean-Guy Afrika, aherutse gutangaza ko icyerekezo cy’u Rwanda cya 2050 kigamije guhindura igihugu igicumbi cy’ubucuruzi n’ishoramari, gishingiye ku guteza imbere ibikorwa byongera agaciro, guhanga imirimo no kongera ibyoherezwa mu mahanga.
Yavuze ko “inkingi z’ubukungu bw’u Rwanda zikomeye kandi zishingiye ku cyizere kirambye cy’abashoramari.”
Imibare yo mu 2024 ishimangira iyi myumvire, aho ishoramari mvamahanga ryageze kuri miliyari zirenga 1,1 z’amadolari ya Amerika, rikazamukaho 23,9%. Byongeye kandi, ishoramari ryakozwe mu migabane ryarenze miliyari 5,5 z’amadolari, rikazamuka ku kigero cya 10,4%. Ibi bigaragaza ko u Rwanda rukomeje kuba ahantu hizewe ho gushora imari.
Mu bihugu byakoze ishoramari rinini mu Rwanda harimo Ibirwa bya Maurice, Kenya, u Bushinwa, Leta Zunze Ubumwe za Amerika n’u Budage. Ibi byerekana uburyo u Rwanda rwagutse mu mikoranire mpuzamahanga, rukarenga imbibi z’akarere ka Afurika y’Iburasirazuba.
Mu rwego rwo gukomeza kwagura ubufatanye, u Rwanda rwanashyize umukono ku masezerano n’ibihugu bitandukanye arimo Repubulika ya Congo, agamije guteza imbere ubuhinzi, inganda no kongera ubucuruzi hagati y’impande zombi. Aya masezerano ateganya kandi guhererekanya ubumenyi no guteza imbere ibyanya by’inganda bizafasha kuzamura urwego rw’ubucuruzi.
Ku rundi ruhande, u Rwanda rukomeje gushora imari mu bikorwa by’imikino mpuzamahanga nk’inkingi y’ingenzi mu bukerarugendo. Mu 2025, rwakiriye Shampiyona y’Isi y’Amagare, igikorwa cyagaragaje ubushobozi bw’igihugu mu gutegura ibikorwa bikomeye ku rwego mpuzamahanga.
Biteganyijwe kandi ko i Kigali hazabera imikino ya FIFA Series hagati ya tariki ya 26 na 30 Werurwe, ikazahuza amakipe atandukanye yo hirya no hino ku Isi.
Si ibyo gusa, kuko u Rwanda rwanatangiye ibiganiro byo kwakira amasiganwa ya Formula One (F1), imwe mu mikino ikunzwe cyane ku Isi.
Nubwo amasezerano atarasozwa, abari mu biganiro bavuga ko gahunda igeze ku ntambwe ishimishije, aho u Rwanda ruri no gutegura ibikorwa remezo birimo ikibuga cy’indege mpuzamahanga cya Bugesera kizafasha mu kwakira iyo mikino mu myaka iri imbere, by’umwihariko mu 2029.
Mu rwego rwo kongera ibyoherezwa mu mahanga, u Rwanda rwibanze cyane ku guteza imbere ubuhinzi bugezweho.
Ubu buhinzi bufite uruhare rwa 25% mu musaruro mbumbe w’igihugu kandi butanga akazi ku barenga 60% by’abaturage. Intego ni ukuva ku buhinzi bw’amaramuko, hakajyaho ubuhinzi bugamije ubucuruzi bushobora guhangana ku masoko mpuzamahanga.
Kugeza ubu, u Rwanda rumaze kumenyekana cyane ku bicuruzwa nk’ikawa n’icyayi, ariko hari gahunda yo kwagura ibicuruzwa byoherezwa hanze birimo indabo, imboga n’imbuto, ibikomoka ku mata n’inkoko. Ibi bijyana no kubaka inganda zongera agaciro kuri ibyo bicuruzwa, bigafasha kongera inyungu ku bahinzi no kuzamura imibereho yabo.
Muri rusange, nubwo akarere gakomeje guhura n’ibibazo by’umutekano, u Rwanda rukomeje kugaragaza ko rushobora kubaka ubukungu buhamye bushingiye ku ishoramari, ubucuruzi n’udushya, rukarushaho kwiyubaka nk’igicumbi cy’iterambere rirambye ku mugabane wa Afurika.
Tubibutse ko mushobora gukomeza kudukurikirana ku mbuga nkoranyambaga.
Kanda hano udukurikirane kuri Facebook, Hano udukurikirane kuri WhatsApp
