Mu gihe umwuka mubi ukomeje kwiyongera hagati y’u Rwanda na Repubulika Iharanira Demokarasi ya Congo, amakuru akomeje kugaragaza uko ubutegetsi bwa Perezida Félix Tshisekedi buri gushaka uburyo bushya bwo guhangana n’u Rwanda, harimo no gukoresha bamwe mu Banyarwanda baba mu mahanga.
Mu minsi ishize, ibikorwa byo guhuza abarwanya Leta y’u Rwanda byabereye i Kinshasa byongeye kuvugwa cyane. Muri ibyo biganiro, hagaragaye Jean-Luc Habyarimana, umuhungu wa nyakwigendera Juvénal Habyarimana, nk’umuntu uri mu bashobora guhabwa uruhare rukomeye muri iryo huriro.
Amakuru aturuka mu nzego z’ubutasi mu karere ndetse no mu Bufaransa agaragaza ko Tshisekedi atamuhisemo gusa kubera izina rikomeye ry’umuryago akomokaho, ahubwo yanashingiye ku miterere ye: ameze nk’umuntu uvugwa ko ashobora kuyoborwa byoroshye no kwitabazwa mu bikorwa by’icengezamatwara.
Bivugwa ko hari umugambi wo gushinga ihuriro rishya rizahuza imitwe irimo n’abarwanyi ba FDLR ndetse n’abanyapolitiki n’abasirikare bahoze mu Rwanda, barimo Kayumba Nyamwasa.
Icyo cyerekezo kigamije kongera imbaraga mu bikorwa byo kunenga no kurwanya ubutegetsi bwa Kigali, haba mu magambo no mu bikorwa byo kwamamaza ibitekerezo.
Amateka ya Jean-Luc asubiza amaso inyuma ku buzima bw’umuryango we nyuma ya 1994, ubwo wahungiraga muri Zaïre yakiriwe na Mobutu Sese Seko.
Icyo gihe, Mobutu yamugaragaje nk’intwari, ndetse bivugwa ko yamuhaye inkunga y’amafaranga menshi amushimira ibikorwa yakoze mu bihe by’urujijo rwakurikiye ihanurwa ry’indege ya se.
Nyuma yaho, umuryango waje kwimukira muri Gabon, aho wakiriwe na Omar Bongo, na we wamuhaye amafaranga akomeye mbere y’uko ajya kuba mu Bufaransa. Nubwo ayo mahirwe yose yabonetse, ubuzima bwa Jean-Luc bwagiye burangwa n’ibibazo by’ubukungu, aho amakuru avuga ko yasesaguye byinshi mu byo yahawe.
Ubu bivugwa ko atuye hamwe n’umubyeyi we Agathe Kanziga Habyarimana, ibintu bamwe mu basesenguzi babona nk’icyuho Tshisekedi ashobora kuba yarashingiyeho amwiyegereza, amwizeza ubufasha bw’amafaranga mu rwego rwo kumwifashisha.
Gusa nubwo uyu mugambi watangiye gushyirwa mu bikorwa, amakuru ava i Kinshasa agaragaza ko utagenda uko wari witezwe.
Bivugwa ko Jean-Luc yahawe inkunga yo gutangiza ibikorwa byo kwamamaza no gukwirakwiza ibitekerezo binenga Leta y’u Rwanda, ariko ibikorwa bye bikaba byaragarukiye cyane ku gushinga urubuga rwitwa “Extrafrica Media Group,” rutaragera ku rwego rwifuzwaga.
Abasesenguzi bavuga ko gukoresha abantu badafite ubunararibonye mu miyoborere cyangwa mu bya politiki bishobora gutuma imigambi nk’iyi idatanga umusaruro, cyane cyane iyo ishingiye ku mateka aho gushingira ku bushobozi.
Mu gihe ibibazo by’umutekano muke bikomeje kuvugwa mu karere, by’umwihariko mu burasirazuba bwa RDC, iyi nkuru yongeye kugaragaza uburyo intambara y’amagambo n’icengezamatwara iri gufata indi ntera, aho abantu ku giti cyabo bashobora guhindurwa ibikoresho bya politiki mu nyungu z’ibihugu.
Tubibutse ko mushobora gukomeza kudukurikirana ku mbuga nkoranyambaga.
Kanda hano udukurikirane kuri Facebook, Hano udukurikirane kuri WhatsApp
