Mu gihe umuziki nyarwanda ukomeje kugenda waguka no kugera ku rwego mpuzamahanga, bamwe mu bahanzi barimo kongera kugaragaza ko bafite abafana babakunda ku buryo budasanzwe.
Ni muri urwo rwego inkuru ikomeje kuvugisha benshi ku mbuga nkoranyambaga ivuga kuri Gisa Cyinganzo, umuhanzi uri mu bagezweho mu njyana ya gakondo igezweho.
Amakuru aturuka mu kiganiro uyu muhanzi yagiranye n’itangazamakuru agaragaza ko yahuye n’ibintu byamutunguye ubwo yari yagiye kwidagadura mu kabari kamwe ko mu mujyi wa Kigali, mu gace ka Nyamirambo.
Aho ni ho yahuriye n’umukobwa wamugaragarije urukundo rudasanzwe ku muziki we, kugeza n’aho amusaba ikintu kidasanzwe: kumusinyira ku ibere.
Gisa Cyinganzo yavuze ko uwo mukobwa yamusanze azanye ikaramu, amusaba ko yamusinyira, ariko atungurwa no kubona yiyambuye igice cy’umwenda akamwereka aho ashaka ko ashyira umukono. Mu magambo ye, yavuze ko byamufashe nk’igikorwa kidasanzwe ariko cyerekana urwego abafana bamwe bagezeho mu gukunda ibihangano bye.
Yagize ati: “Twahuriye mu kabari hano i Nyamirambo, aza afite ikaramu ansaba ko namusinyira. Mu kanya gato ahita yigizayo umwenda ansaba ko namusinyira ku ibere. Byarantunguye cyane, ariko sinari kubyanga kuko yari yabyifuje nk’umufana wanjye.”
Nubwo byari ibintu bitunguranye, uyu muhanzi yavuze ko nta yandi makuru yamenye kuri uwo mukobwa, kuko nyuma yo kumusinyira, buri wese yahise akomeza ibye. Icyakora, yashimangiye ko icyo gikorwa cyamukoze ku mutima, kikamwereka ko hari abantu bakurikiranira hafi ibihangano bye.
Iyi nkuru yakwirakwiye cyane ku mbuga nkoranyambaga, aho bamwe bayifashe nk’igisanzwe mu myidagaduro, mu gihe abandi bagaragaje ko ari igikorwa gikwiye kuganirwaho cyane ku bijyanye n’imyitwarire y’abafana n’abahanzi mu ruhame.
Ku rundi ruhande, abasesenguzi b’imyidagaduro bagaragaza ko ibi ari kimwe mu bimenyetso by’uko umuziki nyarwanda uri kugenda ugira ingaruka zikomeye ku bawukurikira, aho bamwe mu bafana barenga imbibi zisanzwe zo kugaragaza ibyishimo n’urukundo bafitiye abahanzi.
Gisa Cyinganzo, umaze igihe agaragaza imbaraga mu gusubira ku rwego rwo hejuru nyuma y’ibihe bitamworoheye, yavuze ko ibi bimwongerera imbaraga zo gukora cyane. Yemeza ko intego ye ari ugukomeza guhanga ibihangano byiza bizatuma abakunzi be bakomeza kumushyigikira no kumugirira icyizere.
Tubibutse ko mushobora gukomeza kudukurikirana ku mbuga nkoranyambaga.
Kanda hano udukurikirane kuri Facebook, Hano udukurikirane kuri WhatsApp
