Mu gihe ubwisungane mu kwivuza (Mutuelle de Santé) bukomeje kuba inkingi ya mwamba mu rwego rw’ubuzima mu Rwanda, Leta yashyizeho ibiciro bishya by’imisanzu bizatangira kubahirizwa hashingiwe ku Iteka rya Minisitiri w’Intebe ryo ku wa 16 Gashyantare 2026. Iri teka rigena ingano n’uburyo bwo gutanga umusanzu w’ubwisungane mu kwivuza, rikaba ryazamuye amafaranga atangwa n’abanyamuryango hashingiwe ku byiciro by’imibereho.
Nk’uko biteganywa n’iri teka, abaturage bari mu rwego rwa mbere rw’imibereho bazajya batangira umusanzu wa 4.000 Frw kuri buri muntu ku mwaka. Icyakora, aya mafaranga azakomeza kwishyurwa na Leta, bivuze ko abagenerwabikorwa batagomba kuyiyishyura ubwabo.
Ku baturage bari mu rwego rwa kabiri, umusanzu uzaba ari 3.000 Frw kuri buri muntu ku mwaka, ariko Leta ikabunganira ikishyura 1.000 Frw. Ibi bivuze ko agaciro k’umusanzu ku muntu umwe muri iki cyiciro kangana na 4.000 Frw, ariko umuturage akishyura 3.000 Frw gusa.
Abari mu rwego rwa gatatu bo bazajya batanga 5.000 Frw kuri buri muntu ku mwaka, mu gihe abari mu rwego rwa kane bazajya batanga 8.000 Frw kuri buri muntu ku mwaka.
Impinduka ikomeye igaragara ku baturage bari mu rwego rwa gatanu, ari na rwo rwego rufite ubushobozi bwo hejuru, aho umusanzu wiyongereye ukagera ku 20.000 Frw kuri buri muntu ku mwaka. Aha ni ho hari amafaranga menshi azajya atangwa mu byiciro byose by’imibereho.
Izi mpinduka zije mu gihe Leta ikomeje gushimangira gahunda yo guteza imbere serivisi z’ubuzima no kongera ubushobozi bw’ubwisungane mu kwivuza, hagamijwe ko buri Munyarwanda abasha kubona ubuvuzi bw’ibanze kandi ku giciro gishoboka.
Ubwisungane mu kwivuza bwagize uruhare runini mu kongera umubare w’Abanyarwanda bafite ubwishingizi bwo kwivuza, bugabanya umubare w’abahura n’ibibazo byo kubura amafaranga yo kwivuza igihe barwaye. Gusa, izamuka ry’imisanzu rishobora gutuma bamwe bibaza ku ngaruka rizagira ku miryango ifite ubushobozi bucye, cyane cyane mu byiciro bya kabiri n’icya gatatu aho abaturage basabwa kwishyura igice kinini ubwabo.
Abasesenguzi mu by’ubukungu bavuga ko kongera imisanzu bishobora gufasha mu kuzamura ireme rya serivisi zitangwa n’ibigo nderabuzima n’amavuriro, ariko bikaba bisaba no gukomeza gushyiraho uburyo bwo kurengera abatishoboye kugira ngo hatazagira usigara inyuma.
Leta irahamya ko izi mpinduka zigamije gukomeza gusaranganya umutwaro hashingiwe ku bushobozi bwa buri wese, no gukomeza gushyigikira abatishoboye binyuze mu kubishyurira umusanzu wose cyangwa igice cyawo.
Mu gihe iri teka rigiye gushyirwa mu bikorwa, abaturage barasabwa kugenzura ibyiciro byabo by’imibereho no kwitegura gutanga umusanzu ukwiye mu gihe cyagenwe, kugira ngo bakomeze kubona serivisi z’ubuvuzi nta nkomyi.
Impinduka mu misanzu ya Mituweli zongeye kugaragaza uburyo gahunda y’ubwisungane mu kwivuza ikomeje kuvugururwa no kunozwa, mu rwego rwo kubaka sisitemu y’ubuzima irambye kandi igerwaho na bose.
Tubibutse ko mushobora gukomeza kudukurikirana ku mbuga nkoranyambaga.
Kanda hano udukurikirane kuri Facebook, Hano udukurikirane kuri WhatsApp
