Ihuriro ry’abanyapolitiki ry’ububyutse, REPOP, ryatangaje ko ryirukanye Claude Ibalanky Ekolomba ku buyobozi nyuma y’uko yagaragaye mu bikorwa bya politiki bifitanye isano n’ihuriro AFC/M23, icyemezo cyashyizwe ahagaragara ku wa Gatandatu, tariki 31 Mutarama 2026.
Mu itangazo ryashyizweho umukono n’abashinzwe ishyirwamubikorwa ry’ihuriro ndetse n’inama y’abaperezida b’imitwe ya politiki, REPOP yemeje ko Ibalanky yakoze ibikorwa bihabanye n’indangagaciro n’umurongo w’ihuriro, ndetse ko yinjiriye muri AFC/M23 ku giti cye nta ruhare ihuriro ryagize mu byemezo bye.
Ihuriro ryabisobanuye rikomeza rigira riti: “Birakomeye kubona Perezida washyizweho n’abanyamuryango bashinze ihuriro, ari we Claude Ibalanky Ekolomba, yaragiye kwifatanya n’abanzi ba DRC, AFC/M23. Turashaka gusobanurira abaturage mu gihugu ndetse no ku rwego mpuzamahanga ko Bwana Claude Ibalanky Ekolomba atigeze ashinga ihuriro rya politiki rya REPOP.”
Abashinze ihuriro bongeyeho ko, mu rwego rwo kwerekana ko bakomeza gushyigikira ubutegetsi bwa Perezida Félix-Antoine Tshisekedi Tshilombo, bakomeje guha abaturage icyizere ko ibikorwa bya politiki bigamije imibereho myiza y’igihugu, atari inyungu z’umuntu ku giti cye.
Ibi byemezo bije nyuma y’uko Claude Ibalanky, wahoze ari umuhuzabikorwa w’Urwego rw’Igihugu rushinzwe Gukurikirana Amasezerano ya Addis Abeba, agaragaye ku wa Gatandatu i Goma ari kumwe n’abayobozi ba AFC/M23, ibintu byashimangiye impungenge z’ihuriro ko atakiri mu murongo wabo wa politiki.
REPOP yemeje ko Ibalanky atagifite uburenganzira bwo guhagararira ihuriro, kandi ko icyemezo cyo kumwirukana cyafashwe ku bw’inyungu z’igihugu n’indangagaciro z’ihuriro, mu rwego rwo kurinda icyizere abaturage bafite mu buyobozi bwa politiki ry’ububyutse.
Tubibutse ko mushobora gukomeza kudukurikirana ku mbuga nkoranyambaga.
Kanda hano udukurikirane kuri Facebook, Hano udukurikirane kuri WhatsApp
