U Rwanda rukomeje ibikorwa bya dipolomasi bigamije gushimangira umubano n’ibindi bihugu no gushaka inkunga mpuzamahanga ku mukandida warwo ku buyobozi bw’Umuryango Mpuzamahanga w’Ibihugu bikoresha Ururimi rw’Igifaransa (OIF), Louise Mushikiwabo.
Kuri uyu wa 25 Werurwe 2026, Minisitiri w’Umutekano mu Gihugu, Dr. Vincent Biruta, yakiriwe i Brazzaville na Perezida wa Repubulika ya Congo, Denis Sassou N’Guesso, aho yamugejejeho ubutumwa bwa Perezida Paul Kagame.
Ubu butumwa bwari bukubiyemo kumwifuriza ishya n’ihirwe nyuma yo kongera gutorerwa kuyobora Congo-Brazzaville muri manda ya gatanu, nyuma yo gutsinda amatora yo ku wa 15 Werurwe 2026 ku majwi 94,82%. Perezida Kagame kandi ari mu banyacyubahiro bamushimiye banyuze ku rubuga rwa X.
Mu butumwa bwe, Perezida Kagame yasabye Sassou N’Guesso kuzashyigikira kandidatire ya Louise Mushikiwabo, uri gushaka kongera kuyobora OIF muri manda ya gatatu.
Mushikiwabo asanzwe ayobora uyu muryango kuva mu 2019, aho yagiye agaragaza intego yo guteza imbere ikoreshwa ry’Igifaransa no guteza imbere ubufatanye hagati y’ibihugu biwugize.
U Rwanda rwamaze gutanga kandidatire ya Mushikiwabo muri Mutarama 2026, runatangira urugendo rwo kuganira n’ibihugu bitandukanye ngo rubone inkunga izamufasha gutsinda ayo matora.
Mu biganiro byabereye i Brazzaville, Minisitiri Biruta na Perezida Sassou N’Guesso banagarutse ku mubano w’ibihugu byombi, baganira ku buryo wakomeza gutezwa imbere no kurushaho gushinga imizi.
U Rwanda na Congo-Brazzaville bisanzwe bifitanye umubano uhamye, by’umwihariko mu bya dipolomasi na politiki.
Mu 2016, u Rwanda rwafunguye ambasade muri iki gihugu, mu gihe mu 2011 impande zombi zari zasinyanye amasezerano y’ubufatanye mu nzego zitandukanye zirimo ubucuruzi, ubukerarugendo, ingufu, umutekano n’ibidukikije.
Uretse ayo masezerano, mu Ugushyingo 2021, ibi bihugu byongeye gusinyana andi agamije guteza imbere ubufatanye mu bya gisirikare, uburezi, ubutaka, iterambere rirambye, kubungabunga ibidukikije ndetse no kwagura ubucuruzi n’ingendo zo mu kirere.
Ibi biganiro n’ubutumwa byagaragaje ko u Rwanda rukomeje gushyira imbaraga mu kubaka umubano wimbitse n’ibihugu bya Afurika no gushaka inkunga mu mishinga yarwo mpuzamahanga, by’umwihariko mu guharanira ko Mushikiwabo yakomeza kuyobora OIF, mu rwego rwo guteza imbere inyungu rusange z’ibihugu bikoresha ururimi rw’Igifaransa.
Tubibutse ko mushobora gukomeza kudukurikirana ku mbuga nkoranyambaga.
Kanda hano udukurikirane kuri Facebook, Hano udukurikirane kuri WhatsApp
